Ազատեկի ոսկու հանքավայրում հայտնի չէ, թե ինչ աշխատանքներ են կատարվում և ինչ թույլտվության հիման վրա

Tert.am-ը գրում է. Վայոց ձորի մարզի Ազատեկի ոսկի-բազմամետաղ հանքավայրում ավելի քան 20 օր է` սկսվել են որոշակի աշխատանքներ: Ինչպես Tert.am-ի հետ զրույցում նշեց Ազատեկ համայնքի ղեկավարը՝ հանքավայրում «Վայք Գոլդ» ՍՊԸ-ի կողմից կատարվում են գունավոր մետաղների՝ հիմնականում ոսկու որոնողական աշխատանքներ, ինչի առիթով համայնքը պայմանագիր է կնքել ընկերության հետ՝ համայնքի սեփականություն հանդիսացող հողը ուսումնասիրության համար ընկերությանը տրամադրելու մասին:

«Նախկինում այստեղ աշխատանքներ չեն իրականացվել, ներկայումս ընդամենը ծակում են հողը ու իջնում են ներքևի շերտեր՝ մետաղներ փնտրելու»,-ասաց նա:

Ըստ ՀՀ էներգետիկայի և բնական պաշարների նախարարության կայքում տեղադրված տեղեկատվության՝ ընկերությունը ստացել է օգտակար հանածոների արդյունահանման նպատակով ընդերքօգտագործման իրավունք, սակայն վերջինիս անունը առկա չէ «Տեղեկատվություն 01. 07. 2014 թ. դրությամբ օգտակար հանածոների արդյունահանման նպատակով երկրաբանական ուսումնասիրության տրամադրված ընդերքօգտագործման իրավունքների մասին»՝ նախարարության կողմից տեղադրված ցուցակում:

Էներգետիկայի ու բնական պաշարների նախարարության հասարակայնության հետ կապերի բաժնից փորձեցինք տեղեկանալ՝ նախարարությունում տեղյա՞կ են, թե հանքավայրում ի՞նչ աշխատանքներ են ընթանում և մասնավորապես ի՞նչ հանքանյութ են փնտրում, սակայն այստեղ մեզ հորդորեցին հարցով դիմել գրավոր և խոստացան պատասխանել սեղմ ժամկետում:

Tert.am-ի հետ զրույցում բնապահպան Ինգա Զառաֆյանը չբացառեց, որ տարածքում իրականում ուրան են փնտրում՝ հիշեցնելով Գ. Պ. Ալոյանի հեղինակած՝ «Հայաստանի ռադիոակտիվ հումքի ռեսուրսային պոտենցիալը և նրա յուրացման հեռանկարները» գիտական աշխատությունը, որում նշվում է, թե մոտավորապես որքան են կազմում հանքում ուրանի պաշարները:

«Հանքը ներկայումս բաց չէ, բայց հանքանյութը բաց վիճակում է, որովհետև արդեն հանել են ծածկող շերտը և ամբողջ փոշին, որը տարբեր նյութեր է պարունակում, իջնում է շրջակա գյուղ ու քաղաք: Մարդիկ արդեն վախենում են իրենց առողջության համար՝ հաշվի առնելով ուրանի պարունակությունը, և տարածքի բնակիչները դեռ մեծերից գիտեն, որ հանքը ուրան է պարունակում»,-ասաց նա և ընդգծեց, որ «Վայք Գոլդ» ընկերությունն Էներգետիկայի ու բնական պաշարների նախարարության կողմից հանքի շահագործման լիցենզիա ստացել է 2012թ., սակայն որևէ բան չի արել, իսկ հիմա ինչ-որ անհասկանալի աշխատանքներ է սկսել, ինչն անօրինական է:

Բնապահպանության նախարարության բնապահպանական փորձաքննություն ՊՈԱԿ-ի տնօրենի տեղակալ Հենրիկ Գրիգորյանն էլ նշեց, որ Ազատեկում նախարարությունը ոսկու բազմամետաղային հանքավայրի շահագործման նախագծին դրական եզրակացություն է տվել դեռևս 2006թ., սակայն՝ «Արմենիա» ընկերությանը: Նա ընդգծեց, որ նախարարության կողմից տրված դրական եզրակացությունը ուժի մեջ կարող է լինել մեկ տարի, և եթե տվյալ ընկերությունը շահագործում չի իրականացնում, տրված եզրակացությունը ուժը կորցրած է ճանաչվում օրենքով:

«Մենք չենք տվել Ազատեկում երկրաբանահետախուզական աշխատանքներ իրականացնելու թույլտվություն, տվել ենք հանքարդյունաբերություն իրականցնելու լիցենզիա: Եթե իրենք 8 տարի ոչինչ չեն արել ու նոր են սկսել, ուրեմն մեր կողմից տրված լիցենզիան ուժը կորցրած է: Բայց թե իրականում ի՞նչ աշխատանքներ են իրականացվում այնտեղ, ես չեմ կարող իմանալ»,-ասաց նա:

Հարցին, թե հնարավոր համարո՞ւմ է, որ տարածքում ընկերությունը ուրան է փնտրում, պաշտոնյան պատասխանեց, որ նման դեպքում պարտավոր էին դիմել իրենց՝ փորձաքննություն իրականացնելու համար:

Բնապահպան Ինգա Զառաֆյանը չբացառեց, որ տարածքում իրականում ուրան են փնտրում։