Յուվեցի Կարոյի փեսան դատավճիռը չի բողոքարկում

«Վերնիսաժի» գործով 6.5 տարվա ազատազրկման դատապարտված, ԱԺ պատգամավոր Կարո Կարապետյանի (Յուվեցի Կարո) փեսայի՝ Գոռ Առաքելյանի դատավճիռը չի բողոքարկվել.այս մասին Fnews.am-ի հետ զրույցում ասաց նրա փաստաբան Երեմ Սարգսյանը:
Գործով մեղադրյալ Վալերիկ Հովհաննիսյանի հայրը՝ Սամվել Հովհաննիսյանը տեղեկացրեց, որ իրենք ևս վերաքննիչ բողոք չեն ներկայացնում: «Ճիշտ է մենք դատարանի կայացրած վճռի հետ համաձայն չենք,բայց մենք վստահ ենք,որ եթե բողոքարակենք էլ դատարանը նույն է թողնելու, որովհետև ծախված են, այդ իսկ պատճառով էլ չենք բողոքարկում»,-ասաց Հովհաննիսյանը: Հայրը նշեց, որ որդին իրեն լավ է զգում. «Առողջական խնդիրներ ունի, բայց ոչինչ իրեն պինդ է պահում, մենք էլ ենք ուժ տալիս, շուտով էդ մղձավանջային տարիները կավարտվեն ու ամեն մեկն իր կյանքին կվերադառնա»:
Հիշեցնենք, որ անցյալ տարի մայիսի 17-ին «Վերնիսաժի» տարածքում կրակոցներ էին հնչել: Գոռ Առաքելյանը Վարդանանց փողոցի թիվ 18/2 շենքի ստորգետնյա ավտոկայանատեղիի մուտքի դարպասների մոտ վիճել էր Վալերիկ Հովհաննիսյանի և Ներսես Մելքոնյանի հետ, վիճաբանությունն այնքան էր թեժացել, որ Գոռ Առաքելյանն անկանոն կրակահերթ էր բացել վերոհիշյալների ուղղությամբ:
Գործով մեղադրյալ, ԲՀԿ խմբակցության պատգամավոր Կարո Կարապետյանի (Յուվեցի Կարո) փեսայի համար դատախազը պահաջել է 9 տարվա ազատազրկում, Նելսոն Մելքոնյանի համար 2, իսկ Վալերիկ Հովհաննիսյանի համար 2.5 տարվա ազատազրկում: Սակայն դատարանը վճռեց Գոռ Առաքելյանին դատապարտել 6 տարի 6 ամսվա ազատարկման, Վալերիկ Հովհաննիսյանին 3 տարվա ազատազրկման, իսկ Ներսես Մելքոնյանին՝ 2 տարվա ազատազրկման: