Հավանաբար վախի այն մթնոլորտը, որ նա ստեղծել է Սյունիքում, դա դեռ աշխատող գործոն է
Ազգային ժողովում Սյունիքի մարզպետ Սուրեն Խաչատրյանը պատասխանելով լրագրողների հարցերին, թե քանի տոկոս ձայն է ապահովելու հանրաքվեի ժամանակ, հավաստիացրել է, որ Սյունիքում էլի բարձր տոկոսներ են հավաքելու: Իսկ թե ինչի՞ շնորհիվ ընտրակեղծիքների՞, թե՞ ճնշումների, Խաչատրյանը պահը չի կորցրել պարծենալու, թե փոխադարձ վստահության ու սուտ չխոսելու հաշվին:
Իսկ ահա ԱԺ ՀԱԿ խմբակցության պատգամավոր Լյուդմիլա Սարգսյանը, ով «այո» է քվեարկել սահմանադրական փոփոխությունների նախագծին, Fnews.am-ի հետ զրույցում նշեց, որ ՀՀԿ-ի որոշ կարկառուն դեմքերի (ում անուններն անընդհատ կրիմինալի հետ է կապվում), այդ թվում նաեւ Սուրիկ Խաչատրյանի ներկայացվածությունը քարոզչական աշխատանքներին, իր բացասական ազդեցությունն է ունենալու «Այո»-ի քվեների վրա: Հարցին, թե Սահմանադրական բարեփոխումներից հետո, այնուամենայնիվ, կլինեն կադրային լուրջ տեղաշարժեր, թե ոչ, եւ թե արդյո՞ք դոկտորական աստիճաններ նվաճած կարկառուն ՀՀԿ-ականները կշարունակեն անպարտ մնալ եւ իրենց օրենքից վեր դասել, պատգամավորն արձագանքեց.
-Ամեն ինչ կախված է նրանից, թե սահմանադրական բարեփոխումների հիմքում ինչ նպատակ է դրված: Եթե նպատակը՝ երկրի կառավարման համակարգի փոփոխության միջոցով երկրում նպաստավոր պայմանների ստեղծումն է, ապա կուզեմ հավատալ, որ ժամանակի ընթացքում ՀՀԿ-ն վերաիմաստավորվում է եւ լրջագույնս մտածում է իր հեղինակության մասին: Կարծում եմ՝ ժամանակի ընթացքում իրենք էլ կհասկանան, թե որքան վարկաբեկիչ է, երբ իրենց կազմում ներգրավվում են մարդկանց, որոնցով առնվազն չեն կարող հպարտանալ: Միամիտ չեմ, որ հավատամ, թե Սահմանադրական փոփոխությունների արդյունքում դեկտեմբերի 7-ից մեր կյանքը փոխվելու է: Եւ ժողովուրդն էլ ավելի բարեկեցիկ ու անհոգ է ապրելու: Բայց միեւնույն ժամանակ առաջարկվող Սահմանադրությունը հույս է ներշնչում, որ իշխանության՝ ճյուղերի տարանջատման արդյունքում կլինեն շահերի բախում, իսկ այդ բախման արդյունքում արդարությունն, իհարկե, որոշակիորեն կվերականգնվի: Ես վստահ եմ, որ եթե ընդունվի Սահմանադրությունը, ապա այն կծառայի ժողովրդին: Եթե իհարկե այն անցկացվի ազատ, արդար եւ թափանցիկ ընտրությունների միջոցով:
-Իսկ ովքե՞ր եւ ի՞նչ կերպ են ապահովելու այդ ազատ, արդար եւ թափանցիկ ընտրությունները:
-Իհարկե շատ լավ կլիներ, որ քարոզարշավ իրականացնողները, այդ թվում նաեւ մարզային իշխանիկները, մաքուր կենսագրության տեր մարդիկ լինեին, եւ նրանց «Այո»-ի քարոզը շատ ավելի ազդեցիկ լիներ: Հասկանալի է, որ ցանկացած ընտրական կամպանիայի ժամանակ մարզային ղեկավարները պետք է ընդգրկվեն այդ գործընթացներում, քանի որ նրանք են, այսպես ասած, տվյալ տարածքի տերերը: Եւ նրանց խոսքն էլ, եթե շատ հաճախ ազդեցիկ չէ, ապա ինչ-որ տեղ զսպող է, քանի որ ունեն լծակներ, որոնցով կարողանում են ազդել ժողովրդի վրա: Դա ինչ-որ տեղ տրամաբանական գործընթաց է (եթե իշխանություն ես), բայց, իհարկե, կան կերպարներ, որոնց ոչ մի կերպ չեմ կարող ընկալել:
-Օրինակ:
-Նույն Սուրիկ Խաչատրյանը, ըստ իս, որեւէ պաշտոնի չպիտի լիներ: Բայց արի ու տես, որ նա առայժմ պաշտպանվում է: Հավանաբար, դա պայմանավորված է նրանով, որ նա երկար տարիներ մարզպետ է աշխատել այդ մարզում, եւ վախի այն մթնոլորտը, որ նա ստեղծել է Սյունիքում, դա դեռ աշխատող գործոն է: Եւ նրա մասնակցությունը հանրաքվեին՝ երեւի ավելի արդյունքվետ են համարում:Այդուհանդերձ, ես այն կարծիքին եմ, որ ՀՀ իշխանությունները Սահմանադրական բարեփոխումներից հետո համապատասխան հետեւություններ կանեն, եթե, իհարկե, ցանկանում են պահպանել իշխանությունն ու վերականգնել իրենց հեղինակությունը: Այսինքն՝ պետք է ազատվեն նրանցից, ովքեր ամեն ինչի ընդունակ են, եւ նրանք վստահ են, որ միեւնույն է, իրենց ամեն ինչ ներվելու է: Ինձ համար այդ կարգի մարդիկ պարզապես անընդունելի են:
Հ.Գ Հաջորդ հրապարակման շրջանակներում, Fnews.am-ը կներկայացնի նաեւ սյունեցիները կարծիքը՝մարզում տիրող տրամադրությունների, մարզպետի ունեցած վարկանիշի, ու մարզում տիրող բարոյահոգեբանական մթնոլորտի շուրջ: Եւ կպարզի, թե որքանով են սյունեցիները պատրաստ մասնակցելու առաջիկա հանրաքվեին:
Տ. Աբրահամյան