Կառավարության կառուցվածքային փոփոխություններ նախատեսող նախագիծը կքննարկվի ԱԺ առաջիկա քառօրյայում՝ հատուկ կարգով

Ազգային ժողովի պետական-իրավական հարցերի մշտական հանձնաժողովն այսօրվա նիստում դրական եզրակացություն տվեց «Հայաստանի Հանրապետության կառավարության կառուցվածքի մասին» օրենքում փոփոխություն եւ լրացումներ կատարելու մասին օրինագիծը նստաշրջանի և առաջիկա քառօրյա նիստերի օրակարգերում ընդգրկվելուն:

Այն կառաջարկվի քննարկել հատուկ կարգով. երկրորդ ընթերցումը կիրականացվի նախագիծն առաջին ընթերցմամբ ընդունվելուց հետո՝ 24 ժամվա ընթացքում:

Կառավարության նախօրեի նիստում նիստում հավանության արժանացած նախագծով առաջարկվում է ՀՀ արտակարգ իրավիճակների նախարարությունը միացնել Տարածքային կառավարման նախարարությանը, նաև կառավարության կառուցվածքը համալրել նոր՝ ՀՀ միջազգային տնտեսական ինտեգրման և բարեփոխումների նախարարությամբ:

Նախագիծն օրակարգում դրական եզրակացությամբ ընդգրկելուն հանձնաժողովականներից միակ դեմ քվեարկողը «Ժառանգություն» խմբակցության անդամ Զարուհի Փոստանջյանն էր:

ՀՀ արդարադատության նախարար Հովհաննես Մանուկյանը, ներկայացնելով կառավարության օրենսդրական նախաձեռնությունը, մասնավորապես, նշեց, թե «այս օրենքով նոր ծախսեր բյուջեով չեն առաջանում, և կառավարությունը համարում է, որ այս փոփոխություններով առավել արդյունավետ կդառնա կառավարության գործունեությունը»:

Նախարարը նաև ընդգծեց, որ ժամանակին ԱԻՆ-ի կազմում ընդգրկված ծառայությունները նախկինում ձևավորվել և գործել են հենց Տարածքային կառավարման նախարարության համակարգում:

Այս հիմնավորումը Զ.Փոստանջյանին համոզիչ չթվաց. «2008թ. մարտի 1-ից հետո, երբ ձևավորվում էր նոր նախարարություն, պարզվեց, որ անհրաժեշտ են նոր պորտֆելներ և ստեղծվեց ԱԻՆ-ը, Ազգային ժողովում ստեղծվեցին այլ հանձնաժողովներ, որոնք պետբյուջեից մեծ գումարներ են ստանում: Կարծում եմ` նորից նույն գործընթացն է կրկնվում, և նոր նախարարության ստեղծման կարիքը չկա»,- ասաց ընդդիմադիր պատգամավորը՝ հավելելով, որ առկա սուղ պայմաններում, երբ բյուջեի միջոցները բավարար չեն, փորձում են կրճատել հղիներին տրվող նպաստները, երբ թոշակառուներն արժանավայել թոշակ չեն ստանում, ևս մեկ նախարարության անհրաժեշտություն չկա:

«Ավելին` կարելի է այս նախարարության գործառույթը փոխանցել մեկ այլ նախարարության և կրճատել ևս մեկ նախարարություն, և այդ գումարներն ուղղել ավելի նպատակային ծախսերի»,- ասաց Զարուհի Փոստանջյանը, կարժիք հայտնելով, որ գումարները պետք է տնտեսվեն նաև ԱԺ-ում, քանի որ կան «մշտական հանձնաժողովներ, որոնք նույնիսկ նիստեր չեն գումարում, բայց այդ հանձնաժողովներին գումարներ են տրամադրվում»: