Ես բիզնեսներ ունեմ… Հրազդանի քաղաքապետը Փարիզում բնակարան ունենալու եւ իր շքեղ ավտոմեքենաների մասին

Շրջանառվող լուրերի համաձայն, Հրազդանի քաղաքապետ Արամ Դանիելյանը վերջերս բնակարան եւ գերշքեղ ավտոմեքենա է գնել Փարիզում: Ճշտելու համար, թե որքանո՞վ են այդ տեղեկությունները համապատասխանում իրականությանը, Fnews.am-ը զրուցեց քաղաքապետի հետ.
-Պարոն Դանիելյան լուրեր են պտտվում այն մասին, որ վերջերս Դուք Փարիզում բնակարան եւ մեքենա եք ձեռք բերել, արդյո՞ք դրանք համապատասխանում են իրականությանը:
-Ես բամբասանքներին չեմ հավատում, տենց բաներ մի հարցրեք, դրանք բամբասանք են: Ես չեմ հավատում տենց բաներին… ուրի՞շ:
-Դուք չե՞ք հավատում նման բաներին, թե՞ իրոք Փարիզում տուն ու մեքենա չունեք:
-Ոչ: Այսինքն ես մի հատ մեքենա իրավունք չունե՞մ ունենալ: Մի հատ մեքենա ունեմ, էն էլ այստեղ: Լավ, հետո կզանգեք տեղս հարմար չի:
-Մի քանի ճշտում եւս, եւ կավարտենք հարցազրույցը… Իսկ առհասարակ արտերկրում շքեղ առանձնատուն ունե՞ք, թե ոչ:
-Արտասահմանում տուն չունեմ: Դուք չհասկացա՞ք, որ տեղս հարմար չէ:
-Իսկ ինչո՞ւ եք բորբոքվում:
-Որովհետեւ դու հարցերի շարան ես տալիս: Ասեցիր մեկ հարց, վեց հատ հարց ես տալիս:
-Դե լավ երկու հարց էլ Ձեր քաղաքի հետ կապված… Հրազդանի կենտրոնական հրապարակը ի՞նչ վիճակում է գտնվում. շինարարական աշխատանքներն ավարտվե՞լ են, թե դեռ ընթացքի մեջ են:
-Այս տարի արդեն վերջացնում ենք:
-Իսկ ինչու՞ այդքան ձգձգվեցին այդ աշխատանքները:
-Դե գումարների հետ ա կապված:
-Այսինքն հրապարակի կառուցման համար բավարար գումարներ չե՞ն տրամադրվում:
-Դա բյուջեի հաշվին ա կատարվում, տեղական բյուջեի, որի հետ կապված մենք առաջնային գործեր ունենք՝ մանկապարտեզ, երաժշտական դպրոցներ: Ծախսերը դրանց վրա ենք անում, հետո, երբ կավելանան` հրապարակի վրա կծախսենք:
-Ասում են նաեւ, որ քաղաքի գրադարանները բավական անմխիթար վիճակում են գտնվում:
-Մեր քաղաքը միակն է, որն ունի յոթ հատ գրադարան,իսկ դրա պահպանման համար մեծ ծախսեր են պետք ու մենք պահպանում ենք:
-Իսկ տարեկան կտրվածքով, քաղաքապետարանի բյուջեն որքա՞ն է կազմում:
-980 մլն դրամ՝ ֆոնդային եւ վարչական բյուջեն իրար հետ միասին: Դրա 60% աշխատավարձին է գնում: Մնացած տոկոսը գնում է տնտեսական ծախսերի վրա. էներգիայի, մանկապարտեզների պահպանման: Բայց դուք ոնց որ վերջացրեցիք հա՞ ձեր հարցերը:
-Ոչ, հարցերս չավարտվեցին: Կասեք, թե ի՞նչ միջոցներով եք արտասահմանյան մեքենա վարում: Ի դեպ ասում են շքեղ մեքենաների լայն տեսականի ունեք…
-Ես բիզնեսներ ունեմ…հերիք ա բան անես, հարցեր տաս…(ու անջատեց հեռախոսը):

Ի դեպ, Հրազդանի քաղաքապետ Արամ Դանիելյանը, ով քաղաքական դաշտում առավել մեծ հավակնություններ ու ամբիցիաներ ուներ, ընդհուպ Կոտայքի մարզպետի աթոռը զբաղեցնելու, ( ի միջի այլոց գործարար Բարսեղ Բեգլարյանի`ֆլեշ Բարսեղի «թեւի» տակ հանգրվանելով ), այդպես էլ իր մուրազին չհասավ:
Դրանից հետո, քաղաքապետ Դանիելյանը դարձյալ երազանքների գիրկն ընկնելով փորձեց տիրանալ Կոտայքի մարզի Կաքավաձոր համայնքում գտնվող հանքին, ինչն էլ դարձյալ մեծ հաջողությամբ չպսակվեց, ու մնում էր այսքանից հետո բարգավաճած քաղաքապետը մտածեր քաղաքի հրապարակը կառուցելու, քաղաքի գրադարանները պահպանելու ու իր քաղաքը շենացնելու մասին:
Այստեղից մնում է հետեւություն անել, որ նա որոշել է քաղաքն ամբողջությումբ անտարբերության մատնել, երազելով Փարիզն ու ֆրանսիական հաճույքները:
Փաստորեն Կոտայքի մարզի գերքաշային ֆեոդալը ով մշտապես փորձում է ամենակարող ու «կրուտոյ» երեւալ , երբ իր քիմքին ոչ հարիր հարցեր է լսում, ձեռքը գցում է հանրագիտարաններին եւ սկսում բարոյախրատական դասեր կարդալ: Վարժապետական հակումներ ունեցող սույն իշխանիկին հարկ է հիշեցել, որ ինքը ընտրովի մարմին է, եւ որ նրան «ընտրել» է ժողովուրդը, եւ որ նա պարտավոր է բացառապես ներկայացնելու իր ընտրողների շահերը, այդ թվում պատասխանելով նաեւ ԶԼՄ-ներին հետաքրքրող հարցերին: Ինչպես նաեւ պարտավոր է լսելու իր բնակչին հուզող խնդիրների ու պրոբլեմների մասին, քանի որ այդ ժողովրդի <մեջքով> է, որ տարիներ շարունակ քաղաքապետը բազմել է իր գահին ու ձայնը տաք-տաք տեղից է հանում: Մինչդեռ ընտրությունից ընտրություն նույն քաղաքապետը <կակ  միլինկի> պրիզնատ  է գալիս այդ նույն ընտրողին ու ձեռք ու ոտք ընկնելով մի բուռ ձայն է խնդրում քաղաքի ղեկավար <պոստում` կարաուլ> կանգնելու համար:

Այնպես որ մերօրյա պարոնին խորհուրդ ենք տալիս, որ իր դասերն առաջինն անցկացնի իր մտերիմ շրջապատի հետ՝ խոսքը վերաբերում է լրջագույն դասերին, այլ ոչ թե նեղ կոլեկտիվային ուտուշ-խմուշների, խնջույքների ու խրախճանքների ժամանակ, ի ցույց դնի իր կարողություններն ու «շնորհները» :Ինչ վերաբերում է նրան, որ քաղաքապետն արտերկրում ունի առանձնատներ, թե՝ ոչ, ապա այդ չինովնիկը ճիշտ կանի իր մերձավոր շրջապատում գլուխ չգովա չեղած բաների մասին:
Չնայած որ իր իսկ ղեկավարած Հրազդան քաղաքում շատերն են խոսում այն մասին, որ քաղաքապետ Դանիելյանը օրը մեջ մի շքեղ արտասահմանյան մակնիշի մեքենայով է ժամանում քաղաքապետարան, քանի որ քաղաքապետը սկսել է իր մքենաների ոճն ու գույնը համադրել իր հագ ու կապի հետ. Էստեղ են ասել. Քաղաքապետ ունենք, աշխարհը չունի...

Սոսե Չանդոյան