Սողոմոն Քոչարյանին քառասուն րոպեն մեկ ցավազրկողներ են ներարկում, քանի որ հակառակ դեպքում ցավերից ամբողջ հարկով մեկ գոռում է...

Հայաստանի քրակատարողական հիմնարկնրում այսօր ցմահ ազատազրկման դատապարտված մարդկանց թիվը հասնում 101-ի: Այս մասին Fnews.am-ը տեղեկացավ ՀՀ ԱՆ ՔԿՀՎ լրատվության վարչության պետ Գոռ Ղլեչյանից: Ցմահ դատապարտվածներին անդրադառնալու պատճառը այս անգամ պայմանավորված է 20 տարի բանտում գտնվող ու գրեթե ողջ ընտանիքը կորցրած նախկին հետախույզ Սողոմոն Քոչարյանի առողջական վիճակը, ով օր-օրի էլ ավելի է վատանում: Հիշեցնենք, որ Սողոմոն Քոչարյանը Արցախյան պատերազմի մասնակից է, 2-րդ կարգի հաշմանդամ, ով 1995թ-ին դատապարտվել մահապատժի է: Արցախյան պատերազմի մասնակիցը մեղադրվել էր պարսկահպատակ ադրբեջանցու` Իրաջ Փուր Միրզա-Բեկի սպանության մեջ: Նա երկու անգամ իր խցակից Մհեր Ենոքյանի հետ փախել է բանտերից: Բայց վերջին մի քանի տարիների ընթացքում նրա առողջական վիճակը կտրուկ վատացել է: Իսկ նրան տարիներ շարունակ ` պատժի կրումից ազատ արձակելու որոշում այդպես էլ չէր տրվում:

 Ամեն օր հարցնում է` ես արեւի լույս կտեսն՞եմ, թե չէ...

Սակայն տեղեկացանք, որ Սողոմոն Քոչարյանին պատժի հետագա կրումից ազատելու վերաբերյալ միջգերատեսչական բժշկական հանձնաժողովը դրական եզրակացություն է տվել: Դրական եզրակացությունն ուղարկվել է Կենտրոն եւ Նորք-Մարաշ վարչական շրջանների ընդհանուր իրավասության դատարան, իսկ օրենքով սահմանված յոթ օրվա ընթացքում դատարանը նիստի օր կնշանակի: Սողոմոն Քոչարյանի ներկայիս փաստաբան Գրիշա Բալասանյանը անդրադառնալով վերջինիս առողջական վիճակին,  Fnews.am-ի հետ զրույցում նշեց, որ Սողոմոն Քոչարյանը մի քանի տարի շարունակ անընդհատ գանգատվել է  իր վիճակից, եւ որ այսօր էլ նա առողջական լուրջ խնդիրների ունի.

-Քսան տարի անազատության մեջ գտնվող, պատերազմի 2-րդ կարգի հաշմանդամ Սողոմոն Քոչարյանը տառապում է սրտի իշեմիկ հիվանդությամբ` 4-րդ աստիճանի սրտային անբավարարությամբ (իշեմիկ կարդիոմիոպաթիա), ունի հետինֆարկտային խրոնիկ անեւրիզմա, հիվանդ է նաեւ կանգային թոքաբորբով: Այս հիվանդությամբ նա ենթակա է պատժից ազատման` համաձայն Կառավարության 825-Ն որոշմամբ հաստատված պատժի կրման հետ անհամատեղելի հիվանդությունների ցանկի: Բայց օգոստոսի 26-ից մինչ այս պահը պաշտպանյալս գտնվում "Գրիգոր Լուսավորիչ" ԲԿ-ում, առողջական վիճակը ծայրահսղ ծանր է:

Այս պահին չի քայլում, չի տեղաշարժվում, բժիշկները բառիս բուն իմաստով քառասուն րոպեն մեկ ցավազրկողներ են ներարկում, քանի որ հակառակ դեպքում ցավերից ամբողջ հարկով մեկ գոռում է: Ճիշտ է, նրան հիմա որ ազատ էլ արձակեն նա այլեւս իր ոտքով չի կարողանա քայլելով տուն գնալ, բայց սա շատ մարդասիրական եւ հոգեբանական ազդեցություն կարող է ունենալ Սողոմոնի վրա, որովհետեւ նա ամեն օր հարցնում է` ես արեւի լույս կտեսն՞եմ, թե չէ:
Հուսանք, որ մոտ ապագայում Սողոմոն Քոչարյանը վերջապես կվայելի ազատության շունչը, ու կտեսնի արեւի լույսը: 

Տաթեւիկ  Աբրահամյան