Մենք պարտավոր չենք վճարել Բիբինի կամ բիբինների կերածի վճարը...
Արդեն մի քանի օր է, ցուցարարները գիշեր ու ցերեկ Բաղրամյան պողոտայից չեն հեռանում: Ավելին պայքարը կարծես թե նոր փուլ է թեւակոխում` բարձրացնելով իրական ու արդարացի բողոքի ալիքը, որի շարքերը օր-օրի համալրվում են նոր դեմքերով ու նոր որակներով, որն անշուշտ սկսված պայքարին առավել գրագետ ու համարձակ շունչ է տալիս:
Ինչեւէ, ցուցարարների սկսած շարժման, նրանց կողմից պատգամավորներին հասցրած հայհոյանքների ու Բաղրամյան պողոտայից չհեռանալու պատրաստակամության ու համառության շուրջ, Fnews.am-ը զրուցեց քաղաքագետ Գագիկ Համբարյանի հետ:
-Պարոն Համբարյան, ի՞նչ եք կարծում, ո՞րն է լինելու այս պայքարի տրամաբանական ավարտը: Եվ արդյո՞ք այն պետք է քաղաքականացնել:
-Անկեղծ ասած սկզբնական շրջանում ես մտածում էի, որ այս շարժումը հաջողություն չի ունենա, բայց երբ տեսա նրանց սկսած պայքարը, կարծիքս փոխվեց: Կարծում եմ, որ եթե ցուցարարները սխալներ չգործեն, ամեն բան լավ կստացվի:
-Ի՞նչ սխալի մասին է խոսքը:
-Այն է, որ նրանց պահանջները չդառնան ՔԱՂԱՔԱԿԱՆ, եթե պայքարը չքաղականացվի, ապա ցուցարարները միգուցե հասնեն հաջողության: Ի սկզբանե` հանրահավաքի և' երթերի մասնակիցները, և' հասարակության մի զգալի մասը ՄԻԱՑԱՎ այս շարժմանը այն պատճառով, որ ոչ ոք քաղաքական պահանջներ առաջ չէր քաշում: Իսկ ժողովրդի պահանջը, ինչ խոսք լիովին արդար է. ժողովուրդը պարտավոր չէ վճարել ավելի գումար, ինչ է թե ռուսական ՌԱՈ ԵԷՍ-ի տնօրենը մութ գործեր է արել և կերել է այդ գումարը : Մենք պարտավոր չենք վճարել Բիբինի կամ բիբինների կերածի վճարը:
-Իսկ ի՞նչ եք կարծում. արդյո՞ք պատգամավորները չուշացան` ցուցարարներին միանալու առումով: Միգուցե նրանք ավելի շուտ գնային եւ առաջին իսկ օրվանից երթն առավել խաղաղ պայմաններո՞ւմ անցներ:
-Երբ հանրահավաքի մասնակիցներին բացի շատ-շատերից, միացան ԿԳ նախարար Արմեն Աշոտյանն ու ԱԺ պատգամավոր Սամվել Ֆարմանյանը, ոմանք սկսեցին քաղաքական հայտարարություններ անել, և անձնական վիրավորանքներ ու պիտակավորումներ տալ ՀՀԿ-ի ներկայացուցիչներին...
Հիշում ե՞ք. երբ տրանսպորտի և կենսաթոշակների բարձրացման համար նման շարժում էր կազմակերպվել, ցուցարարները չէին թողնում քաղաքական գործիչներին խառնվել իրենց կազմակերպած երթին և դա շատ ճիշտ էր: Եւ հիմա նույնպես, ցուցարարները դեմ են քաղաքական միացումներին:
Բայց ամեն դեպքում ես կարծում եմ, որ չի կարելի նման ձևով պատասխանել և հայհոյել Արմեն Աշոտյանին: Ի՞նչ տարբերություն, թե ով որ կուսակցությունից է. կարևորն այն է, որ որոշ քաղաքական գործիչներ ժողովրդի կողքին են: Այդպիսի վարքագիծ դրսևորողները "փչացնում" են ՇԱՐԺՄԱՆ ողջ բովանդակությունը:
-Այդուհանդերձ, որոշ ԶԼՄ-ներ ընդհանրություններ են գտել Հայաստանի ցույցերի և մայդանի իրադարձությունների միջև : Ձեր կարծիքով մեզ մոտ գործը կարո՞ղ է հասնել ՄԱՅԴԱՆԻ, թե՞ ոչ:
-Կարծում եմ Հայաստանում մայդան չի լինի, և հուսով եմ, որ այս ամենը տեսնելով մեր դաշնակից Ռուսաստանը կփոխի իր քաղաքականությունը ՀՀ-ի նկատմամբ: Ռուսական ԶԼՄ- ների այն անդրադարձն էլ, թե իբր շարժումը դսրից ՝ արևմուտքից պատվիրված է եղել , ասեմ, որ նման բան չկա: Ժողովուրդը, էլի եմ կրկնում.ոչխար չի, որ վճարի Բիբինի կերածների գումարները : Սա հովանավորված ծրագիր չէ:
Աննա Առաքելյան