Իշխանությունը բավականին լուրջ ձեռնոց է նետել ընդդիմությանը ու վերջիններիս չի հաջողվում դրան պատասխանել. Ստյոպա Սաֆարյան

Tert.am-ը գրում է.«Միջազգային և անվտանգության հարցերի հայկական ինստիտուտի» հիմնադիր նախագահ Ստյոպա Սաֆարյանը գտնում է, որ իշխանությունը բավականին լուրջ ձեռնոց է նետել ընդդիմությանը մի քանի առումներով, իսկ ընդդիմադիր կուսակցություններին այդքան էլ չի հաջողվում դրանց պատասխանելու հարցում:

Ըստ նրա՝ ընդդիմության բացատրությունները, թե ինչու չեն մասնակցում սահմանադրական բարեփոխումների գործընթացներին, լայն մասշտաբների համար համոզիչ չեն: «Մյուս կողմից խնդիր է նաև մտնել գործընթացի մեջ այն հայտարարություններից հետո, երբ ասվել է, որ չեն մասնակցելու: Ի սկզբանե ճիշտ կլիներ, որ ընդդիմադիր քաղաքական ուժերը այդքան կտրուկ չդնեին գործընթացին չմասնակցելու խնդիրը»,- ասաց նա:

Ըստ նրա՝ բարեփոխման գործընթացը քննարկել չի նշանակում իշխանությունների հետ գործարքի գնալ կամ համագործակցել: «Խոսքը ամենևին համագործակցության մասին չէ, այլ սեփական առաքելության մասին է»,- ասաց նա և ավելացրեց, որ ընդդիմությունը կարող էր լքել գործընթացը, եթե իր առաջարկները չընդունվեին:

«Ցավոք, ընդդիմության որդեգրած գործելաոճը ամենևին արդյունավետություն չի ապահովել»,- ասաց նա:

Tert.am-ի հարցին, թե գուցե ընդդիմությունը հակափաստարկներ չունի, ինչպես ասել է ՀՀ նախագահ ՍերԺ Սարգսյանը, և դրա համար բովանդակային քննարկումներին չի մասնակցում, առավել ևս, որ փոփոխությունների մեջ կան առաջարկներ, որոնք հենց ընդդիմությունն է առաջ քաշել, Ստյոպա Սաֆարյանն ասաց. «Այս իրավիճակում իշխանության որդեգրած ռազմավարությունն իր շահերից ելնելով շատ ավելի տրամաբանված է, որովհետև նա առաջարկում է երկու տարբերակ՝ կամ մնալ նույնը, կամ փոփոխել Սահմանադրությունը այն ձևով, ինչ ձևով աշխատանքային խումբը կներկայացնի: Իշխանությունը բավական լավ հաշվարկված գործընթաց է սկսել՝ բռնելով այն գաղափարը, որն ընդդիմությունն է առաջ քաշել»:

մանրամասները՝  սկզբնաղբյուրում: