Հակոբ Հակոբյանը`իր բիզնես գործունեության, վարչապետի հետ ունեցած հարաբերությունների ու Սամվել Կարապետյանի կողմից`ՀԷՑ-ը գնելու խոսակցությունների մասին
Ով ուզում է թող փողոց փակի կամ բողոքի, ես միշտ մաքուր եմ եղել
Նախօրեին, Արարատի մարզի Ջրաշեն և Դիտակ գյուղերի բնակիչները, կրկին անգամ ահանազանգել էին այն մասին որ, ունենալով շուրջօրյա ջրամատակարարման պայմանագիր, տևական ժամանակ է, ինչ նախատեսված ջրաքանակի 10%-ի չափով անգամ ջուրն իրենց գյուղ չի հասնում:
Ավելին, համայնքի գյուղապետը բարձրաձայնել էր, որ ջրանջատումների խնդիրը պայամանավորված է ԱԺ պատգամավոր Հակոբ Հակոբյանի բիզնես գործունեությունը ընդլայնելու հեռանկարով:
Գյուղապետն ասել էր, որ Նուբարաշենում գտնվող՝ պատգամավորին պատկանող թռչնաֆաբրիկայում ավելացվել է մի քանի գոմ, իսկ ջուրն էլ ծախսվում է ֆաբրիկայի կարիքների համար, որի արդյունքում տուժում են գյուղացիները:
Պարզելու համար, թե իրականում ի՞նչ կապ ունի այս պատմության հետ պատգամավոր Հակոբյանը, ում անունը իրականում սկանդալային պատմությունների մեջ երբեւէ չի շահարկվել, Fnews.am-ը հարցադրում արեց հենց նրան, ով մեզ հետ զրույցում նկատեց.
-Ես ասեմ, որ այդ լուրերը միանշանակ իրականությանը չեն համապատասխանում: Այսպես. եթե օրինակ երկու շենքերից մեկում ջուր է լինում, մյուսում չի լինում, ո՞վ է մեղավոր: Ի՞նչ անի ջուր ունեցող շենքը, ինչո՞վ է մեղավոր: Ես ասեմ, որ թռչնաֆաբրիկան Խորհրդային տարիներին ունեցել է մոտ 90 թռչնագոմ: Սակայն հիմա կա ընդամենը 12 գոմ, այդ ի՞նչ պետք է անի ֆաբրիկան, որ ամբողջ ջուրը օգտագործի, որ գյուղին էլ ջուր չհասի: Չէ՞ որ ֆաբրիկան ամառ-ձմեռ նույն քանակությամբ ջուրն է օգտագործում: Այդ ինչպե՞ս է լինում, որ ամռանը ջուր չկա, իսկ ձմռանը կա: Ես էլ` ինչպես բոլորը, գնում եմ ջուրը եւ ես վճարում եմ դրա համար:
-Պարոն Հակոբյան, արդեն իսկ խոսակցություններ են պտտվում այն մասին, որ գյուղացիները պատրաստվում են բողոքել, փողոցը փակել, մինչեւ որ այդ հարցը լուծում կստանա: Ի՞նչ կասեք սրա հետ կապված:
-Նախ ասեմ, որ ոչ ոք չի կարող խոչընդոտել ֆաբրիկայի աշխատանքները: Եվ հետո, եթե ֆաբրիկան ասենք վատ աշխատի, կամ չաշխատի, դա ի վերջո նաեւ բնակիչներին է վնասելու չէ՞: Խոչընդոտել ՝ նշանակում է վնաս տալ: Եվ եթե որևէ մեկը փորձի խոչընդոտել ֆաբրիկայի աշխատանքները, նա անպայման պատասխան կտա օրենքով սահմանված կարգով:
Թող փողոց փակեն, թող բողոքեն, բայց իմանան որտեղ եւ հանուն ինչի: Ես ո'չ մեղավոր եմ փնտրում, եւ ո'չ էլ որեւէ մեկին մեղադրում եմ: Թող դիմեն մարզպետին, վարչապետին, ում ուզում են. ես միշտ էլ մաքուր եմ աշխատել և մտահոգվելու ոչինչ չունեմ:
Ես վարչապետի հետ նորմալ հարաբերությունների մեջ եմ
-Պարոն Հակոբյան, ճի՞շտ է , որ այս պահի դրությամբ Դուք բավականին լուրջ պարտքեր ունեք, եւ որ վերջին ժամանակներս, որպես «Երեւանի գարեջուր» գործարանի սեփականատեր ուշացումներով եք կատարում Ձեր հարկային պարտավորությունները: Ասում են խնդիրներ ունեք նաեւ ՀՀ վարչապետ Հ. Աբրահամյանի հետ: Ձեր մեկնաբանությունը:
-Ասեմ որ մենք միշտ հարկերը վճարում ենք ժամանակին, եւ պատասխանատու հարկատու ենք: Իսկ պարտք ասելով չգիտեմ թե ինչ եք ուզում ասել: Բոլոր գործարաններն էլ հումք են վերցնում, և կան տարբեր պայմանավորվածություններ: Հումք տվողներից շատերը գումարը միանգամից են պահանջում, շատերն էլ ՝ մաս-մաս: Մենք վճարում ենք և՛ մաս-մաս, և ՛ միանգամից: Նայած` թե ում հետ ինչ պայմանավորվածություն ունենք: Իսկ վարչապետի հետ ոչ մի խնդիր չունեմ: Ես չեմ ասում. որ մենք ընկերներ ենք, բայց լավ հարաբերություններ ունենք, մտերիմ ենք: Եւ ես երբեք տարաձայնություն չեմ ունեցել Հովիկ Աբրահամյանի հետ:
-Իսկ ինչպե՞ս կգնահատեիք ՀՀ –ի ներկա տնտեսական իրավիճակը:
-Գիտեք, երբ ռուբլին նման անկում է ապրում, բնական է, որ ՀՀ-ում տնտեսական վիճակը պետք է որ ծանրանա: Դե քանի որ նրանք ովքեր աշխատում են ՌԴ-ում, անցած տարի իհարկե կարգին եկամուտներ էին ստանում, իսկ հիմա համարյա թե դրա կեսը հազիվ են ստանում: Այնպես, որ արտաքին ազդակները չեն կարող անհետեւանք լինել:
-Պարոն Հակոբյան իսկ ի՞նչ կասեք էլեկտրաէներգիայի թանկացման և այդ ուղղությամբ տարվող միասնական պայքարի մասին: Արդյո՞ք աուդիտի անցկացումը լավագույն ե՞լքն է ստեղծված իրավիճակի համար:
-Ձեր հարցից զգում եմ որ դուք ևս չեք հավատում աուդիտին, և ոչ միայն դուք, այլ նաեւ շատ լրագրողներ: Լավ կլինի, որ լիներ աուդիտ, որպեսզի հայտնաբերվեին մեղավորները: Բայց նաև ասեմ, որ եթե հոսանքը չթանկանա, հետագայում մենք որակյալ հոսանք չենք ունենա: Մեր երկրում ՝ հասարակ քաղաքացուց մինչև նախագահ, ոչ ոք չի ցանկանա, որ հոսանքը թանկանա…
Սամվել Կարապետյանը կարող է
-Իսկ ի՞նչ կասեք Սամվել Կարապետյանի ՝ ՀԷՑ-ը գնելու լուրերի մասին, արդյո՞ք այդ քայլը ի օգուտ հայ ժողովրդի կլինի:
-Ցանկացած մեկը, ով ուզում է բիզնես գնել, նախ ուսումնասիրում է ամեն ինչ. հետո նոր որոշում է կայացնում: Ոչ ոք չի ցանկանա չաշխատող բիզնես գնել: Բայց կարծում եմ, որ եթե Սամվել Կարապետյանը իրոք գնի ՀԷՑ-ը, ապա նա լավ գլուխ կհանի, քանի որ նրա մոտ կստացվի բարեկարգել եւ շատ խնդիրներ լուծել` ի օգուտ մեր երկրի: Դե ժամանակավորապես կառավարությունն իր վրա է վերցրել ավելացված գումարները, բայց բնական է, որ կառավարությունն ի վիճակի չէ երկար ժամանակ վճարել այն:
Աննա Առաքելյան
Հ.Գ.Դիտակ գյուղի բնակիչներն ու գյուղապետը, հավանաբար կգտնեն իրական մեղավորներին և ազնիվ ու աշխատասեր մարդկանց անունը չեն շահարկի : Դե Ջրաշենի գյուղապետի մասին խոսելն էլ ավելորդ է, քանի որ գյուղում խոսում են այն մասին, որ Հ. Հակոբյանն այնքան է օգնել Ջրաշենին, որ գյուղապետը հավանաբար ամաչում է հրապարակայնորեն խոսել և միայն լրագրողների մոտ է դուխավորվում ` բողոքելով և մեղադրելով նրան :
Այլ զարգացումների մասին` կխոսենք հաջորդիվ: