Արմենին նախ ծեծել են, ապա սպանել են՝ մասնավորապես գլխի եւ մարմնի տարբեր մասերին ձեռքերով եւ ոտքերով հարվածելով

Կոտայքի մարզի Ձորաղբյուր գյուղում դաժան սպանության հերթական դեպքն է արձանագրվել: Գյուղի բնակիչ Արմեն Սարգսյանին հայտնաբերել են բնակարանում սպանված: Այս մասին Fnews.am-ի հետ զրույցում ասաց Ձորաղբյուրի համայնքապետ Միքայելյանը:
Ներկայացնելով իր ունեցած տեղեկությունները դեպքի վերաբերյալ համայքնապետը ասաց.
-Չգիտեմ ինչի համար էին ցանկացել նրան սպանել, բայց փորձաքննությամբ արդեն իսկ ապացուցվել է, որ իր իսկ կացարանում Արմենին` նախ ծեծել, ապա սպանել, մասնավորապես գլխի եւ մարմնի տարբեր մասերին ձեռքերով եւ ոտքերով հարվածել են, որից առաջացել է մահը: Թե ի՞նչն է եղել պատճառը չենք կարողանում մինչ օրս հասկանալ, ախր աշխատանք էլ չուներ, այստեղ-այնտեղ մասնավոր գործերեր էր անում` հինգ հարյուր դրամ տային, թե չէ: Էդ էլ ինքը իր խմիչքի վրա էր ծախսում:

Հիշեցնենք, որ հոկտեմբերի 15-ին Ձորաղբյուր համայնքի ղեկավարից ոստիկանության Գառնիի բաժանմունքում ահազանգ էր ստացվել, որ Ձորաղբյուր գյուղի Բանակի փողոցի հանրակացարանի սենյակներից մեկում 1974 թ. ծնված Արմեն Սարգսյանը մահացել է:

Մեկնած օպերատիվ խումբը ժամը 12.25-ին ննջասենյակի անկողնու մոտ` հատակին, հայտնաբերել է Ա. Սարգսյանի դիակը:
Արտաքին զննությամբ դիակի վրա բռնության հետքեր չեն հայտնաբերվել, սակայն աջ աչքի տակ առկա է եղել կապտուկ, որն ըստ հանգուցյալի համագյուղացի, 1961 թ. ծնված Գևորգ Ն.-ի հայտարարության` Գևորգ Ն.-ն 3 օր առաջ հարբած վիճակում դեմքով հարվածել է պատին:

Հոկտեմբերի 16-ին ստացվել է դիակի դատաբժշկական փորձաքննության եզրակացությունը, համաձայն որի` մահը վրա է հասել գլխուղեղի կենսական կարևոր ֆունկցիաների սուր խանգարումից, որը հետևանք է գանգուղեղի փակ վնասվածքի:

Ոստիկանության Կոտայքի մարզային վարչության, Կոտայքի բաժնի, Գառնիի բաժանմունքի և Աբովյանի քննչական բաժնի ծառայողների ձեռնարկած համատեղ օպերատիվ-հետախուզական և քննչական միջոցառումների շնորհիվ պարզվել է, որ Արմեն Սարգսյանին հոկտեմբերի 12-ին, ժամը 22.30-ի սահմաններում, իր բնակարանում գլխի եւ մարմնի տարբեր մասերին ձեռքերով եւ ոտքերով հարվածել է հասցրել 1989 թ. ծնված Նարեկ Ս.-ն:

Հոկտեմբերի 15-ին Ա. Սարգսյանը նշված վնասվածքներից բնակարանում մահացել է:

Փաստի առթիվ ՀՀ քրեական օրենսգրքի 112 հոդվածի 2-րդ մասի 14-րդ կետով հարուցվել է քրեական գործ:

Նարեկ Ս.-ն ձերբակալվել է:

Քննությունը շարունակվում է: