«Ի՞նչ աճ, գուցե իրենք իրենց գրպաններում զգում ե ՞ն էդ աճը, բայց մարդիկ իրենց մաշկի վրա դա հաստատ չեն զգում»...

Այս տարվա առաջին կիսամյակի տվյալներով` ՀՀ տնտեսությունն աճել է շուրջ 4 %-ի չափով, այս մասին ի լուր աշխարհի հայտարարել էր ՀՀ վարչապետ Հովիկ Աբրահամյանը` վկայակոչելով Ազգային վիճակագրական ծառայության հրապարակած տվյալները:

Նրա խոսքերով, այս կիսամյակի վերջին ամիսներին գյուղատնտեսության ոլորտում արձանագրված աճը զգալիորեն մեղմել է տրանսֆերտների էական անկումը: Ընդ որում, վարչապետի խոսքերով, ՀՆԱ-ի աճը երկրորդ եռամսյակում կազմել է 5,1 %, ինչը նախորդ եռամսյակի 2,5 %-անոց աճի հետ համադրվելով` բերել է 4,4% կիսամյակային աճի:
Վարչապետը գոհունակություն էր հայտնել նաև արտահանման ներկա վիճակի վերաբերյալ. «Մենք այսօր, նախկինի համեմատ, ավելի շատ երկրներ ենք ապրանքներ արտահանում»,-նշել էր նա` հանձնարարելով տնտեսության ոլորտի բոլոր գերատեսչություններին հանրությանը մանրամասն ներկայացնել կիսամյակի տնտեսական արդյունքները:

Այնինչ, ՀՀ ֆինանսների նախարար Գագիկ Խաչատրյանը, նախօրեին ԱԺ ֆինանսավարկային եւ բյուջետային հարցերի մշտական հանձնաժողովի նիստում խոսելով բյուջեի կատարողականի մասին, հակառակը հաստատող հայտարարություն արեց նշելով.«Երբ մենք անդամագրվեցինք Եվրասիական տնտեսական միությանը (ԵՏՄ), մեզ համար անորոշությունները շատ-շատ էին, հիմա էլ շատ են, այնքան, որ չենք կարող կանխատեսել, թե հաջորդ օրը ինչ տնտեսական վիճակի մեջ կհայտնվենք: Բյուջեի կատարողականի տեսանկյունից եւ առկա իրողություններից պոզիտիվ սիգնալներ մեզ չեն գալիս: Անկախ վիճակագրական տվյալներից, տնտեսության ճյուղերի զարգացումները մտահոգիչ են: Հարկային կատարողականը առաջին եռամսյակի համար առաջանցիկ է, բայց դա շատ չի ոգեւորում: Սահմանին ԱԱՀ ենք կորցնում, մաքսատուրքերը չեն կոմպենսացվում, գրեթե բոլոր ճյուղերում ծավալների անկում ունենք»:

Իսկ թե ինչո՞վ էր պայմանավորված Հովիկ Աբրահամյանի ու ֆինանսների նախարար Գագիկ Խաչատրյանի հայտարարությունների հակասությունները, եւ թե արդյո՞ք հասարակությունը իր մաշկի վրա զգում է Հովիկ Աբրահամյանի պատկերացած տնտեսական աճի հետեւանքները, Fnews.am-ը փորձեց ստանալ ռեժիսոր, դերասան Աշոտ Ադամյանի մեկնաբանությունը.

-Ես վաղուց եմ այդ մասին իմ կարծիքը ասել, եւ հիմա էլ կրկնում եմ, որ տնտեսական աճ ասվածը դա ծիծաղելի կատեգորիա է. հետեւաբար այդ անլուրջ խոսակցությունները որեւէ արդյունք տալ չեն կարող: Ինչ խոսք, տնտեսական աճ մենք չունենք. իրենք իրենց վերցնում ու հայտարարում են ՝4,4 տոկոս տնտեսական աճ.ի՞նչ աճ, գուցե իրենք իրենց գրպաններում զգում ե ՞ն էդ աճը, բայց մարդիկ իրենց մաշկի վրա դա հաստատ չեն զգում:
Ինչ վերաբերում է վարչապետի ու նախարարի հայտարարությունների հակասությանը, ապա դա պայմանավորված է նրանով, որ ոչ կոմպետենտ մարդիկ իրենց քթին ոչ հասու բարձր տրամաչափի պաշտոններ են զբաղեցնում. իրենք կարող են «մխտռել » ամեն ինչ:
Քանի որ իրենք էլ չգիտեն թե ինչպես են դրական ցուցանիշները ստանում եւ ապահովում էդ տնտեսությունում, հետեւաբար ում խելքին ինչ փչում՝ ասում է: Իսկ առկա տարաձայնությունները կառավարության ներսում հուշում է մի բանի մասին, որ կառավարությունն ինքն էլ իրենից տեղյակ չի. ուստի ի՞նչ թվերի մասին կարելի է խոսել:

-Չմոռանանք, որ ՀՀ կառավարությունը երկրի ղեկավարությանը մի քանի առանցքով հաշվետու է: Իհարկե, նորմալ երկրում առաջին հերթին պետք է հաշվետու լիներ հասարակությանը: Հիմա ըստ Ձեզ Հովիկ Աբրահամյանը փորձում է ցույց տալ, որ հայոց կառավարությունն էլ է՞ հաշվետու, թե՞ ֆոն է ստեղծում, որ իր վարչապետի աթոռին բազմելը ամենեւին վատ հետեւանքներ չի ունեցել ՀՀ-ի համար: Հիմա ինչ.ՀՀ վարչապետը ստում է՞, թե՞... 

-Նորմալ երկրներում նման մարդիկ վարչապետության կամ կառավարման համակարգում պարզապես չէին լինի: Եթե պատահաբար էլ հայտնվեին, ժողովուրդը նրանց կստիպեր հեռանալ՝տեղն ու տեղը:
Քանի դեռ ավազակները չեն հեռացել կառավարման համակարգից, ապա որեւէ դրական տեղաշարժի ու հեռանկարի մասին մտածելն անգամ ավելորդություն է:

Fnews.am