Շատ ցինիկ է, երբ ՌԴ-ն ԼՂ հակամարտության կոնտեքստում գործում է և որպես հաշտարար, և որպես սպառազինություն մատակարարող. բրիտանական LINKS-ի ղեկավար. «168 ժամ»

«Շատ ցինիկ է, երբ Ռուսաստանը ԼՂ հակամարտության կոնտեքստում գործում է և՛ որպես հաշտարար, և՛ որպես սպառազինություն մատակարարող»,- այս մասին այսօր «168 Ժամ» թերթի հետ զրույցում ասել է «Եվրոպական քաղաքականության կենտրոնի» խորհրդատվական խորհրդի անդամ, բրիտանական LINKS հետազոտական կենտրոնի գործադիր տնօրեն Դենիս Սեմութն` անդրադառնալով ԼՂ հակամարտության գոտում առաջացած լարվածության պատճառներին:

Նա նշել է, թե առաջին հերթին կարևոր է հասկանալ, որ տարածաշրջանային և միջազգային իրողությունները շատ տարբեր են այն իրավիճակից, երբ 1994 թվականին հաստատվեց հրադադարի ռեժիմը Հայաստանի և Ադրբեջանի միջև: Ըստ նրա` հակամարտությունն այսօր բազմաշերտ է և գտնվում է միջազգային անցուդարձի ազդեցության տակ: «Այնուամենայնիվ, սա չպետք է մեր ուշադրությունը շեղի այն փաստից, որ առաջին հերթին Հայաստանի և Ադրբեջանի իշխանությունններինն է հրադադարը հարգելու պատասխանատվությունը և ապահովելու կառուցողական քննարկումներ, որոնք միտված են հակամարտութան խաղաղ կարգավորմանը»,- ասել է Դենիս Սեմութը:

Բրիտանական LINKS հետազոտական կենտրոնի գործադիր տնօրենի խոսքով, ԵԱՀԿ ՄԽ համանախագահ երկրներ Ռուսաստանը, Ֆրանսիան և ԱՄՆ-ն շատ ջանքեր են ներդրել, որպեսզի կողմերը վճռական քայլերի դիմեն հակամարտությունը խաղաղ միջոցներով լուծելու ուղղությամբ` աշխատելով Հայաստանի և Ադրբեջանի իշխանությունների հետ: «Այս աշխատանքը պետք է գնահատվի: Մյուս կողմից՝ որևէ վատ բան չկա ՄԽ աշխատանքը քննադատելու մեջ, քանի դեռ այդ քաննադատությունը կառուցողական է:

Այնուամենայնիվ, վերջին տարիներին մենք շատ բացասական զարգացման ականատեսն ենք եղել: Ռուսաստանը ողողել է տարածաշրջանը ամենաժամանակակից սպառազինությամբ: Եթե հակամարտությունը վերածվի լայնամասշտաբ պատերազմի, ապա մարդկային կորուստներն ահասարսուռ են լինելու: Շատ ցինիկ է, երբ ԼՂ հակամարտության կոնտեքստում Ռուսաստանը գործում է միաժամանակ և՛ որպես հաշտարար, և՛ որպես սպառազինություն մատակարարող»,- նշել է Սեմութը:

Ամբողջական հարցազրույցը՝ թերթի այսօրվա համարում: