ԼՂՀ-ն, եզդիներին սեփական տարածքում ապաստան տալով, կարող է բարձրացնել սեփական հեղինակությունը միջազգային ասպարեզում

Հայկ Սահակյանն իր ֆեյսբուքյան էջում գրում է.

ԼՂՀ Նախագահի մամուլի քարտուղար Դավիթ Բաբայանը այսօր հայտարարել է, որ իրենց ուժերի ներածի չափով պատրաստ են օգնել եղբայրական եզդի ժողովրդին, որն այս օրերին ցեղասպանության է ենթարկվում Իրաքի հյուսիսում իսլամիստների կողմից: Նա նաև նշել է, որ եթե եզդիները Արցախ տեղափոխվելու խնդրանքով դիմեն իրենց, ապա իրենք պատրաստակամ են օգնել նրանց, քանզի եզդի ժողովուրդը դարձել է մեր պատմության ու ճակատագրի մի մասնիկը: Ինչ խոսք, ողջունելի քայլ է: Այն, որ եզդիները դարեր շարունակ մեզ հետ ապրել են մեր տարածաշրջանում և մեր ծանր պահերին մեր կողքին կանգնած են եղել, դրանում կասկած չկա: Եվ մենք պարտավոր ենք մեր ուժերի ու ներկայիս հնարավորությունների ներածի չափով օգնել եղբայր եզդիներին:
Արցախում եզդի փախստականներին բնակեցնելու ու ապաստան տալու հնարավորությունը խնդրահարույց հարց է: ԼՂՀ-ն, լինելով միջազգայնորեն չճանաչված պետություն, եզդիներին սեփական տարածքում բնակեցնելու ու ապաստան տալու շնորհիվ կարող է բարձրացնել սեփական հեղինակությունը միջազգային ասպարեզում, և այդ քայլը իր հերթին կարող է բուռն քննարկման առարկա դառնալ: Չի կարելի բացառել նաև հենց Ադրբեջանի հետ այս հարցում առճակատման հեռանկարը: Այն, թե արդյոք եզդիներին ապաստան տալը ու բնակեցնելը Արցախում, թե Հայաստանի Հանրապետությունում է նպատակահարմար սոցիալ-տնտեսական տեսանկյունից ելնելով, այլ հարց է: Սակայն այստեղ այլ բան կա: Հարցն այն է, որ ԼՂՀ-ն, իրեն համարելով անկախ ու ինքնիշխան պետություն, փորձում է ինքը իր անունից գործել ու յուրովի, որպես առանձին սուբյեկտ, օգնություն ցույց տալ եզդիներին: Եվ սա տրամաբանական ու ստրատեգիական ճիշտ քայլ է Արցախի կողմից:
Ինչևէ, հուսանք, որ եզդիների հանդեպ իրականացվող կոտորածները կկանխվեն ու մեծ չափերի չեն հասնի: Իսկ մենք հնարավորինս աշխատենք օգնել ծանր դրության մեջ հայտնված մեր եղբայր եզդի ժողովրդին: