Մասնագետները մսի գնանկում են կանխատեսում՝ անասնակերի պակասի հետևանքով սպասվելիք հարկադիր մորթի արդյունքում

Tert.am-ը գրում է.Գյուղատնտեսական տարին չորային էր, գյուղացիները չեն հասցրել բավարար չափով անասնակեր կուտակել և հարկադրաբար ստիպված կլինեն զանգավային մորթ իրականացնել, ինչն էլ, մասնագետների և ֆերմերների կանխատեսումներով, կհանգեցնի խոշոր և մանր եղջերավոր կենդանիների մսի գնանկման:

 Գեղարքունիքի մարզի Ձորագյուղ համայնքի ղեկավար Լևիկ Գրիգորյանը Tert.am-ի հետ զրույցում իր մտահոգությունները հայտնեց՝ ասելով, որ այսօր հրատապ խնդիրներից հիմնականը մթերումն է:

«Իմ աշխատած տարիների ընթացքում, իսկ ես աշխատում եմ արդեն 16 տարի, բավականին խնդիրներ ենք լուծել, ծրագրեր ենք իրականացրել համայնքում, բայց մի շարք խնդիրներ դեռ լուծման կարիք ունեն: Այս պահին մենք ունենք բավականին անասնագլխաքանակ, այսօր ավելցուկ ավելի շատ ունենք»,-ասաց նա՝ հույս հայտնելով, որ պատկան մարմինները կլուծեն այդ խնդիրը, որպեսզի գյուղացիները կարողանան իրենց ապրանքն իրացնել նաև Հայաստանից դուրս:

Գյուղապետը բարձրաձայնեց նաև խնդիրը, որ սեզոնին անասունները մնում են յայլաներում՝ առանց փարախի: Մեկ փարախ ունեն, բայց դա 1500-2000 գլուխ խոշոր և 2000 գլուխ մանր եղջերավոր անասուններ ունեցող համայնքի համար դա շատ քիչ է: «Բնականաբար պետք են փարախներ, որպեսզի այսօր այդ արոտները լիովին օգտագործվեն, որովհետև դեռ հոկտեմբեր ամիսը չկա, բայց սարերում ջերմաստիճանը ցածր է, հնարավոր չէ արոտները լիովին օգտագործել»,-ասաց նա:

Իսկ մթերման խնդրի մասին գյուղապետն ավելացրեց, թե ակնկալում են, որ բոլոր մարզերում լինեն սպանդանոցներ: «Եթե դրանք լինեն, այդ խնդիրները ոչ միայն Ձորագյուղում, այլ նաև ամբողջ երկրում կլուծվի»,-ասաց նա:

Նույն մարզի Գեղարքունիք համայնքի ղեկավար Կարապետ Ասատրյանի կանխատեսմամբ՝ այս տարի հնարավոր է անասնագլխաքանակի հարկադիր մորթ կատարվի, որովհետև երաշտի պատճառով գյուղացիներն անասնակերի բավարար քանակ չկարողացան հավաքել: «Այս պահի դրությամբ անասնակերի պաշարները բավարար չեն ձմռան համար: Բոլոր դեպքերում հարկադիր մորթ կկատարվի»,-ասաց նա:

Վերջինս նաև նշեց, որ գեղարքունիքցիները շարունակում են իրենց հիմնական եկամուտը ստանալ արտագնա աշխատանքի միջոցով: Գյուղում մնացողներն էլ անասնապահությամբ են զբաղվում, և եթե երաշտ տարի չլիներ, տարին կարելի էր համարել հաջող:

Մսի հնարավոր գնանկում կանխատեսեցին նաև ոլորտի մասնագետները: «Իրազեկ և պաշտպանված» ՀԿ նախագահ Բաբկեն Պիպոյանը խոզի մսի մասով կանխատեսեց լուրջ գնանկում՝ պայմանավորված սպառման նվազմամբ: «Դեռևս նախորդ տարի, երբ կերի հետ կապված խնդիր կար և գյուղացին չէր կարողանում խոզ պահել, գրանցվեց մեծ քանակությամբ մորթ, և եղավ էական գնանկում: Դրանից հետո մի փոքր դեֆիցիտ առաջացավ, հիմա եկել է այն ժամանակը, երբ նորից թարմ մսի սպառման ծավալները սպառվում են, ինչ արդյունքում սպասվում է 400-500 դրամի գնանկում»,-ասաց նա:

Վերջինիս ներկայացմամբ՝ տավարի մսի մասով տեղական շուկան միշտ եղել է սպեցիֆիկ: Այսօր կա մեծ ծավալի ներկրված միս, դրա համար տավարի մսի գնաճ չի կարող լինել:

«Բնականաբար, անասնակերի հետ կապված, երբ կերի խնդիր է առաջանում, գյուղացին ստիպված մորթ է իրականացնում, և ստիպողաբար իրականացված մորթը բերում է գնանկման,-ասաց նա,–վատատեսական կանխատեսումներ չեմ ուզում անել, բայց այս պահին կանխատեսում եմ, որ առաջիկա մեկ ամսվա ընթացքում խոզի միսն օր օրի կընկնի, իսկ տավարի մսի մասով հնարավոր կլինի ճշգրիտ գնահատել գնի տատանումները, երբ կենդանիները արոտներից տեղափոխվեն գոմեր»:

«Հայաստանի ագրարագյուղացիական միավորում» ՀԿ նախագահ Հրաչ Բերբերյանը ևս հաստատեց, որ մսի էժանացման միտում կա: Վերջինս մտահոգություն հայտնեց ոչխարի մսի գնանկման շուրջ: «Այսօր էլ մենք ունենք ոչխարի մսի գնանկում»,-ասաց նա:

Ինչ վերաբերում է խոշոր եղջերավորների գլխաքանակի ավելացմանը, Բերբերյանը նկատեց, որ եթե աշնանը կաթի արտադրությունն ավելանա, արդեն կերևա գլխաքանակի ավելացումը. «Մի գյուղում կարող է ավելացած լինել գլխաքանակը, մեկ այլ գյուղում ոչ: Դեռ այսօր անցած տարվա համեմատ մոտ 150 դրամի չափով գինն ավել է»:

մանրամասները` սկզբնաղբյուրում: