Քննիչն ասել է՝ քրոջդ անունը տուր, այդ դեպքում չես դատապարտվի, իսկ քրոջդ էլ չենք բռնի, քանի որ Հայաստանում չի. թրաֆիքինգի գործով դատապարտյալ

Սեռական շահագործման նպատակով կանանց թրաֆիքինգի մեջ մեղադրվող Հերիքնազ Խաչատրյանն այսօր հրաժարվեց ցուցմունք տալ՝ հայտարարելով, որ այսօր ի վիճակի չէ ցուցմունք տալ:

«1,5 տարի նստած եմ, չգիտեմ ինչի համար, եթե ես արած լինեմ, չեմ վախենա պատասխան տալուց»,- ասաց ամբաստանյալը՝ դժգոհելով նաև դատական նիստերը երկար ընդմիջումներով նշանակելուց: «Հոգեկանս խանգարվում է, նիստերը ամիսներով հետաձգվում է»,- ասաց նա:

Իսկ մինչ այդ այսօր շարունակվեց գործով ամբաստանյալի քրոջ՝ 11,5 տարվա ազատազրկման դատապարտված Բավական Խաչատրյանի հարցաքննությունը: Նա այսօր ևս պնդեց, որ քննիչի մոտ քրոջ դեմ ցուցմունք է տվել, քանի որ իրեն ծեծել ու սպառնացել են՝ կորզելով իրենց ցանկալի ցուցմունքը:

Ըստ դատապարտյալի՝ քննիչն իրեն ասել է, որ քրոջ՝ Հերիքնազի անունը տալու դեպքում ինքը չի դատապարտվի, իսկ քրոջն էլ չեն բռնի, քանի որ Հայաստանում չի: Ավելին, դատապարտյալի խոսքով՝ քննիչն իրեն խոստացել է, որ դատարանից տուն է գնալու:

Գործով բոլոր տուժողների այն պնդումները, թե Բավականը զանգահարել է քրոջը՝ Հերիքնազին, և թե տուժողներն անգամ Հերիքնազի հետ հեռախոսազրույց են ունեցել, դատապարտյալը հերքեց՝ պնդելով, որ ինքը քրոջ հետ ընդհանրապես կապ չի ունեցել: Նա հայտարարեց նաև, որ տուժողներից 2-ին ինքը գումար է տվել և երբ ետ է պահանջել այն, նրանք իր դեմ ցուցմունք են տվել:

Բավականի տված ցուցմունքներում առկա էական հակասությունների պատճառով հրապարակվեցին նրա նախաքննական ցուցմունքները:

Մասնավորապես, նախաքննական մարմնին նա հայտնել էր, որ քույրը՝ Հերիքնազը, 2006թ. գտնվել է Դուբայում, զբաղվել է մարմնավաճառությամբ, անգամ իրենց գումար է ուղարկել: Հերիքնազն իրեն առաջարկել է Հայաստանից Դուբայ երիտասարդ և գեղեցիկ աղջիկներ ուղարկել՝ մարմնավաճառութամբ զբաղվելու նպատակով, նրանից յուրաքանչյուրի համար իրեն 600 ԱՄՆ դոլար վճարելու պայմանով:

Ըստ նախաքննական ցուցմունքների՝ Դուբայ մեկնող կանանցից մեկը մարմնավաճառ է եղել, մյուսը ամուսնալուծված, երրորդը Դուբայ չի հասել, քանի որ օդանավում տեղեկանալով, թե ինչով է զբաղվելու, վիզան պատռել է ու ետ վերադարձել Հայաստան: Իսկ մյուս երկուսն էլ, տեղեկանալով, թե ինչով են զբաղվելու Դուբայում, հրաժարվել են մեկնել:

Նախաքննության ընթացքում որպես կասկածյալ տված ցուցմունքում Բավականն ընդունել է առաջադրված մեղադրանքը և հայտնել, որ կատարվածի համար զղջում է, իսկ որպես մեղադրյալ տված ցուցմունքում մասնակի է իրեն մեղավոր ճանաչել՝ հայտնելով, որ տուժողներից մեկին նա ստել է և ասել, որ Մոսկվա է մեկնում, այնինչ աղջիկը Դուբայ է մեկնել:
մանրամասները՝pastinfo.am-ում: