«Մենք գիտենք, որ Հայկն առանց այն էլ հյուծված է. Խնդրում ենք դադարեցնել հացադուլը, քանի որ նա մեզ առողջ է հարկավոր»

Կենտրոն և Նորք-Մարաշ վարչական շրջանների ընդհանուր իրավասության դատարանի բակում օդամղիչ ատրճանակով կրակոցներ արձակելու համար 9 տարվա ազատազրկման դատապարտված Հայկ Կյուրեղյանը արդեն 15 օր է,  հացադուլ է անում: Նրա հայրը՝ Արմենակ Կյուրեղյանը Fnews.am-ի հետ զրույցում տեղեկացրեց, որ ինքը այսօր է իմացել, որ իր որդին նման քայլի է դիմել. «Նրա հետ կապ չունենք,այսօր էլ պատահական եմ իմացել, ու հստակ չեմ կարող  ասել, թե ինչի համար է հացադուլ հայտարարել»,-ասաց Հայկի հայրը: Նրա խոսքով ինքը այսօր չի կարող հորդորել որդուն դադարեցնել հացադուլը. «Հստակ հացադուլի պահանջը  չգիտեմ, գուցե արդարացված է. երբ պարզեմ այդ դեպքեում նրան խորհուրդ կտամ»,-ասաց հայրը:

Այսօր ազատության հրապարակում կայացած «Նոր Հայաստան հանրային» փրկության ճակատի հավաքի ժամանակ Ժիրայր Սեֆիլյանն էլ իր հերթին խնդրեց, որ Հայկը դադարեցնի հացադուլը. «Մենք գիտենք, որ Հայկն առանց այն էլ հյուծված է: Խնդրում ենք դադարեցնել հացադուլը, քանի որ նա մեզ առողջ է հարկավոր»,- հայտարարեց Սեֆիլյանը:

Հիշեցնենք, որ 2014թ. հունիսի 12-ին մեկնարկած Շանթ Հարությունյանի գործով դատական նիստից րոպեներ առաջ արտակարգ դեպք էր տեղի ունեցել դատարանի բակում։ 31-ամյա Հայկ Կյուրեղյանը կանգնել էր մեքենայի վրա՝ օդամղիչ ատրճանակը ձեռքին եւ կրակել ոստիկանների վրա՝ վիրավորելով մի քանի ոստիկանի։ Ոստիկանները նրան վնասազերծել եւ բերման էին ենթարկել։ Կյուրեղյանի նկատմամբ մեղադրանք է առաջադրվել ՀՀ քրեական օրենսգրքի 258 հոդվածի 4-րդ մասի՝ «խուլիգանություն զենքի կամ որպես զենք օգտագործվող առարկայի գործադրմամբ», եւ 316-րդ հոդվածի 4-րդ մասի ՝ «իշխանության ներկայացուցչի նկատմամբ բռնություն գործադրելը» հատկանիշներով: Դատախազը պահանջել է նրան դատապարտել  14 տարվա ազատազրկման: