Ինձ ոչ ոք չի կարող իմ որոշումներից հետ պահել. Տիգրան Խաչատրյանի մասնակցությամբ ծեծկռտուքից տուժածների հայր

«Առաջին լրատվական»-ի զրուցակիցն է Գորիսում մայիսի 2-ին Սյունիքի մարզպետի որդու՝ Տիգրան Խաչատրյանի մասնակցությամբ ծեծկռտուքից տուժած Զաքարյանների հայրը՝ Գագիկ Զաքարյանը։

–Պարոն Զաքարյան, ինչպե՞ս եք գնահատում մինչև այս պահը գործի քննությունը։ Արդյոք կա՞ վստահություն Հայաստանի իրավական համակարգի նկատմամբ։

-Միշտ ունեցել եմ այն վստահությունը, որ պետք է արդար քննություն իրականացվի, իսկ այս ընթացքում գործում շեղումներ չեմ նկատել։

-Ինչպե՞ս է զգում Ձեր որդին իրեն, արդեն քանի՞ վիրահատություն է իրականացվել։ Բժիշկները այն ժամանակ ձեզ ասում էին, որ անհնար է վերականգնել տեսողությունը։ Վերջերս, սակայն, Սուրիկ Խաչատրյանի խորհրդական Վոլոդյա Հովհաննիսյանը իր հարցազրույցներից մեկում ասել էր, որ Հարությունը աչքի հետ կապված ոչ մի պրոբլեմ չի ունեցել, պարզապես աչքի արյունազեղում է ունեցել, ինչը վիրահատությամբ վերացվել է։

-Ոչ թե անհնար է վերականգնել, այլ անհնար է նույնիսկ աչքը պահպանել։ Ես ասել եմ, նորից կարող եմ կրկնել, որ Մոսկվայում ութ առաջատար միկրովիրաբույժների կարծիքով՝ առհասարակ աչքը պետք է հեռացվեր։ Բայց պահվեց, քանի որ այն վիրաբույժը, որ վերցրեց վիրահատություն իր ձեռքը, հույս տվեց աչքը պահպանելու համար։ Երևի թե Աստված ուղարկեց, չգիտեմ, նման մարդիկ չկան, բոլորն էլ զարմացած էին, թե այդ աչքը ինչպես էր հնարավոր պահպանել։ Հիմա պայքարում ենք, հինգ վիրահատություն արդեն եղել է։ Հաջորդը կանեն հավանաբար նոյեմբեր ամսին։ Ընթացքը ցույց կտա, որովհետև աչքի ճնշման խնդիրներ կան, հիմա տղաս անընդհատ բժիշկների վերահսկողության տակ է։ Նա իրավունք չունի մեքենա նստելու, ինքնաթիռ նստելու, բարձրությունը, վայրէջքները շատ վատ հետևանքներ են թողել։ Վերջին վիրահատության համար պատճառ դա հանդիսացավ, որ եկանք Երևան` Քննչական կոմիտե, ու աչքի բիբում ճեղքված էր առաջացել։ Հիմա վիրահատությունը անցել է նորմալ, հիմա բժիշկների հսկողության տակ է։

Ինչ ասեմ, երևի այդ Վոլոդյա կոչեցյալը բժիշկ է, չգիտեմ՝ որտեղից են գալիս նրա ինքնավստահ խոսքերը, ընդհանրապես նա պետք է մի օր պատասխան տա իր խոսքերի համար։

-Խաչատրյանների ընտանիքը փորձե՞լ է Ձեզ համոզել հրաժարվել բողոքից։

-Ինձ ոչ ոք չի կարող իմ որոշումներից հետ պահել։ Ես միշտ ասել եմ, հիմա էլ կրկնում եմ՝ ես վստահում եմ մեր իրավապահ մարմիններին, իրոք վստահում եմ, ոչ թե զուտ խոսքեր եմ ասում, որովհետև այս ընթացքում զգացի, որ շատ ճիշտ քննություն է ընթանում։

-Մինչև հիմա հանրությունը միշտ տեսել է, որ միշտ փորձել են պաշտպանել Սուրիկ Խաչատրյանին և նրա ընտանիքին, բայց այս անգամ որդուն, եղբորը, եղբոր որդիներին կալանավորել են։

-Սա այնքան հնչեղ գործ էր, որ հնարավոր չէր պաշտպանել։ Օրինակ՝ ո՞նց պիտի պաշտպանեին, եթե տեղի է ունեցել այն, ինչ տեղի է ունեցել։

-Հիմա Ձեր որդին որտե՞ղ է։

-Այս պահին որդիս Մոսկվայում է, կմնա մինչև նոյեմբեր, որովհետև իրոք թույլ չեն տալիս տեղաշարժվել։

մանրամասն՝ այստեղ: