Ալիևը պետք է կարողանա պատասխանատու լինել ոչ միայն իր հասարակության, այլ նաև միջազգային հանրության առջև

Ադրբեջանի հակաօրինական եւ հակամարդկային քայլերը հատել են բոլոր թույլատրելի սահմանները: Հարեւան պետության նախագաhն անճարունակությունից ոտք ու ձեռք ընկած Twiter-յան գրառումների է անցել, հավանաբար մոռանալով, որ նա երկրի առաջին դեմքն է, եւ որ յուրաքանչյուր բառի եւ ստորակետի համար պատասխան է տալու ոչ միայն ինքը, այլ նաեւ ողջ ադրբեջանական ժողովուրդը: Ինչեւէ, վաղը Սոչիում տեղի կունենա Սարգսյան-Ալիև հանդիպումը, որի վերաբերյալ էլ, Fnews.am-ը զրուցեց ԱԺ արտաքին հարաբերությունների մշտական հանձնաժողովի նախագահ, ՀՀԿ խմբակցության պատգամավոր Արտակ Զաքարյանի հետ.
-Պարոն Զաքարյան, Սոչիում կայանալիք հանդիպումից ի՞նչ ակնկալիքներ կարելի է ունենալ, արդյո՞ք այդ հանդիպումը կթեթեւացնի սահմանում տիրող լարված իրավիճակը:
-Ակնկալիքները բնականաբար կապված են լինելու առաջին հերթին բանակցային գործընթացի հետագա ընթացքից եւ այն սպասումներից, որ խաղաղ կարգավորման գործընթացը պետք է շարունակվի: Ամենակարեւոր ակնկալիքն այն է, որ ի վերջո Ադրբեջանը պետք է հասկանա, որ հնարավոր չէ խաղաղ կագավորման բանակցային գործընթաց վարել առանց վստահության մթնոլորտի ապահովման եւ պահպանման: Իսկ այն գործողությունները, ոտնձգությունները, դիվերսիաները եւ այն հետախուզական քայլերը, որոնք իրականացնում է Ադրբեջանի զինված ուժերը, սահմանի ողջ երկայնքով, դրանք բնականաբար չեն կարող վստահության մթնոլորտ ձեւավորել եւ ինքնին բանակցային գործընթացի խոչընդոտում է դառնում: Կարծում եմ, որ Ալիևը պետք է կարողանա նաեւ պատասխանատու լինել ոչ միայն իր հասարակության, այլ նաեւ միջազգային հանրության առջեւ, որովհետեւ ցանկացած նոր բախում, ցանկացած լարվածություն անմիջական սպառնալիք է լինելու ողջ տարածաշրջանի համար եւ խոչընդոտելու է տարբեր երկրների շահերին:
-Արդյո՞ք միջազգային հանրությունն այսուհետ անլուրջ չի վերաբերվի Ալիևին, նրա կողմից կատարած Twitter-յան վերջին գրառումից հետո:
-Այսօր արդեն տարբեր միջազգային հեղինակավոր լրատվամիջոցներ անդրադարձել են Ալիևի գրառումներին եւ տարօրինակ կերպով են բնութագրել այդ հայտարարությունները, քանի որ դրանք ինքնին ապացուցում են մի հանգամանք, որ Ադրբեջանն է սպառնալիք հանդիսանում եւ Ադրբեջանն է շարունակ ոտնձգությունների դիմում, խախտելով հրադադարի կանոնը, դեպի խաղաղության տանող գործընթացի տրամաբանությունը: Այնինչ ադրբեջանական լրատվամիջոցները պարբերաբար փորձում են այդ գործողություններում մեղադրել Հայաստանին: Ալիևի գրառումներն ապացույց է, որ Ադրբեջանն է խախտում բոլոր տեսակի պայմանավորվածությունները: Առնվազն տարօրինակ են այս քայլերը, որոնք չեն բխում առաջին իսկ հերթին Ադրբեջանի շահերից:
-Այսքանից հետո, վերջիվերջո միջազգային հանրությունն Ադրբեջանին որպես ագրեսոր երկիր կպիտակավորի՞:

-Ադրբեջանական ագրեսիան վաղուց ակնհայտ է, եւ մեր տարածքների որոշ մասը դեռեւս գտնվում է ադրբեջանական օկուպացիայի ներքո, բացի այդ ադրբեջանական հակահայկական հիստերիան ագրեսիայի տիպիկ նկարագիր է: Միջազգային հանրության արձագանքներում պետք է նաեւ դա նկատելի լինի այն առումով, որ Ադրբեջանն է միակ հասցեատերը, որին պետք է հանդարտության եւ խաղաղության կոչեր արվեն:

Սոսե Չանդոյան