Այդ հանրահավաքի մեխը պետք է լինի Գագիկ Ծառուկյանի ելույթը` Նախագահի ապագա թեկնածուի դիտանկյունից. Ստյոպա Սաֆարյան

Tert.am-ը գրում է. 
Հոկտեմբերի 10-ից հետո ԲՀԿ բազմաթիվ անդամներ իրենց հրապարակային ելույթներում արել են հայտարարություններ, թե պետք չէ սպասել, որ 1-2 հանրահավաքով խնդիր է լուծվելու: Այս մասին Tert.am-ի հետ զրույցում ասաց «Միջազգային անվտանգության հարցերի ինստիտուտ» ՀԿ նախագահ Ստյոպա Սաֆարյանը` անդրադառնալով եռյակի՝ հոկտեմբերի 24-ին նախատեսված հանրահավաքին, մասնավորապես՝ ԲՀԿ առաջնորդ Գագիկ Ծառուկյանի խոստացված ելույթին:

«Այսինքն՝ հստակ շարունակվել է Տեր-Պետրոսյանի ասածը, որ սա տևական պայքար է լինելու, հետևաբար թող որևէ մեկը արագ բան չսպասի հոկտեմբերի 24-ի հանրահավաքից: Այդ հանրահավաքի մեխը պետք է լինի Գագիկ Ծառուկյանի ելույթը՝ ապագա թեկնածուի դիտանկյունից»,-ասաց Ստյոպա Սաֆարյանը և հիշեցրեց, որ հոկտեմբերի 10-ի հանարահավաքից երկու օր առաջ Գագիկ Ծառուկյանը հայտարարել է Նախագահի թեկնածու լինելու պատրաստակամության մասին:

Ինչ վերաբերում է եռյակի մյուս քաղաքական ուժերին, ապա Ստյոպա Սաֆարյանը նկատեց, որ նրանք չեն խոսել իրենց հավակնությունների մասին: Ըստ նրա` հոկտեմբերի 24-ի հանրահավաքի ուշադրության արժանի խնդիրը պետք է լինի նաև այն, թե ինչպես է Գագիկ Ծառուկյանն արձագանքում Սահմանադրական փոփոխությունների խնդրին:

«Ժառանգությունը» և ՀԱԿ-ը հայտարարում են, որ արտաքին քաղաքական խնդիրներում ունեն տարաձայնություններ, որոնք երևում են հենց հարթակից, և, բնականաբար, կարելի է ենթադրել, որ եթե խոսքը Նախագահի թեկնածուի մասին է, ով ներկայացնում է արտաքին քաղաքական օրակարգը, հակասություններն անխուսափելի են »,-ասաց Ստյոպա Սաֆարյանը և նշեց, որ Հայաստանում ոչ մի բանի հավանականությունը պետք չէ բացառել, սակայն այդ դեպքում հարկ կլինի ասել, որ ՀԱԿ-ը և «Ժառանգությունը» ըստ էության՝ հրաժարվել են իրենց քաղաքական պաշտոնական գծից: