Պատգամավորը զենքով գործողություններ է կատարել.զարիժատ՛՛ է արել ու հայհոյախառն սպառնալիքներ տվել. ՛՛ասում էր՝ քո սենցը՝ սենց եմ անելու...

ԱԺ պատգամավոր Կարո Կարապետյանի ՛՛խաթր՛՛ գրված մեղադրանքի մոտիվներով կարելի է մի ՛՛հիպերֆանտաստիկ՛՛ /Զադոյանի բնորոշումն է/ կոմեդիա բեմադրել գլխավոր դատախազության հարևանությամբ գտնվող Պարոնյանի անվան կոմեդիայի պետական թատրոնում, իսկ այդ ՛՛կոմեդիայի՛՛ գլխավոր հերոս Կարոյի կրակոցներից տուժած Արթուր Զադոյանին՝ նշանակել բեմադրող ռեժիսոր: Նա զվարճանալու աստիճան պատկերավոր է ներկայացնում մեղադրանքը:

Ա. Զադոյանը դատաքննության ընթացքում 15-20 անգամ արդեն կրկնել է 2009թ-ի հոկտեմբերի 5-ի եղելությունը, թե ինչպես է պատգամավորը մեքենայի մեջ հայհոյելով ու սպառնալով հանել զենքը, մարտական վիճակի բերել և փորձել կրակել իրեն՝ Զադոյանին: Պատգամավորը առերես հարցաքննության ժամանակ ընդունել է դա՝ նշելով, որ եթե ՛՛աբոյման՛՛ չընկներ՝ մեքենայի մեջ էր խփելու: Սակայն դա չի հաջողվել, քանի որ Զադոյանը մեքենայում հայտնաբերած ՛՛լոմիկով՛՛ փորձել է հարվածել պատգամավորի ձեռքին, բայց քանի որ գլուխը մեծ է եղել և առաջ է բերել, հարվածը դիպել է նրա գլխին և ժամանակավորապես կանխվել է կրակոցը: Այդ ընթացքում Զադոյանը հասցրել է՝ իջնել մեքենայից և մոտ 10 մետր հեռանալ, սակայն նրան չի հաջողվել այդկերպ խուսափել ռեալ վտանգից. Կարոն հետևից իջել ու կրակել է, որոնցից երկուսը դիպել են Զադոյանի աջ ձեռքին և աջ ոտքին՝ հասցնելով կյանքին վտանգ սպառնացող վնասվածքներ:

Սեպտեմբերի 22-ի նիստում դատարանը հետաքրքրվեց Զադոյանից, թե մեքենայի մեջ Կարոյի ձեռքին զենք տեսե՞լ է, թե՞ ոչ, նա սպառնացե՞լ է իրեն, թե՞ ոչ, եթե՝ այո, ապա ի՞նչ սպառնալիքներ է հնչեցրել: Զադոյանը նշեց, որ պատգամավորը զենքով գործողություններ է կատարել. փոխանցման տուփի մոտից այն վերցրել և ՛՛զարիժատ՛՛ է արել ու հայհոյախառն սպառնալիքներ տվել. ՛՛ասում էր՝ քո սենցը՝ սենց եմ անելու: Էլ սպառնալիքը ո՞նց է լինում...Ամոթ է, կրկնե՞մ...՛՛:

Զադոյանը ձևակերպում էր մեղադրանքի տրամաբանությունը և դրա հետ կապված հարցադրումներ հնչեցնում: Ըստ մեղադրանքի՝ դրա ՛՛հիմնասյուն՛՛ չորս անձինք՝ Կարոն, նրա վարորդ Օնիկը և գազալցակայանի երկու բանվորները պնդում են, որ կրակոցների ժամանակ Զադոյանը Կարոյին դեմքով շրջված վիճակում է եղել՝ կռացած, և Կարոյին սպառնալով փորձել է նասկու միջից ՛՛զենք՛՛ հանել: Այդ ժամանակ էլ Կարոն կրակել է: Բայց փորձաքննությամբ պարզվել է, որ փամփուշտը Զադոյանի ոտքի հետնամասից է մտել: Եթե դեմքով եմ շրջված եղել Կարոյին՝ կռացած, փամփուշտը ո՞նց է ոտքիս հետնամասից մտել...՝ հարցնում է Զադոյանը:

Զադոյանն ասում է՝ ես զենք չեմ ունեցել, մեղադրանքի կողմն ասում է՝ ունեցել ես, վիրավորված աջ ոտքիդ ՛՛նասկու՛՛ մեջ Մակարով է եղել, որը Օնիկն է հանել, երբ դու վիրավորվել ու ընկել ես գետնին: Բայց փորձաքննությամբ պարզվել է, որ դեպքից հետո զենքի վրա ոչ Զադոյանի արյան հետք կա, ոչ Օնիկի մատնահետք, ոչ էլ Զադոյանի մարմնի ու տաբատի վրա՝ զենքի քսայուղեր ու մետաղական հետքեր: Այդուհանդերձ, քննիչ Արիս Երեմյանը նախաքննության ընթացքում փորձել է մի թեթև, ՛՛գաղտնի՛՛ քննչական փորձարարություն անել. Ըստ Զադոյանի՝ քննիչը Մակարովը դրել է նասկու մեջ, բայց զենքը չի մնացել այնտեղ, ընկել է, ուր մնաց, թե՝ քաշքշուկի և 10 մետր արագ քայլքի ժամանակ մնար, Զադոյանն էլ հաներ՝ կրակեր ...

Ի դեպ, հենց այդ դրվագի վրա էլ գործը կասեցրել էին՝ պատճառաբանելով, թե՝ Զադոյանը ծանր հիվանդ է և չի կարող Մակարովը դնել նասկու մեջ և վազել: Քոչարյանի ասած՝ բա մի տղամարդ չկա՞ր՝ այդ գործողության հարցում սահմանված կարգով փոխարիներ Զադոյանին և արձանագրեր:

մանրամասները՝lakmoes.am-ում: