Հայաստանը մեծ առաջընթաց է ապրել մարդու իրավունքների պաշտպանության ոլորտում. ՄԱԿ-ի հայաստանյան գրասենյակի ղեկավար

Հայաստանը նկատելի առաջընթաց է արձանագրել մարդու իրավունքների պաշտպանության ոլորտում: Այս մասին «Ազատություն» ռադիոկայանի «Ֆեյսբուքյան ասուլիսին» հայտարարեց ՄԱԿ-ի հայաստանյան գրասենյակի մշտական համակարգող Բրեդլի Բուզետոն, ում լրատվամիջոցը հյուրընկալել էր:

«Հայաստանը մեծ առաջընթաց է արձանագրել մարդու իրավունքների պաշտպանություն ոլորտում, և սա կարելի ասել՝ մի շարք համեմատականներ անցկացնելով բավականին մեծ թվով, այդ թվում՝ հարևան երկրների հետ։ Եվ նշեմ, որ առաջին անգամ ձեր Կառավարությունը ձևակերպել է մարդու իրավունքների վերաբերյալ գործողությունների համապարփակ ծրագիր»,-ասաց Բրեդլի Բուզետոն:

Ի պատասխան դիտարկման, որ այսքան խոսվում է հանրահավաքներին իրենց քաղաքական ու քաղաքացիական իրավունքների համար պայքարող մարդկանց հետապնդումների ենթարկելու մասին, և որ նրանցից շատերը դիմում են ընդհուպ մինչև Մարդու իրավունքների եվրոպական դատարան, ՄԱԿ-ի հայաստանյան գրասենյակ պատասխանատուն կրկին արձանագրեց. «Տասնամյակների ընթացքում մեծ առաջընթաց է արձանագրվել, որը չենք կարող անտեսել»։

Նա նշեց, որ քանի որ կան շատ կազմակերպություններ, որոնք ուղղակիորեն ու անմիջականորեն են զբաղվում մարդու իրավունքների պաշտպանությամբ, շատ չի ուզում ծանրանալ այդ իրավունքների վրա: Բայց նաև ՄԱԿ-ի պաշտոնյան ասաց, որ եթե մարդիկ բողոքում են, կարողանում են իրենց բողոքները հասցնել դատարան, նշանակում է, որ այս իմաստով որոշակի դրական մթնոլորտ կա երկրում:

Բրեդլի Բուզետոն նշեց, որ ՄԱԿ-ը աշխատում է ինչպես Հայաստանի Կառավարության , այնպես էլ քաղաքացիական հասարակության հետ՝ Հայաստանի առջև ծառացած մարտահրավերների լուծման ուղղությամբ:

Եվ համագործակցության ոլորտներ են՝ կայուն տնտեսական զարգացում, ժողովրդավարական պետական կառավարումն են փորձում խրախուսել, երրորդ ուղղությունը Կառավարությանն աջակցությունն է սոցիալական ծառայությունների մատուցման ուղղությամբ, իսկ չորրորդ ուղղությունը շրջակա միջավայրի պահպանությունն ու կայուն կառավարումն է:

Ըստ ՄԱԿ-ի պատասխանատուի, կոնկրետ մարդասիրական ուղղությամբ շատ կոնկրետ աջակցություն է սահմանել 12 000 սիրիահայի:

«Ցանկացած երկրում զարգացման ուղիներից մեկը աղքատության մակարդակի նվազեցումն է, մարդկանց համար աշխատեղերի ապահովումը»,-ասաց նա:

ՄԱԿ-ի հայաստանյան գրասենյակը աշխատում է փոքր ու միջին ձեռնարկատիրությունների զարգացման ուղղությամբ՝ այս շրջանակների հետ, գյուղական համայնքներում ծրագրեր է իրականացում սննդի վերամշակման, գինու արտադրության ոլորտում և զբաղվում խոցելի խմբերի հետ մասնագիտական կրթության հարցում աջակցության ծրագրերով։

ՄԱԿ-ի հայաստանյան գրասենյակի ղեկավարը նշեց, որ աշխատում են նաև Հայաստան եկած սիրիահայերի հետ: