Լավ կլիներ, որ չար լեզուները նշեին, թե ուր գնամ.պատգամավորը` իր ունեցած պարտքերի, Կառավարության դրսեւորած վարքագծի ու իր մտադրությունների մասին

ԱԺ ՀՀԿ-ական պատգամավոր Աշոտ Աղաբաբյանի (Բուռնաշի) գործերը «ձախ» գնալուց հետո, կարծես թե վերջինիս շուրջը անընդհատ ինչ-որ անհասկանալի իրադարձություններ են կատարվում: Կամ այլ կերպ ասած, ԱԺ պատգամավորի շուրջ, իշխանական օղակը կարծես թե գնալով սեղմվում է: Խորհրդարանական այս քառօրյաի ընթացքում էլ, խոսակցություններ էին շրջանառվում թե ԱԺ պատգամավոր Աշոտ Աղաբաբյանը հնարավոր է լքի Հայաստանը, եւ փորձի որեւէ կերպ գործունեություն տարածել ՀՀ-ի սահմաններից դուրս:
Իսկ թե ինչպե՞ս է ԱԺ պատգամավորը վերաբերում իր անձի ու գործունեության շուրջ պպտվող խոսակցություններին, եւ թե ի՞նչ է նա պատրաստվում անել հարկային մարմինների հետ ունեցած իր տարաձայնություններից ու այսպես ասած որպես գործարար սննկացման եզրին հայտնվելուց հետո, Fnews.am-ը փորձեց պարզել հենց նրանից.
-Պարոն Աղաբաբյան, նախ ի՞նչ կասեք հայտնի դատական վեճի վերաբերյալ: Ո՞ր փուլում է գտնվում դատական գործը:
- Դատը հետաձգվել է մինչև հուլիս ամիսը, դեռ ոչինչ ասել չեմ կարող, դատից հետո կերևա ով ` ով է :

-Արդյո՞ք Դուք նեղացել եք Ձեր կուսակիցներից,  և առհասարակ ՀՀ կառավարությունից:
-Ո՞վ է ասել նման հիմարություն: Ես չեմ նեղացել իմ  կուսակիցներից, այստեղ ուրիշ հարց կա:

-Իսկ ո՞րն է այդ «ուրիշ» հարցը :

-Ես իմ հանդեպ կառավարության կողմից դրսեւորած վարքագծի հետ համաձայն չեմ.նրանք ինձ ինչ-որ բանի մեջ են կասկածում, բայց դատից հետո շատ բան պարզ կդառնա:

- Ճի՞շտ է , որ Դուք գնում եք ԱԺ միայն «ներկա» ստանալու համար:
-Այո, գնում եմ միայն ներկա ստանալու համար, քանի որ ցանկություն չունեմ նիստերին մասնակցելու, դա էլ հենց կառավարության վերաբերմունքից է գալիս:

-Պարոն Աղաբաբյան, համառ լուրեր են պտտվում այն մասին, որ տևական ժամանակ է չեք կարողացել վճարել Գյումրիում գտնվող  Ձեր գրասենյակի ու Ձեր աշխատակիցների հասանելիք գումարը:

-Գյումրիի իմ գրասենյակը վարձով չէ, ես աշխատակիցների աշխատավարձերն եմ փոքր-ինչ ուշացրել, այո ֆինանսն էր պատճառը:

-Ի դեպ, չար լեզուներն ասում են, որ ուզում եք լքել ՀՀ-ն : Կա՞ նման մտադրություն:

-Լավ կլիներ չար լեզուները նշեին նաև, թե ուր գնամ, քանի որ նման ցանկություն իմ մեջ չկա, հետաքրքիր է ով է նման բան մոգոնել: Ես երբեք չեմ լքի հայրենիքս, ո՞ւր գնամ ախր, ինչո՞ւ գնամ, այստեղ է իմ տունը:

-Պարոն Աղաբաբյան, այսօր Անդրանիկ Մարգարյանի ծննդյան օրն է: Ի՞նչ եք կարծում, ինչ կփոխվեր, եթե նա կենդանի լիներ:

-Այնքա~ն բան կփոխվեր, եթե ողջ լիներ Մարգարյանը, Վազգենը, Նալբանդյանը…

Աննա Առաքելյան