Դե ո՞վ լինի Արգամիչի երկրացի Մանվել Ղազարյանի մորաքրոջ որդին, ու դեռ մի բան էլ չցանականա քաղաքապետի պաշտոն ստանձնել...

Հունիսի 7-ին Աբովյանում կայանալիք քաղաքապետի արտահերթ ընտրություններին սահմանված ժամկետում՝ մինչև մայիսի 17-ի ժամը 18-ը, ինքաառաջադրվել է 6 անկուսակցական թեկնածու:
Թիվ 28 ընտրատարածքային ընտրական հանձնաժողով գրանցման փաստաթղթեր են ներկայացրել Ազգային ժողովի Տարածքային կառավարման և տեղական ինքնակառավարման հարցերի մշտական հանձնաժողովի փորձագետ Վահագն Գևորգյանը, «Չարենցավանի բեռնաուղևորատար ավտոտրանսպորտ» ԲԲԸ գլխավոր տնօրեն Արթուր Հարությունյանը, ով առավել հայտնի է «Պալաչ» մականունով, Աբովյանի նախկին քաղաքապետ Կարապետ Իսրայելյանը, Սամվել Հակոբյանը, Էդվին Թադևոսյանը և Արթուր Հարությունյանը:

Սակայն ընտրական այս կամպանիայի փուլում ամենաուշագրավն այնն է, որ ըստ ԿԸՀ պաշտոնական կայքէջի հրապարակած տվյալների՝ առաջադրված երկու Արթուր Հարությունյաններն էլ, զարմանալիորեն համընկնում են նաեւ հայրանունով` Գեղամի:
Նրանցից մեկը`«Քինգ Դելյուքս» ընկերության սեփականատեր Արթուր Հարությունյանն է` (Պալաչը), ով Գագիկ Ծառուկյանի սանիկն է, եւ որոշ ժամանակ առաջ նրա հետ լուրջ խնդիրներ ուներ:
Իսկ ահա մյուս հայտնությունը` Արթուր Հարությունյանը, Աբովյանում տարածված համառ լուրերի համաձայն, Վեդի Ալկո ընկերության սեփականատեր Մանվել Ղազարյանի մորաքրոջ տղան է, ով ասում են մշտապես զբաղվել է անասնապահությամբ: Բայց արի ու տես որ մարդը միամիտ քնել-արթնացել ու որոշել է. ոչ ավել, ոչ պակաս, քաղաքապետ դառնալ: Դե ո՞վ լինի Արգամիչի երկրացի Մանվել Ղազարյանի մորաքրոջ որդին ու դեռ մի բան էլ չցանականա քաղաքապետի պաշտոն ստանձնել, Էդ է՞ր պակաս…

Ինչեւէ, թե ինչպե՞ս է այս իրողությանը վերաբերում `«Քինգ Դելյուքս» ընկերության սեփականատեր Արթուր Հարությունյանը, նույն ինքը` Պալաչը, Fnews.am-ը փորձեց պարզել հենց նրանից, ով մեզ հետ զրույցում նկատեց.

-Դրանով նրանք իմ ռեյտինգն են բարձրացնում: Ով որ կանգնած է այդ թեկնածուի ետեւում՝ էնքան վախեցած է իմ առաջադրման փաստից, որ իմ դեմ թեկնածու են առաջադրում: Ենթադրում եմ, որ այդ քայլն արվել է աբովյանցիներին շփոթության մեջ գցելու համար, բայց հավատացած եղեք, որ մեր ընտրողները շատ սթափ են, ու խելացի եւ հաստատ կկարողանան տարբերակել, թե ով է իրենց նախըտրած Արթուր Հարությունյանը: Մեր թիմը շատ կազմակերպված ձեւով է պատրաստվում ընտրապայքարի, եւ ես Ձեզ հավաստիացնում եմ, որ մենք պրովակացիաների ու էժանագին սադրանքների գիրկը չենք ընկնում, եւ չենք էլ ընկնելու: Մենք մեր ծրագրերով հստակ շարժվելու ենք առաջ`գործելով միայն ու միայն արդար խաղի կանոններով: Ես մի բան կասեմ. ով ինչ ցանում է, այն էլ հնձում է, սպասեք ժամանակը ամեն ինչ ցույց կտա: Հունիսի 7-ից հետո, էլի առավոտ է բացվելու, էլի մարդիկ իրար երես են նայելու, ու բոլորս էլ շարունակելու ենք ապրել մեր սիրելի Աբովյան քաղաքում: Այնպես, որ հնացած գործիքներով ու նման մանր քայլերով ոչ թե կշիռդ ես բարձրացնում, այլ ես կասեի`ընդհակառակը: Մի քիչ համբերեք, ինքներդ կհամոզվեք, թե ինչի հետեւից է գնալու աբովյանցին:

Աբովյանի  նախընտրական անցուդարձի մանրամասները`կներկայացնենք քիչ ուշ…