Թշնամու լեզուն բերանից պոկելու, հանելու գիտակցումով է պետք ապրել, ոչ թե մեր արարքներով նրանց բերանը լեզու դնենք. Մանվել Գրիգորյանը՝ Հայոց բանակի, Գյումրիի ոճրագործության և այլնի մասին

Սահմանին կանգնած տղաներն իրենցն անում են, բայց մենք էլ իրականությունից կտրվելու իրավունք չունենք։ Այս մասին SHAMSHYAN.com-ի թղթակցի հետ զրույցում ասաց ԵԿՄ վարչության նախագահ, Արցախի հերոս, Զորավար, ԱԺ պատգամավոր Մանվել Գրիգորյանը՝ անդրադառնալով Հայոց բանակի օրվան, Գյումրիի ոճրագործությանը եւ այլ հարցերին: Նրա հետ հարցազրույցը ներկայացնում ենք ստորեւ. - Պարո՛ն գեներալ, հունվարի 28-ին նշելու ենք Հայոց բանակի օրը: Հայաստանում այդ օրն ըստ պատշաճի՞ են նշում, թե՞ ոչ։ - Սա համազգային տոն է, օրվա կապակցությամբ հարկավոր է շնորհավորել աշխարհասփյուռ հայությանը՝ Հայաստանի, Արցախի, Սփյուռքի ողջ հայությանը։ Մենք երբեք չպետք է մոռանանք, որ բանակի կայացումը հենց Հայաստանի Հանրապետության կայացումն է։ Հայոց բանակը ստեղծվեց ծանրագույն պայմաններում, երբ մեր երկիրն ուներ բազում անլուծելի թվացող պրոբլեմներ։ 1988-ի դեկտեմբերի 7-ի երկրաշարժի հետեւանքով Հայաստանում կային հազարավոր անօթեւան ընտանիքներ, դրան գումարվել էին այն ընտանիքները, որ մազապուրծ փրկվել էին Սումգայիթի, Բաքվի ցեղասպանությունից։ Ի հավելումն այդ ամենի՝ արցախցու արդար, ժողովրդավարական պահանջին թուրքական Ադրբեջանը պատերազմ հակադրեց։ Պատերազմում էինք՝ ունենալով այսքան խնդիրներ եւ գտնվելով Ադրբեջանի ու Թուրքիայի կողմից լիակատար շրջափակման մեջ։ Պատերազմն իրենց վրա վերցրին երկրապահ կամավորական ջոկատները, որոնց միավորման եւ համակարգված աշխատանքի համար պարտական ենք Սպարապետ Վազգեն Սարգսյանին։ Սպարապետը դարձավ ե՛ւ Երկրապահի հիմնադիրը, ե՛ւ ՀՀ առաջին պաշտպանության նախարարն ու բանակի հիմնադիրը։ Հայոց բանակը ստեղծվել է հազարավոր մեր ընկերների արյան գնով, հազարավոր վիրավոր եւ հաշմանդամ դարձածների քրտինքով, մեր սուրբ մայրերի դառը արցունքներով, բայց կայացել է, դարձել ՀՀ եւ Արցախի հայկական հանրապետությունների անվտանգության երաշխավորը։ Այնպես որ, ազգային այս մեծ տոնի կապակցությամբ ես ջերմորեն շնորհավորում եմ մեր երկրապահ ժողովրդին, շնորհավորում եմ սահմանապահ հայ զինվորին՝ շարքայինից մինչեւ պաշտպանության նախարար եւ զինված ուժերի գերագույն գլխավոր հրամանատար։ Շնորհավորում եմ սահմանամերձ բնակավայրերի բնակչությանը, որ հենց սահմանին բնակվելու, արարելու փաստով երկրապահ են, սահմանապահ են, մեր Սպարապետին եւ Արցախյան ազատամարտի մնացյալ նահատակներին եմ շնորհավորում, շնորհավորում եմ հերոսներ ծնած մեր հերոս մայրերին։ Առանձնահատուկ շնորհավորանքներս Սպարապետ ծնած Գրետա մայրիկին՝ մեր մեծ մայրիկին։ Շնորհավորելով՝ ընդգծեմ, որ բանակը մեր պետության մեջ ամենակայացած կառույցներից է։ Բանակը հիմնադրեց Սպարապետ Վազգեն Սարգսյանը, հետագայում կառույցը կայացավ հաջորդ նախարարների ջանքերով՝ Վազգեն Մանուկյանի, Սերժ Սարգսյանի։ Հենց Սերժ Սարգսյանի նախարարության ժամանակ մենք կարողացանք հաղթական հրադադար պարտադրել մեզ պատերազմ պարտադրած արյունարբու թուրքին։

մանրամասները` սկզբնաղբյուրում