Գյումրիում հնչած կրակոցները`մի քանի ամիս առաջ հարսանիքի ժամանակ տեղի ունեցած կոնֆլիկտի շարունակությունն է՞ր

Գյումրիում մարտի 7-ին կրակոցներ էին հնչել Տերյան փողոցում` "Պեգաս" խանութի մոտ: Կրակոցների հետեւանքով հիվանդանոց էին տեղափոխվել վեց մարդ` Ղազարյան Սմբատը, Ղազարյան Գագիկը, Ղազարյան Կնյազը, Հակոբյան Վլադիմիրը, Գեւորգյան Համլետը, Ղուկասյան Գագիկը: Վիրավորներից 3-ը հրազենային վնասվածքներ են ստացել, իսկ մյուսները վիրավորվել են կտրող-ծակող գործիքներից: Վիրավորներից Կնյազ Ղազարյանը գանգուղեղային վնասվածք է ստացել հրազենից եւ այս պահին միացված է արհեստական շնչառության ապարատին: Նրա եղբայրը` Գագիկ Ղազարյանը, ուսահոդի վնասվածք է ստացել հրազենից: Նրան գիշերը վիրահատել են, այս պահին վիճակը կայուն է, ինքնուրույն է շնչում: Երրորդ վիրավորը նրանց հակառակորդ ճամբարից է` Գագիկ Ղուկասյանը, ով ծանր գանգուղեղային վնասվածք է ստացել բութ գործիքով հարվածից (ոչ հրազենից): Նա եւս ինքնուրույն է շնչում:Հիշեցնենմք, որ 2007 թվականին նույն այդ խանութի մոտ տեղի էր ունեցել փոխհրաձգություն` Գյումրիի նախկին քաղաքապետ Վարդան Ղուկասյանի եւ ԲՀԿ-ական Արտաշես Սարգսյանի որդիների ու նրանց ընկերների միջեւ:
Միջադեպի վերաբերյալ, Fnews.am-ը  փորձեց  զրուցել ԱԺ ՀՀԿ խմբակցության պատգամավոր ՍՈՒՔԻԱՍ ԱՎԵՏԻՍՅԱՆԻ հետ, ով ճանաչում է միջադեպի մասնակիցներին եւ որոշ չափով տեղյակ է կատարվածի մանրամասներին:
-Պարոն Ավետիսյան, ինչո՞վ եք բացատրում, որ վերջին ամիսների ընթացքում Գյումրիում անընդհատ անցանկալի միջադեպեր են տեղի ունենում:
- Նախ ցավում եմ, որ հատկապես այս տարի Գյումրիում նմանատիպ դեպքերը շատացել են, որն, արդեն իրոք մտահոգիչ է: Ամենացավալին այն է, որ կենցաղային հողի վրա տեղի ունեցող փոքրիկ վիճաբանությունները վերածվում են նմանատիպ անցանկալի ընդհարումների: Եւ  այս պարագայում կարծում եմ, որ մեր հասարակությունը պետք է ավելի հանդուրժող լինի, քանի որ վերջին դեպքերը փաստում են այն մասին, որ խնդիրը ընդամենը անհանդուրժողականությունն է: Փոխանակ մեկը մյուսի նկատմամբ ավելի հանդուրժող լինենք եւ փորձենք մարել վեճի փոքրիկ օջախները, ցավոք սրտի դարձնում ենք ավելի լուրջ ընդհարումների եւ կոնֆլիկտների պատճառ:
- Իսկ Դուք հանդիպե՞լ եք միջադեպի մասնակիցների հետ:
-Անկեղծ ասած ես այդ ծեծկռտուքի մասնակիցներին բոլորին էլ գիտեմ, եւ միջադեպի մանրամասներին էլ ինչ-որ ձափով տիրապետում եմ:
-Կկիսվե՞ք Ձեր ունեցած տեղեկատվությամբ մեզ հետ, ի՞նչ է վարկածներ են շրջանառվում:
- Այստեղ վարկածի խնդիր չկա. հստակ է, որ միջադեպը տեղի է ունեցել կենցաղային հողի վրա ծագած վիճաբանությունից, որը ցավոք ավարտվել է կրակոցներով: Եվ այստեղ ես նաեւ մեղադրում եմ այն մարդկանց ծնողներին, ովքեր ժամանակին չեն կարողացել դրա դեմն առնել, քանի որ իսկապես մտահոգիչ է, որ երբ մի փոքր կենցաղային վեճը ավարտվում է նմանատիպ ցավալի հետեւանքներով:
-Կենցաղային վեճ ասելով ի՞նչ նկատի ունեք, մասնավորապես ինչն՞ է տվյալ պարագայում կրակոցների պատճառ հանդիսացել:
- Իմ ունեցած տեղեկատվությամբ, մի քանի ամիս առաջ հարսանիքի ժամանակ տեղի ունեցած կոնֆլիկտի շարունակությունն էր: Ամիսներ շարունակ այդ վեճը թեժացել-թեժացել եւ մարտի 7-ին էլ հանգել է նմանատիպ միջադեպի: Ճանաչելով միջադեպի մասնակիցներին, երբեք չէի մտածի, որ տվյալ անձիք կարող են այդ միջադեպի կիզակետում հայտնվել, առավելեւս միջադեպի պատճաը լինել: Քանի որ բոլորն է լուրջ մարդիկ են, թաղում, քաղաքում ճանաչված մարդիկ, եւ մինչ օրս էլ չեմ հասկանում, թե ինչն էր խանգարում, որ չկարողացան միմյանց հետ լեզու գտնել, քննարկել եւ խնդիրը լուծել: Առավելեւս ոչ խոշոր բիզնեսի բաժանման խնդիր է եղել, ոչ պարտք ու տալիքի, խնդիրը ընդամենը հասարակ վիրավորվածություն էր, որ այսօր ստացվեց ցավալի իրադարձություն, որի մեջ ներգրավված են տասնյակ մարդիկ, կան վեց վիրավորներ: Ինձ համար անհասկանալին այն է, որ նրանցից որեւէ մեկի մոտ ցանկություն չի եղել այս հարցը խաղաղ ճանապարհով լուծելու համար:
Ինձ համար եւ այսօր ցանկացած գյումրեցու համար էականն ու մտահոգիչն այն է, որ եթե ցանկացած փոքր վեճ հասունացնեն նման ընդհարումների, ապա սա լավ բանի չի բերի, շատ վատ է սա, մեզ մոտ անհանդուրժողականության խնդիր կա, որ գնալով խորանում է: