Լոռու մարզի ոստիկաններն ու քննիչները հայտնաբերել են Կուրթան գյուղում 16-ամյա տղային մահացու ելքով դանակահարած երիտասարդին. ՏԵՍԱՆՅՈՒԹ

Այսօր՝ օգոստոսի 29-ին, ոստիկանության Լոռու մարզային վարչության, ոստիկանության Վանաձորի բաժնի և Հայաստանի քննչական կոմիտեի Լոռու մարզային քննչական վարչության և նույն վարչության Ստեփանավանի քննչական բաժնի աշխատակիցները, ձեռնարկելով օպերատիվ-հետախուզական և քննչական համատեղ գործողություններ, բացահայտել են երեկ՝ օգոստոսի 28-ին, Կուրթան գյուղում 16-ամյա տղայի սպանությունը: Ինչպես Ստեփանավանից հայտնում է ֆոտոլրագրող Գագիկ Շամշյանը, նշված սպանությունը կատարելու կասկածանքով ոստիկանություն է տեղափոխվել 22-ամյա Սեյրան Գևորգյանը: Գ. Շամշյանի տեղեկություններով՝ նա ինքնակամ է ներկայացել ոստիկանություն և այդ գործում ոստիկաններին ու քննիչներին օգնել է Կուրթանի գյուղապետը: Փաստի առթիվ Հայաստանի քննչական կոմիտեի Լոռու մարզային քննչական վարչությունում հատկապես կարևոր գործերով ավագ քննիչ Երջանիկ Գևորգյանի որոշմամբ հարուցվել է քրեական գործ՝ ՀՀ քր.օր.-ի 104 հոդվածի 1-ին մասի (սպանություն) հատկանիշներով: ֆոտոլրագրողը հայտնում է նաև, որ այս պահին մարզի քննչական վարչության պետ Թաթուլ Շուշանյանի կողմից քննչական խմբի մի քանի քննիչներ դեպքի վայրում մանրակրկիտ տեղազննման աշխատանքներ են կատարում: Գ. Շամշյանի տեղեկություններով՝ քննչական խմբի քննիչներն արդեն լսել են մեծ թվով անձանց: ՀԿԳ ավագ քննիչ Ե. Գևորգյանի որոշմամբ Ս. Գևորգյանը ձերբակալվել և տեղափոխվել է ոստիկանության Տաշիրի բաժնի ձերբակալվածների պահման վայր: Ըստ տեղեկությունների՝ վաղը՝ օգոստոսի 30-ին, քննչական մարմինը դիմելու է Լոռու մարզի ընդհանուր իրավասության դատարան, որպեսզի դատարանը՝ որպես կասկածյալի, Ս. Գևորգյանի նկատմամբ որպես խափանման միջոց ընտրի երկամսյա կալանք:

 shamshyan.com

Տեսանյութ