Զրկված ենք ոչ միայն լույսից, այլ նաեւ հույսից. Հաշմանդամություն ունեցող ընտանիքի հայրը՝ ահազանգում է

NEWSMEDIA.am-ը շարունակում է անդրադառնալ սոցիալապես անապահով ընտանիքների առաջ ծառացած խնդիրներին` hանրությանը ներկայացնելով մեր կողքին ապրող, յուրաքանչյուրիս բարի կամքի դրսեւորման կարիքն ունեցող ընտանիքիներին:

Այս անգամ մեր խմբագրություն է դիմել Երեւան քաղաքի` Կիլիկա թաղամասի բնակիչ, հաշմանդամ Արսեն Վարդանյանը, ով` իր երկու երեխաների եւ կնոջ հետ տեւական ժամանակ է զրկված ամենատարական կենցաղային պայմաններից, իսկ արտակարգ դրությունից հետո` զրկվեցել են նաեւ լույսից:

Հաշմանդամ, Ա. Վարդանյանը մեզ հետ զրույցում պատմեց, որ ապրում է խարխուլ, կիսանկուղային խոնավ (հիսունականներին կառուցած եթե կարելի ասել) տանը, որն ավելի շուտ նկուղ է հիշեցնում: Ունի բազմաթիվ առողջական խնդիրներ, չի կարողանում նորմալ տեղաշարժվել, ըստ այդմ էլ աշխատելն անհնար է դարձել:

Թեեւ նույնիսկ այդ իրավիճակում, պատրաստ է աշխատել, ընտանիքին պահելու համար:
Տեղեկացնենք նաեւ, որ այս պահին Արսենը գտնվում է Երեւանի հիվանդանոցներից մեկում, եւ ստացիոնար բուժում է ստանում թոքաբորբի դեմ: Եվ պատահական չէր, որ մեզ հետ զրույցի ընթացքում պարբերաբար հազում էր, ու հուզված պատմում. «Թոքաբորբով հիվանդանոցում պառկած եմ , իսկ ընտանիքս ամեն օր մի հարեւան-բարեկամի տանն են լուսացնում: Որովհետեւ զրկված են լույսից, եկել անջատել են` առանց հաշվի առնելու մեր վիճակը: Ես էլ հույս չունեմ լավի, հոգնել եմ լավը մտածելուց, աղջիկս: Այսօր ես էլ, ընտանիքս էլ՝ զրկված ենք ոչ միայն լույսից, այլ նաեւ հույսից» :

Արսենի խոսքով.«Դիմել եմ պատկան կառույցներին, անգամ ՄԻՊ-ին, որպեսզի որեւէ կերպ աջակցեն, օգնեն, բայց քար լռություն: Մեկը մյուսի վրա գցելով` ցրում են: Ում է պետք անօգնական, հաշմանդամ մարդը: Եթե ես կարողանայի աշխատել, բայց… »:

Արսենը ավելին խոսել չկարողացավ. մի կողմից նրան հազը չէր թողնում խոսել, մյուս կողմից էլ` հուզմունքը. «Ես տղամարդ եմ, հավատացեք, որ էսքան կարիքի մեջ չլինեի` չէի դիմի որեւէ մեկի օգնությանը»:

Հաշմանդամ Արսեն Վարդանյանի պատմությանը՝ առավել մանրամասն կանդրադառնանք   հաջորդիվ: 

NewsMedia.am

Լուրեր Հայաստանից եւ աշխարհից