Չարենցավանում 20-ամյա աղջիկը ծախսել է ծնողների հավաքած 5 մլն դրամը, ապա սուտ հաղորդում տվել. նախաքննություն

Կոտայքի մարզի Չարենցավան քաղաքի 20-ամյա բնակչուհի Տաթեւիկ Ս.ն մեղադրվում է սուտ մատնություն տալու մեջ: Այս մասինNEWS.am-ը տեղեկացավ Դատական տեղեկատվական համակարգից:

Ըստ մեղադրական եզրակացության՝ Տաթեւիկը ծնողների կողմից տանը հավաքված գումարը՝ 5 մլն դրամը ծնողներից գաղտնի ծախսել է ընկերների հետ: Մասնավորապես՝ մինչեւ 2014թ. հոկտեմբերը Տաթեւիկը գումարը ծախսել է  Վազգեն Մ.-ի հետ, ապա մինչեւ 2015թ. հունիսը՝ Տարոն Խ.-ի հետ: Տանն այլեւս գումար չի մնացել, այդ պատճառով հորից վախենալով՝ Տաթեւիկը հունիսի 20-ին խառնել է տան իրերը, ապա կապկպել ինքն իրեն, օգնության է կանչել ազգականին, ապա զանգահարել է ոստիկանություն: Նա առանձնապես խոշոր չափերով գույքի հափշտակությամբ կատարված ավազակային հարձակման վերաբերյալ տվել է սուտ հաղորդում, ինչի հետեւանքով խաթարվել է իրավապ մարմինների նորմալ գործունեությունը, որոնք հարկադրված ուժեր եւ միջոցներ են վատնել չկատարված հանցագործության համար:

Տաթեւիկ Ս.-ին մեղադրանք է առաջադրվել Քրեական օրենսգրքի 333-րդ հոդվածի 2-րդ մասի 1-ին կետի հատկանիշներով: Խափանման միջոց է ընտրվել ստորագրություն չհեռանալու մասին: