Մեզ միայն մի բան է տանջում ու ուզում ենք, որ գոնե դատավարության ընթացքում էդ ոճրագործը ասի, թե ինչու հենց քրոջս տունը...

«Հնարավոր չէ, որ իրենք դռները բաց թողնեին, կարող է ընդհանուր փականով փակած չլինեին, բայց կար փոքրիկ փական, որն անպայման ֆռացնում փակում էին: Բայց, որ բաց թողած լինեին դռները, դա սուտ է: Հետո էլ, էդ նույն փողոցի վրա էնքան անտեր դռներ կային, որ մի հատ հենվեիր դռանը ինքն իրեն կբացվեր, այնպես, որ էդ բացահայտ սուտ է, դաժան հեքիաթ: Մենք համոզված ենք, որ Պերմյակովը մենակ չի գործել.մենք դատավարության ընթացքում էլ համոզվեցինք, որ նա այդ տեսակ մարդասպանի նման չէր: Միանշանակ Պերմյակովին օգնողներ են եղել, ինքը կյանքում մենակ չէր կարող էդքան սպանություններ անել: Հետո փաստ է, որ մարդիկ քնել են տարբեր սենյակներում, ու եթե ինքը այդ տանը ընդհանրապես ծանոթ չէր կամ մատնանշված տուն չէր, ինչպես կարողացավ իմանալ, որ տարբեր սենյակներում մարդիկ կան քնած:Պարզ է, որ նրան ինչ-որ մեկը մատնացույց է արել քրոջս տունը, հետո էլ հաստատ քույրս քնած չէր լինի, որովհետեւ իր ստամոքսը ցավում էր երկու օր շարունակ  գիշերները հանգիստ քնել չէր կարողանում: Մեզ միայն մի բան է տանջում ու ուզում ենք, որ գոնե դատավարության ընթացքում էդ ոճրագործը ասի, թե ինչու հենց քրոջս տունը, ինչու հենց Ավետիսյանների ընտանիքը վերացրեց»,- Fnews.am-ի  հետ զրույցում անդրադառնալով, թե ինչը կարող էր պատճառ հանդիսանալ Վալերի Պերմյակովի համար, որ այդքան սառնասրտությամբ ու առանձնակի դաժանությամբ սպաներ Ավետիսանների յոթ հոգանոց ընտանիքը, ասաց սպանված Հասմիկ Ավետիսյանի քույրը:

Հիշեցնենք նաեւ, որ օգոստոսի 12-ին 102-րդ ռուսական ռազմակայանի զինծառայող Վալերի Պերմյակովը, դատապարտվեց 10 տարվա ազատազրկման` զենքով դասալքության, զենք եւ զինամթերք գողանալու եւ դրա անօրինական ձեռքբերման, փոխանցման, պահպանման, տեղափոխության եւ կրման հանցագործությունների համար նախատեսված ՌԴ քրեական օրենսգրքի երեք հոդվածով: Մեղադրյալն ընդունել է դասալքության եւ ապօրինի զենք-զինամթերք կրելու մասով ներկայացված մեղադրանքները: Դատապարտյալը պատիժը կկրի խիստ ռեժիմով գաղութում:

Տաթեւիկ Աբրահամյան