Էլեկտրաէներգիայով պայմանավորված՝ ձվի, թռչնամսի ինքնարժեքը թեև թանկացել է, սակայն գնի բարձրացում դեռևս չի սպասվում

Tert.am-ը գրում է.Արտադրությունները գնալով աշխատում են վնասով, ձվի ինքնարժեքը թանկացել է։ Այս մասին Tert.am-ին հայտնեց «Հայաստանի թռչնաբույծների միության» նախագահ Սերգեյ Ստեփանյանը՝ հավելելով, որ դրա պատճառը էլեկտրաէներգիայի թանկացումն է։

«Էլեկտրաէներգիան և գազը մեր ամենամեծ ծախսերի հատվածում ամենաառաջնային տեղն են գրավում»,- ասաց նա և ավելացրեց, որ հնարավոր չէ արտադրությունները երկար ժամանակ վնասով աշխատեն, քանի որ կփակվեն։

Հարցին, թե դա կարող է հանգեցնել ձվի գնի թանկացմանը, նա պատասխանեց, որ աշխատում են, որ դա տեղի չունենա։ Ստեփանյանը նկատեց, որ շուկայում մենաշնորհային դիրքը չարաշահելու խնդիր չկա։

«Ելքն այն է, որ հավասար դաշտ ստեղծվի բոլորի համար՝ այդ թվում նաև բնական մոնոպոլիա ունեցողների նկատմամբ։ «Գազպրոմը», «Հայկական էլեկտրացանցները», Հարավկովկասյան երկաթուղին» դրանք բոլորը մոնոպոլ են, և երբ ցանկանում են փոփոխում են իրենց կողմից սահմանված գները, ինչը բիզնես դաշտում անընդունելի է»,-ասաց նա։

Անդրադառնալով շուկայի պահանջարկին՝ Սերգեյ Ստեփանյանը հայտնեց, որ արտադրությունները պահանջարկին լիովին բավարարում են՝ ի տարբերություն նախորդ տարվա, երբ 8 միլիոն ձու ներկրվեց հանրապետություն։ «Այս տարի մենք խնդիր չենք ունենալու, դեֆիցիտ չի լինի, քանի որ բոլորն ունեն այնքան գլխաքանակ, որ մինչև հունվարի 1-ը դեֆիցիտ չի լինի։ Ածանների գլխաքանակն այնքան է, որ հերիքում է շուկայի ու նախատոնական պահանջարկը բավարարելու համար»,- ասաց նա։

«Նուբարաշենի» թռչնաբուծական ֆաբրիկայի տնօրեն Գագիկ Մակարյանը նշեց, որ եթե էլեկտրաէներգիան թանկացել է, բնականաբար կթանկանա նաև տեղական արտադրանքի ինքնարժեքը, ինչն էլ կունենա իր հետևանքները։

Նա նշեց, որ իրենք միայն թռչնի մսի արտադրանքով են զբաղվում և թեև հիմա վնասով չեն աշխատում, սակայն օգուտ էլ չեն ունենում։

«Մսի արտադրությունը էներգատար արտադրություն է, և բնականաբար էլեկտրաէներգիա շատ է օգտագործվում, իսկ եթե շատ է օգտագործվում, նշանակում է, որ արդեն իր ազդեցությունը կունենա»,- ասաց նա և ավելացրեց, որ թեև մսի ինքնարժեքը 2 տոկոսով կթանկանա, սակայն մսի գնի թանկացում չեն նախատեսում։

մանրամասները՝ սկզբնաղբյուրում