Խարբերդում 2 տղամարդ «կայֆավատ լինելով» դաժանաբար ծեծել են 50-ամյա կնոջն ու նրա կրծկալի միջից իբր տարել են 500 հազար դրամ

Շենգավիթ վարչական շրջանի ընդհանուր իրավասության դատարանում Ալեքսանդր Ազարյանի վարույթում է Գարիկ Միրզոյանի, Սարգիս Սերգոյանի, ինչպես նաև Գարեգին Հ.-ի գործերի քննությունը:

Ըստ մեղադրանքի՝ 2014 թվականի հոկտեմբերի 19-ին, ժամը 22-ի սահմաններում 32-ամյա Գարիկն ու Գարեգինը, ինչպես նաև Սարգիսը գտնվել են Նոր Խարբերդում ապրող Արմեն Մ.-ի տանը:

Այնտեղ նրանք հանդիպել են գործով տուժող կնոջը՝ Գրետային (անունը փոխված է):

Առաջադրված մեղադրանքի համաձայն՝ Գարիկն ու Գարեգինը «գումարային պահանջ են ներկայացրել» Գրետային և նրա նկատմամբ վտանգավոր բռնություն են գործադրել՝ ոտքերով ու ձեռքերով, ինչպես նաև «որպես զենք օգտագործված բաժակներով ու հախճասալիկով» նրանք հարվածներ են հասցրել Գրետային, նրա առողջությանը պատճառել են միջին ծանրության վնաս ու նրա կրծկալի միջից հափշտակել են 500 հազար դրամ:

Տուժողի գրպանից, առանց նրա նկատմամբ վտանգավոր բռնություն գործադրելու, 42-ամյա Սարգիսն էլ՝ Արարատի մարզի բնակիչ, իր «բաժինն է տարել»՝ բացահայտ հափշտակել է 8 հազար դրամ և փախել է:

Գարիկին ու Գարեգինին մեղադրանք է առաջադրվել ավազակային հարձակման համար՝ ՀՀ քրեական օրենսգրքի 175 հոդվածի 2-րդ մասի 4-րդ կետով, իսկ Սարգիս Սերգոյանին՝ կողոպուտի համար՝ ՀՀ քրեական օրենսգրքի 176 հոդվածի 1-ին մասով:

Նախաքննության ընթացքում կատարված փորձաքննությամբ պարզվել է, որ ավազակության համար մեղադրվող Գարեգին Հ.-ն քրեական օրենքով արգելված արարքը կատարել է անմեղսունակության վիճակում:

Նրա մասը գործից առանձնացվել է: Դատարանը Գարեգինի մասով քննության է առնելու նրա նկատմամբ բժշկական հարկադրանքի միջոց կիրառելու հարցը:

Գարիկ Միրզոյանի խափանման միջոցը կալանավորումն է, իսկ ավելի թեթև հանցանքի համար մեղադրվող Սարգիս Սերգոյանի խափանման միջոցը ստորագրությունն է չհեռանալու մասին:

Ամբաստանյալների շահերի պաշտպանները հայտնեցին, որ տուժողը, ով դատական նիստին խոստացել էր ներկայանալ, սակայն այդպես էլ չներկայացավ, նախկինում մի քանի անգամ դատապարտվել է խարդախությունների համար: Նա 50-ն անց կին է:

Տեսականորեն հնարավոր է, որ այդ կինն իր կրծկալի մեջ ունենար կես միլիոն դրամ, իսկ գրպանում՝ 8 հազար դրամ, բայց գործնականում այդպես եղել է, թե ոչ՝ ցույց կտա գործի քննությունը:

Ըստ պաշտպանական կողմի՝ այժմ էլ կան մարդիկ, ում այս գործով տուժողը գումարներ է պարտք…

Ամբաստանյալ Գարիկ Միրզոյանի մայրը մեր զրույցի ժամանակ հայտնեց, որ որդին դեպքից ոչ շատ առաջ էր Ռուսաստանից եկել Հայաստան: Կարճ ժամանակ պիտի մնար ու կնոջ հետ մեկներ Ռուսաստան: Նա մոտ մեկ տարի առաջ է ամուսնացել, երեխաներ չունի: Գարիկի եղբոր 10-ամյա որդին էր եկել դատարան, ով Գարիկին տեսնելով՝ սկսեց մանկականորեն անմիջական ու պարզ արցունքներով լաց լինել: Գարիկի մայրն ասաց՝ երեխան հոպարին էնքան է սիրում, որ եկել է նրան տեսնի ու նոր մեկնի ծնողների մոտ՝ Ռուսաստան…

Գարիկի մոր վարկածով՝ դեպքի օրը Գարիկն ու Գարեգինը Նոր Խարբերդում մտել էին թզբեհներ սարքող Արմենի տուն և այնտեղ տեսել էին տուժողին՝ հարբած վիճակում: Սկսել էին ծաղրել նրան, ասել էին՝ «քո վրա կայֆավատ ենք ըլնում»: Տուժողն էլ ասել էր՝ «գնացեք ձեր մայրիկների վրա կայֆավատ էղեք»:

մանրամասները՝1-in.am-ում: