«ԱրմենՏել» ընկերությունը պարգեւատրեց երեւանյան հեռախոսակապի հարյուրամյակին նվիրված մրցույթի հաղթողներին

«ԱրմենՏել» ընկերությունն (ապրանքանիշը Beeline) ամփոփեց «Հեռախոսակապը սերունդների կյանքում» խորագրով մրցույթի արդյունքները: Մրցույթը նվիրված էր երեւանյան հեռախոսակապի հարյուրամյակին եւ իրականացվում էր լուսանկար, էսսէ եւ կարճ պատմվածք անվանակարգերում:

Հյուսիսային պողոտայում գտնվող Beeline վաճառքի եւ սպասարկման գրասենյակում «ԱրմենՏել» ընկերության Գլխավոր տնօրեն Անդրեյ Պյատախինը պարգեւատրեց մրցույթի հաղթողներին: Հատուկ հանձնաժողովի կողմից յուրաքանչյուր անվանակարգում հաղթող աշխատանքների հեղինակներ՝ Դավիթ Յավրյանը (կարճ պատմվածք), Նվարդ Մինասյանը (լուսանկար) եւ Վալերիա Ղաբուզյանը (էսսէ) որպես մրցանակ ստացան Samsung Galaxy Note 10.1 (N8000) պլանշետներ:

Facebook սոցիալական ցանցի Beeline Armenia խմբի պաշտոնական էջում կայացած քվեարկության արդյունքում Արարատ Գուլանյանի աշխատանքն արժանանացավ ֆեյսբուքի երկրպագուների համակրանքին եւ պարգեւատրվեց հատուկ մրցանակով՝ ILIFE WTAB 704 DC պլանշետով:

Մրցույթի եզրափակիչ փուլ անցած մյուս ութ մասնակիցները ստացան խրախուսական մրցանակներ Energy System Media Tablet S7 պլանշետներ:

«ԱրմենՏել ընկերության անունից սրտանց շնորհավորում եմ մրցույթի հաղթողներին, ովքեր յուրովի ներկայացրեցին մայրաքաղաքի հեռախոսակապի զարգացման հարյուրամյա պատմությունը՝ ցուցաբերելով ստեղծագործական մոտեցում եւ վառ երեւակայություն: Մենք հպարտ ենք, որ հանդիսանում ենք երեւանյան հեռախոսակապի դարավոր պատմության կրողը եւ անչափ ուրախ, որ մրցույթը մեծ հետաքրքրություն առաջացրեց հատկապես երիտասարդների շրջանում, քանի որ հենց նրանք են մեզ հետ միասին կերտելու այս պատմության շարունակությունը: Եղեք ավելի ակտիվ, ստեղծագործ եւ նախաձեռնող, իսկ մենք կշարունակենք աջակցել այնպիսի ծրագրերի, որոնք կօգնեն փոխել մարդկանց կյանքը դեպի ավելի լավը», - նշեց «ԱրմենՏել» ընկերության Գլխավոր տնօրեն Անդրեյ Պյատախինը:

Նշենք, որ «Հեռախոսակապը սերունդների կյանքում» խորագրով մրցույթ մեկնարկել էր սույն թվականի սեպտեմբերի 19-ին: Ընդհանուր առմամբ, մրցույթին ներկայացվել է ավելի քան 150 աշխատանք: