Հայաստանի ոստիկանությունը նաև տեխնիկական զինվածությամբ պետք է համապատասխանի արդի իրավապահ համակարգի լավագույն օրինակներին

«Содружество» ամսագիրն իր վերջին համարում ներկայացնում է հարցազրույց ՀՀ ոստիկանության պետ﹐ գեներալ-լեյտենանտ Վլադիմիր Գասպարյանի հետ: Ներկայացնում ենք հարցազրույցը̀ հատվածներով:
Հատված 3-րդ

ՀԱՐՑ - Վերջին շրջանում ի՞նչ փոփոխություններ է կրել իրավակարգի պահապանների նյութատեխնիկական հագեցվածությունը: Գիտատեխնիկական ի՞նչ ներդրումներ են հնարավորություն տվել հեշտացնել ոստիկանների աշխատանքը:

- Դա նույնպես բարեփոխումների ծրագրի հիմանարար ուղղություններից է: Առաջին հերթին, իհարկե, աշխատանքային պայմանների բարելավումը: Այս ուղղությամբ կատարված աշխատանքը դժվար է գերագնահատել: Ոստիկանության, փաստորեն, բոլոր ստորաբաժանումների մասնաշենքերում իրականացվել են նորոգման և վերականգնողական աշխատանքներ, շահագործման են հանձնվել անձնագրային և վիզաների վարչության, Ոստիկանության զորքերի, մայրաքաղաքի Կենտրոնականի, Քանաքեռ-Զեյթունի և Գյումրի քաղաքի Մուշի բաժինների նոր մասնաշենքերը:
Հաջորդ փուլը ստորաբաժանումների տեխնիկական հագեցումն է: Այստեղն նույնպես տեսանելի առաջընթաց կա: Փորձաքրեագիտական վարչությունը համալրվել է անհրաժեշտ գույքով և տրանսպորտով: Թմրանյութերի վերահսկման ՌԴ Դաշնային ծառայության կողմից տրամադրվելիք միջոցներով նախատեսվում է ստեղծել նոր քրեագիտական լաբորատորիաներ, ձեռք բերել նորագույն, արդի պահանջներին համապատասխան տեխնիկական միջոցներ:
Ոստիկանության բոլոր ստորաբաժանումները հնարավորինս հագեցված են համակարգիչներով, ինչն ապահովում է ներհամակարգային համացանցային կապի կիրառում: Ոստիկանության գերատեսչական համակարգչային կապի միջոցով տարածքային բոլոր բաժինները միացվել են ցանցին և հնարավորություն է ընձեռվել էլեկտրոնային եղանակով տեղերից ստանալ և տրամադրել տեղեկություններ: Այս շրջանակում թարմացվել է ոստիկանության սերվերային հանգույցը, ստեղծվել է այն սպասարկող մասնագիտացված ստորաբաժանում:
Ինֆորմացիոն կենտրոնում ներդրվել է օպերատիվ-տեղեկատու քարտադարանի և հետախուզվող ու անհայտ կորած անձանց հաշվառումների նոր ծրագրային համակարգ, ՔՀԳ վարչության կողմից ստեղծել է տեղեկատվական շտեմարան, ստորաբաժանումների վարույթներում առկա հաշվառման գործերից թվայնացվել և մուտքագրվել է շուրջ 3000 հատոր արխիվային նյութ, ՀՀ-ում Ինտերպոլի ԱԿԲ-ում ստեղծվել է ավտոմատացված տեղեկատվական-վերլուծական նոր համակարգ, փորձարկման փուլում է <Կադրեր> ինֆորմացիոն վերլուծական նոր համակարգը, իսկ մարզային վարչություննները և դրանց ենթակա տարածքային ստորաբաժանումների հերթապահ մասերն ու ՁՊՎ-ները համալրվել են տեսադիտման սարքերով:
Ինչպես տեսնում եք՝ մեծ աշխատանք է կատարվել, սակայն, մեզ համար քիչ է. Հայաստանի ոստիկանությունը նաև տեխնիկական զինվածությամբ պետք է համապատասխանի արդի իրավապահ համակարգի լավագույն օրինակներին:

ՀԱՐՑ - Բարեփոխումների ընթացքում հաջողվե՞լ է արդյոք նվազեցնել հանցավորության մակարդակն ու բարձրացնել հանցագործությունների բացահայտման ցուցանիշը:

- Երկու ուղղությամբ էլ հաջողություններ ունենք. մասնավորապես, նվազել են դիտավորությամբ առողջությանը վնաս պատճառելու, թրաֆիքինգի, ավազակության, տրանսպորտային միջոց փախցնելու և մի շարք այլ հանցատեսակների դեպքերը: Աճել են բցահայտման ցուցանիշները մի շարք ուղղություններով: Գոհացուցիչ են, մասնավորապես, ապօրինի զենք-զինամթերքի հայտնաբերման ցուցանիշները, նաև՝ այդ կարգի զենքը կամավոր հանձնող քաղաքացիների թիվը, ինչը վկայում է մեր հասարակության իրավագիտակցության բարձրացման ուղղությամբ ոստիկանությաքն ներդրած ջանքերի արդյունավետության մասին:
Ցուցանիշներն, իհարկե, կարևոր են, բայց ես ուզում եմ նշել բարեփոխումների շրջանակում իրականացվող աշխատանքի հատկապես երկու արդյունքի մասին:
Իմ պաշտոնավարման ամենասկզբից միանշանակ դրել եմ աշխատանքի անօրինական մեթոդներից իսպառ հրաժարվելու խնդիրը, և ոստիկանության ղեկավարությունն այսօր էլ անշեղորեն իրականացնում է ծեծի և խոշտանգման միջոցով ցուցմունքներ կորզելու պրակտիկայի բացառման գործընթացը: Դեռևս հանդիպող նման բացառիկ դեպքերը ոստիկանության ղեկավարության կողմից ստանում են կոշտ արձագանք և խստագույնս պատժվում են: 
Մյուս ուղղությունը հանրային գիտակցության մեջ հանցագործության պատժի անխուսափելիության սկզբունքի ամրագրման ուղղությամբ կատարվող աշխատանքն է, ինչին է ուղղված նաև նախորդ տարիներին կասեցված, այդ թվում՝ հասարակական հնչեղություն ունեցող քրեական գործերի բացահայտումը: Ասեմ, որ միայն անցյալ տարի այս ոլորտում արձանագրվել է 80 տոկոսից ավելի աճ, ինչը չի կարող չամրապնդել հավատը ոստիկանության սկզբունքայնության հանդեպ:
Այս երկու ուղղություններով, գումարած նաև հանցագործությունները գրանցումից թաքցնելու արատավոր պրակտիկայի բացառումը, կարծում եմ, հաջողություններ ունենք, ունենք նաև գործընթացն անշրջելի դարձնելու վճռականություն և այդպես էլ շարունակելու ենք: