Վայոց ձորում խաղողի մթերումը շուտով կավարտվի, մթերման միջին գինը 230 դրամ է. գյուղատնտեսության փոխնախարար

Այսօրվա դրությամբ Վայոց ձորի մարզում մթերվել է 1450 տոննա խաղող, ներկա պահին մթերման աշխատանքներ շարունակվում են Աղավնաձոր համայնքում: Կնքված պայմանագրերով մթերումն իրականացվում է միջինը 230 դրամով: Այս մասին ասաց ՀՀ գյուղատնտեսության փոխնախարար Ռոբերտ Մակարյանը:

«Արենի տեսակի խաղողի գինը միշտ էլ բարձր է եղել: Անցած տարի միջին գինը եղել է 220 դրամ: Բերքի ծավալների առումով էլ նախորդ տարվա համեմատ տարբերություններ առանձնապես չկան»,-ասաց նա:

Վերջինիս փոխանցմամբ՝ խոշոր ծավալով մթերումներ իրականացնում է «Արմենիա վայն» գործարանը, ինչպես նաև մթերումներ է իրականացնում «Սպայկա» ընկերությունը՝ արտահանման նպատակով: Կան նաև փոքր ծավալներով մթերողներ: «Առաջիկա 7-8 օրվա ընթացքում ամբողջությամբ եղած բերքը կմթերվի: «Սպայկան» մթերում է 220-240 դրամով՝ կախված որակից: Միջին գինը 230 դրամն է»,-ասաց նա:

Փոխնախարարը նաև նշեց, որ այսօր Վայոց ձորի մարզի Աղավնաձոր համայնքում մարզպետի հետ խորհրդակցություն է տեղի ունեցել և ձեռք է բերվել պայմանավորվածություն, որ ամբողջ բերքը պետք է մթերվի: