«Դու ինչ տղա ես, որ հորդ թասիբին չես կանգնում»...Նոր մանրամասներ Կուրթան գյուղում տեղի ունեցած սպանությունից

Oգոստոսի 28-ին Կուրթան գյուղում տեղի ունեցած 16-ամյա պատանու սպանության վերաբերյալ, մեզ նոր մանրամասներ է հաջողվել պարզել, մասնավորապես, որ դանակահարող տղային` թասիբի գցել հայրը, ով էլ հենց եղել է ի սկզբանե վեճի հայհոյանքների հեղինակը: «Վեճը ավարտված է եղել, երբ հայրը եկել է տուն ու տղուն ասել, թե դու ինչ տղա ես, որ հորդ թասիբին չես կանգնում` սուս-փուս նստելու փոխարեն, արի տենանք ինչ ենք անում: Սպանվածի մեծ եղբորը կանչում են դուրս եւ նորից սկսում հայհոյել, վիրավորել: Հենց կռվի թեժ պահին էլ էդ դանակահարողը վազում է մեքենայի միջից հանում դանակը ու ալիս սկսում դանակ թափահարել: Հայրն էլ, փոխանակ հանգստացնի, տղայի ձեռքից վերցնի դանակը, ավելի է հրահրել ու թեժացրել կռիվը, արդյունքում եղավ այն` ինչ եղավ»,-այս մասին Fnews.am-ի  հետ զրույցում ասաց Կուրթան գյուղի գյուղապետ Գեւորգ Գեւորգյանը, ով ի դեպ ազգակցական կապի մեջ է եւ սպանվածի եւ սպանողի հետ:

Հիշեցնենք, որ 2015 թվականի հունվարի 17-ին՝ ժամը 18:10-ին, Ստեփանավանի բժշկական կենտրոնից ահազանգ է ստացվել, որ կրծքավանդակի ձախ ստորին կողմնային պատի կտրած-ծակած, թափանցող վերքով բուժօգնության է դիմել Լոռու մարզի Կուրթան գյուղի բնակիչ Հ.Առաքելյանը:
Դեպքի առթիվ նույն օրը ՀՀ քննչական կոմիտեի Լոռու մարզային քննչական վարչության Ստեփանավանի քննչական բաժնում հարուցվել է քրեական գործ՝ ՀՀ քրեական օրենսգրքի 112-րդ հոդվածի 1-ին մասով:
Օրենքով սահմանված կարգով ձեռք բերված ապացույցների համակցությամբ պարզվել է, որ Լոռու մարզի Կուրթան գյուղի անչափահաս բնակիչը (ծնված 1997 թվականի հունվարի 28-ին) համագյուղացի Թամարյանին պարտված գրազը մարելու շուրջ 2015 թվականի հունվարի 17-ին՝ ժամը 17-ի սահմաններում, նույն գյուղի «Զավոդի տարածք» կոչվող տեղանքում կայացած պարզաբանման ընթացքում վիճաբանության մեջ է մտել համագյուղացիներ Ս.Օչինյանի և Հ.Առաքելյանի հետ։
Վիճաբանության ընթացքում իրեն անպատվելու և քաշքշելու կապակցությամբ վրեժխնդիր լինելու շարժառիթով անչափահաս բնակիչը նախապես իր հետ վերցրած դանակով մեկ անգամ հարվածել է Հ.Առաքելյանի կրծքավանդակի ձախ ստորին կողմնային շրջանին։ Հարվածի հետեւանքով վերջինիս պատճառվել է կյանքի համար վտանգավոր մարմնական վնաս` կրծքավանդակի ձախ կեսի ծակած-կտրած թափանցող վերքի, 12-րդ կողոսկրի մասնահատումի, ձախակողմյան պնևմոթորաքսի ձևով:
Հիշյալ հանցագործությունը կատարելու կասկածանքով Կուրթան գյուղի 17-ամյա բնակիչը հունվարի 17-ին ձերբակալվել է, իսկ 2015 թվականի հունվարի 20-ին նրան մեղադրանք է առաջադրվել ՀՀ քրեական օրենսգրքի 112-րդ հոդվածի 1-ին մասով։ Նրա նկատմամբ որպես խափանման միջոց է ընտրվել կալանավորումը՝ 2 ամիս ժամանակով:
Նախաքննությունը շարունակվում է:

Նոնա Ադամյան