Սպառողների մոտ կա անհանգստություն կարտոֆիլի թանկացման վերաբերյալ. ավելի մեծ քանակություններ են ձեռք բերում. գյուղփոխնախարար

Tert.am-ը գրում է. Այս պահի դրությամբ կարտոֆիլի գինը որոշ չափով գերազանցում է նախորդ տարվա գնային մակարդակը: Պատճառները տարբեր են. նախորդ տարվա նույն ժամանակահատվածի համեմատ շուրջ 12 000 տոննա ավելի կարտոֆիլ է արտահանվել հանրապետությունից: Tert.am-ի հետ զրույցում խոսելով կարտոֆիլի բարձր գնի մասին՝ այս մասին ասաց ՀՀ գյուղատնտեսության փոխնախարար Գառնիկ Պետրոսյանը՝ նշելով, թե բացի դրանից այս ժամանակահատվածում սպառման ծավալն է սկսել մեծանալ:

«Սպառողների մոտ կա անհանգստություն հետագա գների թանկացման վերաբերյալ և ավելի մեծ քանակություններ են ձեռք բերում ձմեռվա ամիսներին օգտագործելու համար»,-նշեց փոխնախարարը:

Նրա խոսքով՝ վերը նշված պատճառի հետ մեկտեղ նաև կա հակառակ գործընթացը. բարձրադիր գոտում կարտոֆիլագործները հետագայում ավելի թանկ գնով վաճառելու ակնկալիքով բավական լուրջ քանակություններ են պահեստավորել և փոքր քանակություններ են շուկա հանում:

Գառնիկ Պետրոսյանն ասաց, թե գյուղացիները հետագայում թանկ գնով վաճառելու ակնկալիք ունեն, քանի որ մեր հարևան երկրներում կարտոֆիլի բավական մեծ պահանջարկ կա:

«Մեծ պահանջարկ կա նաև Ռուսաստանում, եվրոպական երկրներում նույնպես կարտոֆիլի գնի աճ է նկատվում: Այս ամբողջ գործոններն իրենց ազդեցությունն են ունենում այսօրվա շուկայում գործող գների վրա»,-տեղեկացրեց Գառնիկ Պետրոսյանը:

Հարցին, թե էլի թանկացում սպասվո՞ւմ է, գյուղատնտեսության փոխնախարարը պատասխանեց. «Դժվար է ասել, ոչ ոք չի կարող ասել, թե ինչպիսին կլինեն զարգացումները, ինչ ծավալով հետագայում արտահանումները կընթանան: Շատ բան կախված կլինի նաև եղանակային պայմաններից, հասկանալի է, որ ավելի ցուրտ եղանակային պայմաններում արտահանումները մի քիչ ավելի դանդաղում են, փակ ճանապարհների պատճառով խնդիրներ են առաջանում: Այս պահին շատ դժվար կլինի կանխատեսումներ անել, թե հետագայում ինչպիսի փոփոխություններ տեղի կունենան»: