Սպանության մեջ մեղադրվող երիտասարդի հետքերը սպանված կնոջ դիակի վրա փորձաքննությամբ չեն հայտնաբերվել. Լիանա Բալյան

Մի խումբ անձանց կողմից շահադիտական դրդումներով, նախնական համաձայնությամբ, համագյուղացի 57-ամյա կնոջ սպանության գործը գտնվում է դատական վիճաբանությունների փուլում, և հաջորդ դատական նիստում կողմերը հանդես կգան ճառերով:

Ամբաստանյալ 30-ամյա Արմենի պաշտպան Լիանա Բալյանը «Փաստինֆո»-ի թղթակցի հետ զրույցում նշեց, որ գործով նշանակվել են դատաբժշկական, մատնադրոշմային, դատահետքաբանական, միկրոմանրաթելային համալիր փորձաքննություններ, ըստ որոնց՝ ապացուցված է, որ դիակի վրա իր պաշտպանյալի հետքերը չեն հայտնաբերվել:

Պաշտպանը գործին ներգրավվել է 2014թ. նոյեմբերի 23-ից, և հենց նույն օրն իր պաշտպանյալին կալանավորել են, երկու ամիս շարունակ Արմենը գտնվել է Ազգային անվտանգության մեկուսարանում, ապա տեղափոխվել է «Նուբարաշեն» ՔԿՀ:

Լիանա Բալյանի խոսքով՝ առ այսօր ո՛չ նախաքննության, ո՛չ էլ դատաքննության ընթացքում չի ապացուցվում իր պաշտպանյալի մեղքը: Ավելին՝ իր պաշտպանյալի հետքերը չկան, ոչ միայն դիակի վրա այլև տուժողի հագուստի և սավանի վրա:

Ամբաստանյալի պաշտպանը նաև նշեց, որ գործով ապացուցվել է, որ տուժող կինը տոկոսով գումար է տվել, սակայն մինչ այսօր այդ մասին հաստատող գրանցամատյանները դեռևս ոստիկանության տարածքային բաժնում են և գործին չեն կցվել:

Նշենք, որ նախաքննության ընթացքում ամբաստանյալը ցուցմունք չի տվել, իսկ դատարանում ցուցմունք տալով պնդել է, որ առաջադրված մեղադրանքը չի ընդունում՝ հավելելով, որ տուժողի հետ համագյուղացիներ են, երբեմն նաև այցելել է նրա տուն, չի բացառվում, որ իր հետքերը նրա տանից հայտնաբերեին, սակայն դա չի նշանակում, որ ինքն է սպանել տուժող կնոջը, ավելին՝ իր հետքերը չի հայտնաբերվել տուժողի դիակի վրա:

Դատաքննության ընթացքում ամբաստանյալը հայտնել է նաև, որ 2014թ. նոյեմբերի 21-ից 23-ը Արտաշատի բաժնում հատուկ ծառայություն իրականացնող անձի կողմից բռնություն է կիրառվել իր նկատմամբ և այդ հաղորդման հիման վրա Հատուկ քննչական ծառայությունում գործ է հարուցվել՝ ՀՀ քրեական օրենսգրքի 309-րդ հոդվածի 2-րդ մասի հատկանիշներով:
Մանրամասները՝pastinfo.am-ում: