Կոռուպցիայի դեմ պայքարող Հովիկ Աբրահամյանի անձնական հարստությունը` միջազգային մամուլի ուշադրության կենտրոնում

Լայնորեն գովազդված հակակոռուպցիոն արշավը Հայաստանում վատ մեկնարկ է ունեցել, քանի որ հարցեր են բարձրացել կոմիտեի առաջատար կառավարական անդամների ծախսերի ու եկամուտների վերաբերյալ։ Խոսքը վերաբերում է նաև վարչապետին։

Հակակոռուպցիոն խորհուրդը, որը միջոցներ է ստանում ԵՄ-ից և Միջազգային զարգացման ԱՄՆ գործակալությունից, պաշտոնապես սկսել է գործողությունները հուլիսի վերջին։

Հոդվածագիր Մարիաննա Գրիգորյանը Eurasianet.org-ի իր հոդվածում հիշեցնում է, որ 2014-ին Transparency International-ը 175 երկրների վարկանիշում Հայաստանը տեղավորել է 94-րդ հորիզոնականում՝ ըստ հանրային ոլորտում առկա կոռուպցիայի վերաբերյալ պատկերացումների։ Կառավարությունն արդեն վաղուց դատապարտում է կոռուպցիան, սակայն ձախողում հետաքննել կամ հետապնդել խախտումների մեջ կասկածվող պաշտոնյաներին։

Խորհրդի բացման ելույթում վարչապետ Հովիկ Աբրահամյանը շեշտել է, որ կառույցն ունի կամք և վճռականություն՝ պայքարելու կոռուպցիայի դեմ և ձևավորելու օրինապահ և բարեխիղճ ծառայողների մի ողջ դաս։ Սակայն հակակոռուպցիոն արշավում Աբրահամյանի առաջնորդության համապատասխանությունն ինքնին հարցականի տակ է։ Հոդվածագիրը հղում է անում Աբրահամյանի կատարած մի քանի թանկարժեք մասնավոր թռիչքների մասին կառավարական արձանագրություններին։ Թռիչքների համար պայմանագրերը ստորագրվել են նույն օրը, երբ վարչապետը պաշտոնյաներին կոչ է արել գումար խնայել և բաց թողնել ոչ էական արտասահմանյան ուղևորությունները։ Հայաստանն այլևս ազգային ավիաընկերություն չունի։ Նշվում է, որ հուլիսի 3-ին կառավարությունը մասնավոր թռիչքներ իրականացնող Air Training Centre-ին վճարել է 31,448 մլն դրամ՝դեպի Փարիզ ուղևորության համար։

Հայաստանում 3 մլն բնակչության մոտ 1/3-ն ապրում է աղքատության մեջ, ամսական միջին անվանական աշխատավարձը կազմում է մոտ 383 դոլար։

Աբրահամյանը հրաժարվել է մեկնաբանություն անել ճամփորդական ծախսերի վերաբերյալ։ Անցած տարի նա խիստ քննադատության առերեսվեց, երբ փաստաթղթերն ի հայտ բերեցին, որ նա վերանորոգել է իր գրասենյակն ավելի քան կես մլն դոլարով՝ առանց մրցույթի անցկացման։

Վարչապետի անձնական հարստությունը նույնպես հայտնվել է մանրադիտակի տակ։ Հայաստանի Սահմանադրությամբ՝ կառավարության անդամներին չի թույլատրվում ներգրավված լինել բիզնեսում՝ շահերի բախումից խուսափելու համար։ Սակայն վարչապետը կասկածվում է մի շարք մասնավոր ընկերությունների վերահսկման մեջ՝ գազալցակայաններից մինչև խաղատներ։

Նրա շռայլ կենսակերպն ուշադրության կենտրոնում հայտնվեց վերջերս, երբ 1in.am-ը տեսանյութ հրապարակեց Երևանում նրա նորակառույց տներից մեկից։ Աբրահամյանը ձեռնարկատեր հարազատներով խորհրդի միակ պաշտոնյան չէ։ Շրջանառվում է նաև ֆինանսների նախարար Գագիկ Խաչատրյանի անունը, որը կապված է մի շարք բիզնեսների հետ՝ Ucom-ից մինչև սննդի մի քանի ներկրողներ, ինչպես նաև «Նոր Զովք» սուպերմարկետների ցանց։

Այս ֆոնին ընդդիմադիր կուսակցություններն ու ՀԿ-ներն ասում են, որ չեն վստահում Հակակոռուպցիոն խորհրդին։ Հայաստանի շատ քաղաքացիներ նույնպես թերահավատորեն են վերաբերվում։մանրամասն ՝այստեղ: