«Թագավորին թունավորեցին, Ներսես Մեծ կաթողիկոսին թունավորեցին, Վարդան Մամիկոնյանին մինչև այսօր քարկոծում են»...

Մամուլում այսօր հրապարակում էր եղել այն մասին, որ.«Վերջերս Գյումրիում սկսել են հետաքրքրվել Ամենափրկիչ եկեղեցու շինարարության փողերով եւ մեղադրանքներ ուղղել Վարդան Ղուկասյանին՝ հանգանակված գումարների յուրացման հետ կապված: Զարգացումների մեկնարկը տրվել է «Փաստեր» հաղորդաշարի հեղինակ Արմեն Բադալյանի հաղորդմամբ, որը, այնքան էլ պարզ չէ՝ ավելի շատ լրագրող է, թե հասարակական գործիչ, սակայն իր հաղորդման մեջ հարցադրում է արել, որ 1995 թվականից ընթացող Ամենափրկչի վերականգնման աշխատանքները ոչ մի կերպ չեն ավարտվում, չնայած «այս տարիների ընթացքում հատկացվել է ավելի քան 3 մլն. դոլար, որով հնարավոր էր մի քանի նմանատիպ եկեղեցի կառուցել»։
Հաղորդման տրամաբանությունից դատելով՝ Վարդան Ղուկասյանի կողմից բավական լուրջ յուրացումներ կան՝ մի քանի միլիոն դոլարի, սխեման էլ բավական պարզ է եղել՝ գոյություն են ունեցել մի քանի հիմնադրամներ, որոնց փոխանցվել են պետական, համայնքային եւ մասնավոր գումարներ: Ասում են՝ Գյումրիի նախկին քաղաքապետի շրջապատում լուրջ մտահոգություն կա, թե այս անգամ ով է դատվելու Ղուկասյանի փոխարեն, ինչպես ժամանակին տարբեր գործերով դատվել են նրա թիմի երկու կարկառուն անդամներ: 

Fnews.am-ը, վերը նշվածի առնչությամբ փորձեց պարզաբանում ստանալ նախկին քաղաքապետ Վարդան Ղուկասյանից, ով իր ոճին հավատարիմ մնալով պատասխանեց.

-Թագավորին թունավորեցին, Ներսես Մեծ կաթողիկոսին թունավորեցին, Վարդան Մամիկոնյանին մինչև այսօր քարկոծում են ու ասում են, թե դավաճան Վասակ Սյունեցին ավելի ճիշտ է, քանց թե Վարդան Մամիկոնյանը:Մխիթար Սպարապետի գլուխը կտրեցին, Անդրանիկին ուզում էին հանձնել թուրքերին, և դրա համար Հիսուս Քրիստոսն ասում է, թե դրանց հայրերից ենք մենք ճանաչում թե դրանք ովքեր են... Որովհետև մարգարեներին քարկոծեցին, իսկ Հովհաննես Մկրտիչն էլ ասում է թե իժերի ծնունդներ Տիրոջ ահեղ դատաստանից ուր պետք է փախչեք, … Էլ ուրիշ բան չունեմ ասելու, եթե նմանատիպ հարցեր են քննարկում, էտպիսի բաներ են ասում, եթե էդ մեծերին էտպիսի բան արեցին, մենք ով ենք, որ մեզ չքարկոծեն: Մեկ էլ մի բան կա, եթե տիրոջ մոտ նմանատիպ գործեր ես անում ու ընդունվում, ապա անպայման պետք է մարդկանց կողմից քարկոծվես, քննարկվես: