Ինչպես Վիկտոր Ցոյն էր երգում՝« մենք սպասում ենք փոփոխությունների», բայց ովքե՞ր պետք է այն անեն. Էդգար Բաղդասարյան

Կինոռեժիսոր, սցենարիստ, պրոդյուսեր Էդգար Բաղդասարյանը Tert.am-ի հետ զրույցում Հայաստանի ԵՏՄ անդամակցության մասին խոսելով ֆուտբոլի օրինակներով՝ ասաց. «Սա նման է նրան, որ մենք ուզենանք, որ Հայաստանը խաղա Անգլիայի, Իսպանիայի կամ Գերմանիայի չեմպիոնատներում, բայց իրականությունն այն է, որ մեր լիգան՝ Ղազախստանը, Ռուսաստանն ու Բելառուսն են: Մենք պատրաստ չենք և առայժմ չենք կարող խաղալ Եվրոպայում: Մենք Եվրոպա չենք: Բայց, կրկնում եմ՝ այսօր»:

-Պարո՛ն Բաղդասարյան, եռյակ՝ ԲՀԿ-ՀԱԿ-«Ժառանգություն» միավորման վերաբերյալ ի՞նչ գնահատական կտաք: Արդյո՞ք այն բնական երևույթ է և ի՞նչ գաղափար կամ գաղափարախոսություն է միավորում երեք ուժերին: Ըստ Ձեզ՝ ի՞նչ կարող են նրանք առաջարկել հանրությանը և արդյո՞ք այդ առաջարկի պահանջարկը կա:

-Մի քանի անգամ առիթ ունեցել եմ ասելու, որ Հանրապետական ու «Բարգավաճ Հայաստան» կուսակցությունների գաղափարախոսական պլատֆորմները միմյանցից բացարձակապես ոչ մի բանով չեն տարբերվում: Եթե, իհարկե, այնպիսի հզոր տեսողություն ունեք, որպեսզի կարողանաք այս քաղաքական ուժերի մոտ որևէ գաղափարախոսություն հայտնաբերել: Ըստ իս՝ այս հարցում առկա հասկացությունների տարընթերցման կամ շփոթելու խնդիր կա:

Բացատրեմ. ինչպես Վիկտոր Ցոյն էր երգում՝ «մենք սպասում ենք փոփոխությունների»: Դրանք հասունացել են, դրանք անհրաժեշտ են, այլևս անհնար է այսպես շարունակել: Սա հասկանում են նույնիսկ իշխանամերձ կերակրատաշտի մոտ հավաքված կարիերիստները, բայց միևնույն է՝ այս կատեգորիայի համար անձնական բարեկեցությունը վեր է ամեն ինչից: Սրանք մարդիկ են, որոնք բիզնեսը դիտարկում են որպես իշխանություն (ի դեպ, շարքային քաղաքացիները ևս իշխանությանը վերաբերում են որպես ամենաշահութաբեր բիզնեսի), և նույնիսկ այն ժամանակ, երբ նավը խորտակվում է ու կարող են խեղդվել բոլորը, նրանք փորձում են իրենց համար ճանկել ինչ-որ մի բան: Այնպես որ, Հայաստանում հասունացել է քաղաքական վեկտորի. սոցիալական աշխարհայացքի ու քաղաքական մտքի փոփոխությունների հարցը, բայց հարց է, թե ովքեր դա պետք է անեն: Նույն մարդի՞կ:

-Ի՞նչ սպասումներ ունեք եռյակի միավորումից՝ որպես ՀՀ քաղաքացի և արվեստագետ:

- Ես այստեղ ոչ մի միավորում չեմ տեսնում: Սա կավե ոտքերի վրա կանգնած մի «բերդ» է , (Коло́сс на глиняных ногах- սա թևավոր խոսք է, որով բնորոշվում է արտաքինից վեհաշուք ու հզոր, բայց էությամբ թույլ ինչ-որ բանը), որը կփլուզվի առաջին իսկ «սկվազնյակից»: Եվ սա նորից բիզնես պայմանավորվածություն է: Այնպես որ, բացարձակապես ոչ մի բան չեմ ակնկալում: Սրանք վարկաբեկված քաղաքական ուժեր են: Քաղաքական զոմբիներ, որոնք շատ փող ունեն: