Սփյուռքահայերն իրենց կարողությունների չափով մասնակցում են Ցեղասպանության ոգեկոչման գործընթացին. Հասմիկ Պողոսյան

Tert.am-ը գրում է.

Մշակույթի նախարար Հասմիկ Պողոսյանը, Tert.am-ի հետ զրույցում պատասխանելով հարցին, թե ինչպես պետք է օգտագործել Սփյուռքի ներուժը,  նկատեց, թե իր կարծիքով՝ «օգտագործել» բառը պետք է փոխարինել «ներգրավել» բառով։

«Կարծում եմ՝ այս միջոցառումների ամփոփումներից մեկն էլ այն պետք է լինի, թե ինչպես յուրաքանչյուր հայ իր ներդրումն ունեցավ Ցեղասպանության ոգեկոչման արարողություններին՝ ինքնաբուխ, տեղում ինչ-որ բան արեց, որպեսզի ինքն իրեն լիարժեք հայ զգա։ Մարդիկ, ովքեր ճակատագրի բերումով հայրենիքից, հայությունից կտրված են, այս օրերին իրենց ներդումն ունեցան ամենատարբեր ձևերով, մեկն,  օրինակ, մասնակցեց ինչ-որ ցույցի, մյուսն ինչ-որ գիրք գրեց, մյուսը եկավ՝  փնտրելու իր արմատները Հայաստանում։ Այսինքն՝ բազմաթիվ օրինակներ, որոնք, կարծում եմ, վերլուծության կարիք ունեն, ինչը շատ կարևոր է»,-ասաց նա։ 

Դիտարկմանը, թե այսինքն՝ առարկայական չպե՞տք է նշել, ինչպես, օրինակ, դա արեց Սփյուռքի նախարարը՝ մատնացույց անելով, որ օրինակ՝ սփյուռքահայերը 1000-ական դոլար կարող են ներդնել հայաստանյան բանկերում, Հասմիկ Պողոսյանը նշեց, թե իր կարծիքով՝ ամեն մեկն  անում է այնքան ու այն ձևաչափով, ինչքան կարող է։ «Այսօր որևէ մեկին որևէ  բան չենք կարող պարտադրել, և կարծում եմ՝ ինչ տարին սկսվել է, մենք ականատես ենք  այն գործընթացին, որ մարդիկ իրենց կարողությունների չափով մասնակցում են»,-ասաց նա։ 

Նախարարն օրինակ բերեց հայտնի երաժիշտ Նարեկ Հախնազարյանին, ով ունենալով իր համերգային ծրագրերը, հրավերները տարբեր երկրներից, անձամբ որոշել էր դրանց մասնակցել իր իսկ կողմից պատրաստված՝ Ցեղասպանության կարգախոսներով։ «Ինձ համար մեծ էր անկնկալը, որ նա հատուկ պատրասված էր համերգներին՝ աֆիշներով և ամբողջովին PR փաթեթով։

Նա նպատակային պատրաստվել էր և իր մասնակցությունն այդպես էր տեսնում։ Կամ գրող է, ով որոշել է, թե չգիտի՝ ինչքան է ապրելու, բայց իր անձնական  գրադարանն ուզում է ուղարկել Հայաստան, որովհետև վստահ է, որ միայն Հայստանում այն կպահպանվի, հաջորդը, ով որոշել էր  ցուցարաների կողքին կանգնել։ Այսինքն՝ ամեն մեկն իր չափով է մասնակցում, կարևոր չէ՝ ինչ ծավալով կամ ինչ է անում, կարևոր է, որ ինքը մասնակից ու հաղորդակից է այն խորհրդին, որն այս տարվա մեջ է»,-եզրափակեց նա։