ԱԺ պատգամավոր Յուվեցի Կարոյի՝ Կարո Կարապետյանի հետ կապված քրեական գործերը տարօրինակության, երբեմն նենգության հատկանիշներ են պարունակում

 ԱԺ պատգամավոր Յուվեցի Կարոյի՝ Կարո Կարապետյանի հետ  կապված քրեական գործերը տարօրինակության, երբեմն նենգության հատկանիշներ են պարունակում և չեն տեղավորվում իրավաբանության, տրամաբանության ու բարոյականության մեջ:

2009թ-ի հոկտեմբերի 5-ի դեպքով, երբ Կ. Կարապետյանը մի քանի կրակոցներով հրազենային ծանր վնասվածքներ էր հասցրել Արթուր Զադոյանին, բայց ինքն էր դարձել տուժող, ինչպես նախաքննությունն էր տարօրինակ, այնպես էլ դատաքննությունը: Նախաքննությունն ամբողջությամբ և գլխիվայր է գործը շուռ տվել Զադոյանի վրա, դատարանն էլ ի սկզբանե չէր կարողանում զսպել պատգամավորի կամայականությունները և պատշաճ ու արդար դատաքննություն ապահովել:

Եվ այժմ, երբ դատաքննությունն ավարտվել է և դատարանը լրացուցիչ միջնորդություններն է լսում և փորձում արդար դատաքննության նշույլ ցույց տալ՝ ընդամենը մերժելով մեղադրողի ու պատգամավորի ներկայացուցչի կողմից ՛՛պասերով՛՛ ու անընդմեջ 3 անգամ արված նույն միջնորդությունը, հանդիպում է հուժկու դիմադրության:  Նոյեմբերի 18-ի նիստում դատարանը չգիտես ում ճնշմամբ արդեն 4-րդ ՛՛զախոդից՛՛ բավարարեց Կրոմվել Գրիգորյանի միջնորդությունը. թույլ տվեց հրապարակել Ա. Զադոյանի՝ որպես վկա, դեպքից մի քանի ժամ անց՝գիշերը տված ցուցմունքը, երբ նա գտնվել է  առողջական ծանր վիճակում, թմրեցնող ու ցավազրկող դեղերի ազդեցության տակ և չի  կարողացել  ամենայն ճշգրտությամբ և մանրամասնորեն ներկայացնել  հանգամանքները:

Ու չնայած Ա. Զադոյանը հիմնականում կրկնել է հետագայում տված իր ցուցմունքները, այդուհանդերձ նրա պաշտպանը միջնորդեց՝ անթույլատրելի ճանաչել դա՝ որպես օրենքի խախտմամբ ձեռք բերված ապացույց, քանի որ Արտաշատի հիվանդանոցում հարցաքննությունը կատարվել է առանց բժշկի թույլտվության՝ տեղեկանքի, գիշերը և հայտնի չէ, թե քանի ժամ է այն տևել:

Ընդ որում, հարցաքննության արձանագրության մեջ քննիչը, քերվածք թույլ տալով, հարցաքննության սկզբի ժամը նշել է ջնջումով, ինչի հետևանքով անհասկանալի է դարձել՝սկսել են հարցաքննել ժամը 21.00-ի՞ց, թե՞ 24.00-ից: Ըստ պաշտպանի՝ դա արվել է մեկ նպատակով, որպեսզի չերևա, որ Զադոյանը հարցաքննվել է գիշերային ժամին: Ըստ վերջինիս դատաքննական ցուցմունքի՝ իր հարցաքննությունն սկսել է ժամը 24.00-ի սահմաններում:

Այսինքն քննիչի անօրեն գործողությունների հետևանքով էականորեն խախտվել են Զադոյանի սահմանադրական իրավունքները, քրեադատավարական օրենսգրքի պահանջները, ինչն էլ իր հերթին ազդել է ցուցմունքի տեսքով ստացված փաստական տվյալների հավաստիության վրա: Քննիչ Մուրադյանն էլ հատվածաբար է վերցրել Զադոյանի ցուցմունքը և խեղաթյուրելով օգտագործել մեղադրանքի մեջ:

Ա. Զադոյանը միացավ միջնորդությանը և հարց ուղղեց մեղադրողին ու տուժողի ներկայացուցչին, թե որտեղի՞ց են վերցրել 57.000 դոլար պարտքի շուրջ՝ մեքենայի մեջ ծագած խոսակցությունը և դրել մեղադրանքի մեջ, որի մասին ցուցմունքներում չեն նշել ո՛չ Օնիկը, և ո՛չ էլ Կարոն: Կ. Գրիգորյանը շփոթվեց, և հարցը մնաց անպատասխան:

Պաշտպանի միջնորդության կապակցությամբ  մեղադրող Կարեն  Բիշարյանն  սկսեց ինքն իրեն հակասել. ասաց, թե Զադոյանին օրենքի խախտմամբ չեն հարցաքննել. Մասիսի հիվանդանոց ժամանած քննիչ Ավետիսյանը տեղեկանք է վերցրել բժշկից, ըստ որի չի թույլատրվել հարցաքննել Զադոյանին, քանի որ նա ի վիճակի չի եղել ցուցմունք տալու: Մոտ կես ժամ անց, վիճակի վատթարացման պատճառով նրան տեղափոխել են Արտաշատի հիվանդանոց, որտեղ թմրեցնող և ցավազրկող դեղամիջոցներ են  ներարկել ու նույն օրը հարցաքննել՝ առանց բժշկի թույլտվության: Դատախազն այդ կապակցությամբ ասաց, թե քննիչը պարտավոր չէ թույլտվություն վերցնել բժշկից,  Զադոյանն էլ չի ասել, որ ի վիճակի չի: Մեղադրողն ասաց, որ միջնորդությունը պետք է մերժվի՝ անհիմն է: 

Կրոմվել Գրիգորյանն էլ հավելեց, որ էական խախտում չկա, և այն պետք է մերժվի: Դատարանը մերժեց պաշտպանի՝ ապացույցն անթույլատրելի ճանաչելու միջնորդությունը:

Հետազոտվեց Ա. Զադոյանի և պատգամավորի առերես հարցաքննության արձանագրությունը, որոնցում Ա. Զադոյանը հիմնականում պնդել է նախկինում տված իր ցուցմունքները:

Կարոն էլ ասել է՝ սուտ է, և ներկայացրել մեղադրանքին հարմարեցված իր սցենարը, ինչը Զադոյանը որակել է հեքիաթ՝ շարունակելով պնդել իր ցուցմունքները:

Կրոմվել Գրիգորյանը փորձեց իրավիճակը փրկել՝ նշելով, թե մեկ առ մեկ  բոլոր ասածները չի հերքել: Զադոյանը հակադարձեց՝ ընդհանուր եմ հերքել. քննիչը մանրամասն չի հարցրել, որ մեկ առ մեկ հերքեի: 

Հետազոտվեց նաև 4.02.2010թ-ի Կարոյի վարորդ Օ. Հովհաննիսյանի և Ա. Զադոյանի առերես հարցաքննության արձանագրությունը. Օնիկը հերթական հակասական ցուցմունքն էր տվել՝  նշելով, թե Զադոյանի՝ մեքենան նստելուց հետո 3 մետր էլ չէինք անցել, Կարոն գլխին հարված ստացավ: Օնիկը ստելիս՝ չէր հասկացել, որ Դիմիտրովի կամրջից /որտեղից Զադոյանը նստել էր Կարոյի մեքենան/ մինչև Մարմարաշեն հաստատ 3 մետր չէ:

մանրամասները՝lakmoes.am-ում: