Գյումրեցիներն ու առհասարակ ողջ հայ ազգը ՝ ես, դու , մյուսները կհանգստանան այն ժամանակ, երբ կգնդակահարեն 6 մարդու կյանք խլողին

ԱԺ-ում նախօրեին գլխավոր դատախազ Գևորգ Կոստանյանը նշել է, որ «Հասկանում է այն մարդկանց, ովքեր դուրս էին եկել փողոց և իրավացիորեն պահանջում էին, որպեսզի Պերմյակովի գործը հանձնվի Հայաստանի Հանրապետության արդարադատությանը: Գործի քննության վերաբերյալ այս պահին կարող է ասել միայն, որ ստեղծվել է աննախադեպ մի իրավիճակ, ինչպիսին երբեք չի եղել ոչ ՀՀ իրավապահների, ոչ էլ ՌԴ իրավապահների պրակտիկայում, և մենք ՌԴ իրավապահների հետ ինտենսիվ աշխատում են ստեղծված իրավիճակում գտնել տարբերակ, որը համահունչ կլինի միջազգային իրավունքի նորմերին»:
Սակայն ինչո՞ւմն է գործի աննախադեպությունը ՝ դատախազը չի մեկնաբանել:

Այս եւ մի քանի այլ հարցերի շուրջ մեկնաբանություն ստանալու համար Fnews.am-ի թղթակիցը կապ հաստատեց Գյումրու նախկին քաղաքապետ Վարդան Ղուկասյանի հետ, պարզելու, թե ինչպիսին է իրավիճակը Գյումրիում:

-Պրն. Ղուկասյան ի՞նչ գնահատական կտաք Գ. Կոստանյանի վերջին ելույթին՝ Ավետիսյանների սպանության գործի հետ կապված: Արդյո՞ք Գեւորգ Կոստանյանը կատարել է իր տղամարդու խոսքը:
- Գիտեք Պերմյակովի այդ արարքի մասին խոսել չեմ ուզում. անունն անգամ արտաբերել չեմ ուզում: Միայն կասեմ, որ գյումրեցիներն ու առհասարակ ողջ հայ ազգը ՝ ես, դու , մյուսները կհանգստանան այն ժամանակ, երբ կգնդակահարեն 6 մարդու կյանք խլողին :
-Իսկ ի՞նչ քայլեր են ձեռնարկվում Գյումրիում Ավետիսյանների գործով:
-Գյումրեցիները թասիբով մարդիկ են, նրանք մինչ այսօր չեն հարմարվում ու չեն հարմարվելու կատարվածի հետ, ախր մի ամբողջ ընտանիք են վերացրել : Գյումրեցիները փողոց են դուրս գալիս , բողոքում, բայց ինչպես տեսաք, Պերմյակովը դեռ Հայաստանի ձեռքում չէ:
Գյումրիում վիճակը շատ վատ է , մարդկանց դեմքից ժպիտն իսպառ վերացել է ., չկա ծիծաղ, ուրախություն, գյումրեցին տխուր է , կաշկանդված: Գյումրին դատարկվում է , բոլորը գնում են , հետ չեն գալիս...

ԿԱՌԱՎԱՐՈՒԹՅՈՒՆԸ ԹՈՂ ՄԵԿ-ՄԵԿ ԷԼ ԿՏՐՎԻ ԵՐԵՒԱՆԻՑ  ՈՒ ԹԵՔՎԻ ԳՅՈՒՄՐԻ 

-Իսկ Ձեր կարծիքով ո՞վ և ի՞նչ միջոցներ պետք է ձեռնարկի Գյումրին ու գյումրեցուն առաջվանը դարձնելու համար ՝ կատակասեր ու կենսուրախ...
- Պարզապես կառավարությունը թող մեկ-մեկ կտրվի Երևանից ու թեքվի Գյումրու ու մյուս մարզերի կողմն էլ: Թող ոչ թե տարին երեք անգամ Երևանի փողոցներն ասֆալտապատի, այլ գոնե ամիսը մեկ մարզ գա, հիշի, որ մարզում էլ ապրում են, մարդ կա, կենդանի շունչ կա: Թող գյումրեցուն ուշադրություն դարձնեն:

Աննա  Առաքելյան