Դավթաշենում Էդմոնդը կնոջ հետ հայհոյելով «ներվերը հանգստացնելու» պահին կռվի է բռնվել և ծանր վիրավորել է 2 եղբայրների

Աջափնյակ և Դավթաշեն վարչական շրջանների ընդհանուր իրավասության դատարանում Վարդան Աբրահամյանի նախագահությամբ ընթանում է Էդմոնդ Խլոպուզյանի գործի դատական քննությունը:

26-ամյա Էդմոնդի գործողություններից, ըստ մեղադրանքի, երկու հոգի է տուժել՝ եղբայրներ Հովհաննես և Հարություն Մ.-երը: Էդմոնդը մեղադրվում է խուլիգանական դրդումներով տուժողների առողջությանը ծանր և միջին ծանրության վնաս հասցնելու համար՝ ՀՀ քրեական օրենսգրքի 112 հոդվածի 2-րդ մասի 9-րդ և 113 հոդվածի 2-րդ մասի 6-րդ կետերով:

Ըստ մեղադրանքի՝ 2014 թվականի հուլիսի 11-ին, գիշերվա ժամը 2-ի սահմաններում Էդմոնդ Խլոպուզյանը Երևանի Մարգարյան փողոցի շենքերից մեկի մոտ գտնվելով՝ հեռախոսով զայրացած խոսել է կնոջ հետ ու բարձրաձայն հայհոյանքներ է տվել:

Հայհոյանքները լսելով՝ շենքի երրորդ հարկում բնակվող, այդ ժամին արթուն Հովհաննեսը հյուրասենյակի պատուհանից դուրս է նայել, դիտողություն է արել Էդմոնդին ու պահանջել է չհայհոյել իրենց շենքի մոտ, հեռանալ շենքի մոտից:

Էդմոնդին դուր չի եկել Հովհաննեսի դիտողությունը, նա ասել է, թե լավ է անում:

Հովհաննեսը բնակարանից իջել է՝ գիշերային աղմկարարին դեմ առ դեմ բացատրելու նրա արարքի հակահասարակական բնույթը:

Երիտասարդները վիճել են, փոխադարձ հարվածներ են հասցրել իրար:

Հովհաննեսի հետևից փողոց է իջել նաև նրա եղբայր Հարությունը: Վերջինս փորձել է դադարեցնել վեճը, ապա ինքն էլ է ներքաշվել կռվի մեջ:

Որդիների բացակայությունը նկատել է նրանց աչալուրջ հայրը ու նույնպես իջել է փողոց: Էդմոնդը դիմել է փախուստի:

Կռիվը դադարելուց հետո են Հովհաննեսն ու Հարությունը նկատել, որ կռվի ընթացքում դանակահարվել են:

Առավել ծանր վնասվածքներ ստացել էր Հովհաննեսը՝ որովայնի շրջանում թափանցող վերք՝ լյարդի վնասումով ու սուր արյունահոսությամբ, վնասվել էր նաև նրա ձեռքը՝ բազկի հատվածում:

Հարությունը դանակի հարված էր ստացել որովայնի կողմնային հատվածում, վնասվել էր հաստ աղին:

Հայրը զավակներին անմիջապես հասցրել է հիվանդանոց, նրանց կյանքը փրկվել է:

մանրամասն՝1in.am-ում