«Դա նրանց համար ոչ թե ռազմական ինստիտուտ է եղել, այլ զոն, որտեղ ուժ գործադրելով փորձել են իրենց կոպիտ ասած "լավ տղա" ձեւանալ»

«Բոլոր չորսին էլ նոր մեղադրանքներ են ավելացրել, որոնք ապացուցում են, որ մինչեւ Հայկազիս սպանությունը` չորս ամիսների ընթացքում ինչով են զբաղված եղել նրանք այնտեղ: Իսկ նախաքննությամբ պարզվել է նրանց հիմնական զբաղմունքը եղել է` ծեծ, ջարդ, կուրսանտներին նվաստացնել: Դա նրանց համար ոչ թե ռազմական ինստիտուտ է եղել, այլ "զոն", որտեղ ուժ գործադրելով փորձել են իրենց կոպիտ ասած "լավ տղա" ձեւանան, որ մնացած էրեխեքը իրենց ենթարկվեն»,-Fnews.am-ի հետ զրույցում անդրադառնալով կուրսանտ Հայկազ Բարսեղյանի դաժան սպանության գործի նախաքննությամբ պարզված որոշ մանրամասների  ասաց կորսանտի հայրը՝ Արկադի Բարսեղյանը:
Նշենք, որ երկուշաբթի օրը կողմերին է հանձնվել նախաքննության նյութեր, նախաքննությունը ավարտվել է:

Հիշեցնենք, որ հունվարի 29-ին՝ ժամը 06:35-ի սահմանում Երևանում տեղակայված ուսումնական զորամասերից մեկի մարզահրապարակում հայտնաբերվել էր նույն զորամասի 1 ին կուրսի ուսանող Հայկազ Արկադիի Բարսեղյանի դին՝ պտտաձողի վրա պարանով կախված վիճակում:

Դեպքի առթիվ ՀՀ քննչական կոմիտեի զինվորական քննչական գլխավոր վարչությունում հարուցվել է քրեական գործ՝ ՀՀ քրեական օրենսգրքի 104-րդ հոդվածի 2-րդ մասի 7-րդ կետով, ստեղծվել է քննչական խումբ։ Զինծառայող Հ.Բարսեղյանին սպանելու կասկածանքով ձերբակալվել են համածառայակիցներ՝ Վաչե Սահակյանը, Մովսես Ազարյանը, Գնել Թևոսյանը և Նորիկ Սահակյանը:

Տաթեւիկ Աբրահամյան