Ազատամարտիկները միավորվում են, և դա ժողովրդի համար հենարան է դառնալու. Ռազմիկ Պետրոսյան
1in.am-ը գրում է. «Առաջին լրատվական»–ի զրուցակիցն է «Ապարան» ջոկատի հրամանատար, Ազատամարտիկների դաշինքի նախաձեռնող խմբի անդամ Ռազմիկ Պետրոսյանը:
– Պարոն Պետրոսյան, չնայած հանրային ճնշմանը՝ օգոստոսի 1-ից էլեկտրաէներգիան կթանկանա 7 դրամով։ Ի՞նչ եք կարծում՝ հնարավո՞ր է այնպիսի հանրային ճնշման գործադրում, որի արդյունքում սակագինը նորից փոփոխվի։
–Ես չեմ կարծում, թե կփոփոխվի, բայց, բնականաբար, պայքարն իր ազդեցությունը տալու է։ Իշխանությունները սա մարսելու համար այսօր Ազգային ժողովում ավելի «մունդառ» օրենքներ, ավելի վտանգավոր, ժողովրդի համար խոցելի օրենքներ են ներկայացնում, հետո ՀՀԿ-ականները դեմ են արտահայտվում դրանց, որպեսզի ժողովուրդը մոռանա էլեկտրաէներգիայի թանկացման մասին, դեռ մի բան էլ շնորհակալություն ասի, որ տեսեք՝ ինչ բարեգութ են, որ ընդամենը 7 դրամով թանկացրին հոսանքը։ Նրանք ամեն ինչ անում են, որ երկիրը դատարկվի։
Այս ազգը կամ պետք է արժանապատվություն ունենա, մեջքը ուղղի, կամ կզած ապրի, կամ էլ փախչի երկրից։ Հիմա մարդիկ պետք է հավաքվեն իրար շուրջը, չնայեն առաջնորդներին, ով է գալիս, ով է գնում։ Յուրաքանչյուր արժանապատվության գինն իմացողը այսօր պիտի կանգնի ու այս իշխանություններին լարի երկրից։ Եթե դա չարեցին, ստրուկի պես են ապրելու կամ օտարության մեջ։ Մենք միշտ այդ ձևով ենք կորցրել մեր հայրենիքը։ Մի ամբողջ սերունդ այսօր ապրում է ստորացված, և մենք հարմարվում ենք դրա հետ։ Իրենք գիշերը ինչ որոշում են, առավոտյան անում են։ Մեր մեծերը լավ խոսք ունեն, ասում են. «Անշուն գեղերն ընկել, առանց փեդ ման են գալիս»։
Այն ժամանակ, երբ Ռոբերտն ասում էր՝ ուր է էստեղ տղամարդ, մենք ըմբոստանում էինք, թե էս ինչ ասաց։ Այս մարդիկ մեր ատամները հաշվել են, գիտեն, որ մենք ընդամենը հետևից խոսող ենք, հարմարվող ենք, ազգովի այդպես ենք եղել։ Մուշում նստածը սպասում էր՝ թշնամին գա իր քաղաք, նոր կռվի, մինչ այդ չէր մասնակցում ազատագրական պայքարին։ Արցախի պատերազմի ժամանակ այդ մտածողությունից դուրս էինք եկել, մեր անձնականից դուրս էինք եկել. աշտարակցիները, ապարանցիները, նոյեմբերյանցիներն այնտեղ էին։ Բայց հիմա նայում եմ՝ էլի հարմարվողները շատացել են։ Եթե հարմարվեցինք, այս վիճակին ենք լինելու։ Չորս թափթփուկ այս երկիրը լափում են, ու մենք համակերպվում ենք դրա հետ։
մանրամասները` սկզբնաղբյուրում