Եթե մայիսի 9-ին ռազմական շքերթը չվերածվի ռուսական և ռուսալեզու միջոցառման, ապա կարելի է ընդունել. Ս. Սաֆարյան

Եթե Հայաստանը ճիշտ կազմակերպի 2015 թ. մայիսի 9-ին ՌԴ զինված ուժերի հետ միասին ռազմական շքերթի աշխատանքները և այն չվերածվի ռուսական, ռուսալեզու կամ Ռուսական կայսրության վերականգնումը խորհրդանշող միջոցառման, ապա նորմալ է նման տոնակատարության անցկացումը:

Tert.am-ի հետ զրույցում սպասվելիք շքերթը այսպես մեկնաբանեց «Միջազգային անվտանգության հարցերի ինստիտուտ» ՀԿ նախագահ Ստյոպա Սաֆարյանը և ավելացրեց. «Իմ պապիկը նույնպես հերոսամարտի մաս է կազմել, և չեմ կարող բացասական վերաբերել ոչ միայն իր, այլև բոլոր հայորդիների տարած փառապանծ հաղթանակին: Բայց, անշուշտ, նկատելի է, որ Ռուսաստանն առիթը չի կորցնում նման բոլոր դեպքերում իր լեզվական, մշակութային ազդեցությունները տարածելու, նման խորհրդանշական երևույթները քաղաքական նպատակներով ծառայեցնելու համար: Ես դեմ եմ դրան, բայց ոչ որևէ ձևով այդ հաղթանակը նշելուն»:

Հիշեցնենք, որ երեկ Մոսկվայում ԱՊՀ մասնակից պետությունների պաշտպանության նախարարների խորհրդի հերթական նիստին քննարկվել է Հայրենական մեծ պատերազմում տարած հաղթանակի 70-ամյակը համատեղ նշելու առաջարկը, և 2015թ. մայիսի 9-ին ՀՀ զինված ուժերի հետ միասին շքերթի դուրս կգան նաև Գյումրիի 102-րդ ռազմաբազայի զինծառայողները:

Հիշեցնենք նաև, որ երեկ խորհրդարանում ֆինանսների նախարար Գագիկ Խաչատրյանը հայտնեց, որ շուտով Հայաստանի սահմանային մաքսակետերում Եվրասիական տնտեսական միության ներկայացուցիչներ կհայտնվեն՝ հայկական կողմի հետ համատեղ աշխատելու նպատակով: Ֆինանսների նախարարի խոսքով՝ Հայաստանի և Ղարաբաղի միջև սահմանային անցակետ տեղադրելու հարցը փոփոխությունների այս փաթեթում ներառված չէ։

Այստեղ արդեն Ստյոպա Սաֆարյանը շատ տխուր բաներ է տեսնում, օրինակ, որ ՀՀ սահմանին հարցերը տրվեն ռուսերեն.
«Եվ շատ մտահոգիչ է, ակնհայտ սուվերենության կրճատման խնդիր է, որովհետև, դեռ չեմ խոսում միջպետական սահմանների մասին, եթե մենք մինչև հիմա հասկանում էինք հայ-թուրքական սահմանին հայ-ռուսական համատեղ վերահսկողությունը, տնտեսական սահմանների վերահսկողության հարցում Հայաստանի բացառիկ ինքնիշխանության կորուստը անհասկանալի է՝ մեր տնտեսական սահմանների վերահսկողությունը այլ պետությունների ներկայացուցիչների հետ համատեղ»:

Ստյոպա Սաֆարյանն արդեն առիթ ունեցել է հայտնելու և այս անգամ էլ չշրջանցեց այն հարցը, որ դեռ լուծված չէ Հայաստան-Արցախ մաքսակետի հարցը:

«Ես կարծում եմ, որ մենք առաջիկայում կտեսնենք որոշակի լարվածություններ հենց ԵՏՄ ներսում՝ կապված այդ սահմանի մաքսակետի խնդրի հետ և հատկապես Հայաստան-Արցախ սահմանագծում»,-ավելացրեց նա: