Ես առանձնազրույց չեմ ունեցել ո'չ գործող նախագահ Սերժ Սարգսյանի, եւ ո'չ էլ պաշտոնաթող նախագահ Ռոբերտ Քոչարյանի հետ

Չնայած նրան, որ մինչ օրս ակտիվ քննարկումներն են գնում այն մասին, թե ԲՀԿ-ի մարտի 5-ին կայանալիք կուսակցության դռնփակ արտահերթ համագումարում ԲՀԿ նախագահ է դառնալու Նաիրա Զոհրաբյանը, այդուհանդերձ ԲՀԿ-ակամերձ որոշ շրջանակներ էլ, թեկուզ ոչ հրապարակային, կարծիք են հայտնում, որ Նաիրա Զոհրաբյանի տարբերակը դժվար թե իրականություն դառնա, քանի որ այդ հարցում ԲՀԿ-ի ներսում եւ դրսում տարաձայնությունները բավականին շատ են:
Ի դեպ, նախօրեին էլ քաղաքական որոշ շրջանակներ տեսակետ էին շրջանառում, թե տեխնիկական որոշ փոփոխություններից հետո, հնարավոր է որ ԲՀԿ-ի ղեկը անցնի ՄԱԿ նախագահ Գուրգեն Արսենյանի ձեռքը, ով տարածված կարծիքի համաձայն
ընդունելի կադր է թե Ռոբերտ Քոչարյանի , եւ թե Սերժ Սարգսյանի թիմակիցների կողմից, բացառությամբ ՀՀ բիզնեսազուրկ վարչապետ Հովիկ Աբրահամյանի, ով Արսենյանի նման համառ քաղաքական գործիչներին «տանել» չի կարողանում:
Պարզելու համար, թե ինչքանով են այս խոսակցությունները համապատասխանում իրականությանը, եւ թե արդյո՞ք առաջարկ ստանալու դեպքում կընդունի այն Արսենյանը թե ոչ, Fnews.am-ը մի քանի հարցադրում արեց հենց ՄԱԿ նախագահ, ԲՀԿ խմբակցության պատգամավոր Գուրգեն Արսենյանին, ով հարցը լսելուն պես արձագանքեց.

-Ես նման բան չեմ լսել, այդպիսի բան չկա եւ չի էլ կարող լինել, քանի որ ես Միավորված աշխատանքային կուսակցության նախագահն եմ, եւ բնական է, որ այս դեպքում ամեն ինչ պետք է ողջամտություն սահմաններում լինի:
-Դե Հայաստանի պայամաններում ամեն ինչ էլ հնարավոր է.հատկապես որ տեսակետ կա, թե նախկին ու ներկա իշխանական ֆիգուրները դեմ չեն լինի Ձեր անձի ընտրության հարցում:
-Իսկ Օբամա՞ն, Օբաման ի՞նչ ա ասում...Կրկնում եմ, այդպիսի բան չկա, եւ ես նման առաջարկներ որեւէ մեկից չեմ ստացել:

-Լավ, խոսենք ԲՀԿ-ի ու նրա ճակատագրի մասին: Ձեր կարծիքով, ինչո՞ւ ԲՀԿ-ին  նման բախտ վիճակվեց, ինչո՞ւ ԲՀԿ-ին այսպես ասած ստվերեցին քաղաքական գործընթացներից:

-Այս վերջին գործողությունները, իմ խորին համոզմամբ ոչ թե քաղաքական, այլ տեխնիկական գործընթացներ էին, ինչի արդյունքում էլ ունենք այն, ինչ ունենք:
-Իսկ ի՞նչ ունենք:

-Գիտեք Բարգավաճ Հայաստան կուսակացությունը, եւ Բարգավաճ Հայաստան քաղաքական թիմը տարբեր բաներ են. խնդրում եմ դա գիտակցեք, իսկ ինչ վերաբերում է տեղի ունեցած գործընթացներին, ապա ձեզ հավաստիացնում եմ, որ այդ ամենը ուղղակի տեխնիկական բնույթ էր կրում:
-Պարոն Արսենյան, իսկ այդ տեխնիկական գործընթացների թեժ օրերին դուք մի տեսակ ընդհատակում էիք: Ի՞նչ է ձեզ խնայում էին, թե՞ դրա տակ այլ պատճառներ կային թաքնված:

-Հարգելիս, ինձ խնայում էին բժիշկները, քանի որ ես գտնվում էի վիրահատական շրջանում: Շնչառության հետ կապված խնդիրներ ունեի, որոնք պետք էր արագ կարգավորել, մեր առողջության մասին է՞ լ չմտածենք ի՞նչ է: Հո՞ անպոչ գդալ չէի, որ էդ վիճակում խառնվեի ներքաղաքական գործընթացներին:

-Այդուհանդերձ ներքաղաքական կյանքը շարունակվում է եւ մի բան փաստ է. ԲՀԿ նախագահ Գագիկ Ծառուկյանը հեռացել է քաղաքական գործընթացներից... Չհաշված գործարար հատվածի այն առնետավազքը, ինչը տարիներ առաջ տեղի ունեցավ ՕԵԿ-ի դեպքում: Մի տարբերությամբ`որ ՕԵԿ նախագահը իր պատրաստվածության շնորհիվ մնաց խոշոր խաղի մեջ, իսկ ահա Ծառուկյանը լքում է քաղաքականությունը:Ի՞նչ կասեք սրա հետ կապված:

-Գիտեք ինչ, էդ համեմատակնները որպես կանոն ամեն ինչի հետ էլ կարելի է անցկացնել, բայց էն ինչ որ այս պահին ունենք, դա այս պահին տեղի ունեցող քաղաքական գործընթացներ են, որը որ բերեց ԲՀԿ-ի ներսում տեղի ունեցած տեխնիկական գործընթացներին:
-Իսկ այդ տեխնիկական գործընթացների համատեքստում, Ձեզ որպես գործարար Գուրգեն Արսենյանի հորոդոր, առաջարկ, պահանջ (չնայած պահանջը ասավածը կարծես ձեզ համար չէ) չի՞ եղել լքելու ԲՀԿ խմբակցությունը:

-Շնորհակալություն, որ իմ այդ բնավորության գիծը գիտեք, բայց ես նմատիպ որեւէ առաջարկ չեմ ստացել, եւ բացի այդ ես հայատարարում եմ, որ բացառված է որ նման բան ինձ հետ պատահի: Այն է` իրականացնել իմ կամքին ու խղճին հակառակ գորոծողություններ.դա բացառված է: Իմ որոշումները ես ընդունում եմ առաջնորդվելով իմ խղճով եւ համոզմունքներով: Ես համոզված եմ, որ Բարգավաճ Հայստան կուսակցությունը ունի կարեւոր եւ օգտակար դերակատարություն Հայաստանի քաղաքական կյանքում:
-Եւ ո՞րն է այդ կարեւոր ու օգտակար դերակատարությունը…

-Ուրեմն այսպես. քաղաքական այդ թիմը 2012 թթ-ին ստացել է ՀՀ բնակիչների 550 հազար ընտրողի աջակցություն, որը լրջագույն պարտավորություն է, եւ որի մասին մառանալ պետք չէ: Մեր խմբակցությունը եւ կուսակցությունը, կուսակցության համար այս «ծանր» իրավիճակում իր մեջ վճռականություն եւ կամք պետք է գտնի շարունակելու սպասարկել իր ընտրողների շահերը `օրենսդիր մարմնում, եւ ՀՀ-ի քաղաքական դաշտում:
Ես որպես քաղաքական թիմի անդամ, իմ խորհին շնորհակալություն են հայտնում պարոն Գագիկ Ծառուկյանին մեր անցած համատեղ քաղաքական ուղու համար: Պարոն Ծառուկյանի որոշումը` հեռանալ քաղաքականությունից եւ դադարեցնել քաղաքական գործունեությունը համարում եմ պարոն Ծառուկյանի անձնական գործը, եւ կարծում եմ ամեն ոք ունի իր հետագա գործունեությունը որոշելու սրաբազան իրավունքը:
Գտնում եմ, որ պարոն Ծառուկյանը ժողովրդի կողմից սիրված ու խարիզմատիկ անձնավորություն էր, եւ ոչ դասական քաղաքական գործիչ: Կարծում եմ, որ պարոն Ծառուկյանը իր նախասիրած ոլորտներում կշարունակի լինել արդյունավետ եւ օգտակար մեր հասարակության համար: Ես իմ շնորհակալությունն  եմ հայտնում իմ ընկեր Գագիկ Ծառուկյանին `մեր համատեղ գործունեւության համար:
-Պարոն Արսենյան ամեն ինչ ասվեց, միայն թե այդպես էլ չասացիք, թե ինչո՞ւ Գագիկ Ծառուկյանը դուրս մղվեց մեծ քաղաքականությունից: Եւս ըստ Ձեզ ի՞նչ մնաց ԲՀԿ-ից Գագիկ Ծառուկյանի ստվերում հայտնվելուց հետո…

-Կարծում եմ,  պարոն Ծառուկյանի կողմից քաղաքականությունից հեռանալու որոշումը կայացվել է ոչ քաղաքական գործընթացների արդյունքում: Իսկ ԲՀԿ-ի հետագա անելիքները լուրջ փորձություն են նաեւ կուսակցության անդամների եւ քաղաքական ղեկավարության համար: Այդ կուսակցությունը ՀՀ-ի քաղաքական կյանքում ունեցել է եւ հուսով եմ, որ կունենա արդյունավետ դերակատարում` վերաիմաստավորելով իր քաղաքական նպատակներն ու քաղաքական ուղեծիրը: Ես իմ ողջ մտավոր, քաղաքական եւ անձնական պոտենցիալով պատրաստ եմ եւ օժանդակելու եմ, որպեսզի ԲՀԿ-ն իր բազմահազար անդամներով ու համակիրներով շարունակի արդյունավետ օրենսդրական գործունեությունը` հանուն մեր ընտրողների եւ ՀՀ քաղաքացիների:
-Պարոն Արսենյան, իսկ ըստ Ձեզ այսուհետ ինչքանո՞վ  ԲՀԿ-ի գործերի մեջ կխառնվի ՀՀ երկրորդ նախագահ Ռոբերտ Քոչարյանը, ով ըստ էության համարվում է ԲՀԿ-ի քաղաքական կնքահայրն ու Գագիկ Ծառուկյանի բիզնեսի գործընկերը:

-Ես ԲՀԿ խմբակցության անդամ եմ 2012 թթ-ից, եւ որպես ԲՀԿ խմբակցության անդամ իմ պատգամավորական գործունեության ընթացում որեւէ անգամ ականատես չեմ եղել եւ առիթ չեմ ունեցել մտածելու, որ մեր կողմից իրականացվող որեւէ գործունեությունը կառավարվում է ինչ-որ ստվերային կենտրոնից: Ես դա պնդում եմ ամենայն պատասխանատվությամբ:
-Պարոն Արսենյան, կարծիք կա որ դուք հաճախակի եք հանդիպումներ եւ առանձնազրույցներ ունենում թե' նախորդ նախագահի,  եւ թե' գործող նախագահի հետ: Հետաքրքիր է, թե նման հանդիպումների ժամանակ ի՞նչ հարցեր եք քննարկում երկրի  նախկին ու ներկա ղեկավարների   հետ:
-Խորհրդարանական ընտրությունների ավարտից հետո, ես առանձնազրույց չեմ ունեցել ո'չ գործող նախագահ Սերժ Սարգսյանի հետ, եւ ո'չ էլ պաշտոնաթող նախագահ Ռոբերտ Քոչարյանի հետ:
Գիտեք, ես էս ամբողջ պատմության մեջ մի բանի վրա եմ զարմանում.ինքան «տուֆտա» դեմքեր ասես, որ չեն անդրադառնում ներքաղաքաքական անցուդարձին ու տեղի ունեցող պրոցեսներին, բայց հարց է առաջանում, թե այդ «տուֆտեքից» քանիսն են իրենց հայելու մեջ նայում ու հետո նոր խոսում…

Զրույցի շարունակությունը` կներկայացնենք հաջորդիվ: