Ոչ միայն Սպիտակը, այլ նաեւ իմ տարածաշրջանը կուզենամ տեսնել ծաղկուն,մարդաշատ, ու ամենակարեւորը՝ աշխատանքով ապահովված

Fnews.am-ի զրուցակիցն է թիվ 29 ընտրատարածքից ընտրված պատգամավոր Արկադի Համբարձումյանը, ում հետ փորձեցինք զրուցել ապրիլի 17-ին Սպիտակ քաղաքում սպասվող ՏԻՄ ընտրությունների շուրջ:

-Պարոն Համբարձումյան, տեղյակ ենք, որ ապրիլի 17-ին Սպիտակ քաղաքում տեղի են ունենալու ՏԻՄ ընտրություններ: Առաջադրված թեկնածուները Սպիտակի նախկին եւ ներկայիս քաղաքապետերն են: Հետաքրքիր կլիներ իմանալ Ձեր դիրքորոշումը թեկնածուների վերաբերյալ: Հատկապես որ այս մարզում եւ հայրենի Սպիտակ քաղաքում Ձեր հեղինակությունը բարձր է եւ Ձեր խոսքն արժեք ունի:

-Առաջադրված թեկնածուներն այո, երկուսն են, եւ ես նրանց լավ եմ ճանաչում: Ժամանակին նրանցից յուրաքանչյուրն էլ ժողովրդի կողմից վստահություն է ձեռք բերել: Կարող եմ ասել, որ աշխատել են իրենց ուժերի ներածին չափով: Իհարկե անսխալական մարդ չկա, բայց եւ պետք է նկատենք, որ նրանք իրենց աշխատանքային տարիներին ե՛ւ հաջողություններ, ե՛ւ բացթողումներ են ունեցել:

-Իսկ կոնկրետ Ձեր դիրքորոշումը թեկնածուներից որեւէ մեկին սատարելու վերաբերյալ այնուամենայնիվ կհայտնե՞ ք: Եթե իհարկե, գաղտնիք չէ...

-Ես Ձեզ ասեմ, որ իմ ժողովրդից ես գաղտնիքներ չունեմ: Տարածաշրջանում կատարվող իրադարձությունները միշտ էլ եղել են իմ ուշադրության կենտրոնում: Այս պարագայում սատարել մեկին՝ կնշանակի նեղացնել մյուսին: Օրենքով սահմանված կարգով մրցակցության դաշտն ազատ է, թող պայքարեն, ում կընտրի ժողովուրդը՝ նա էլ կհաղթի:

-Պարոն Համբարձումյան, իսկ չկա՞ որոշակի պատկեր, կամ, այսպես ասած, հավաստի տեղեկություններ, թե ում հետեւից կգնա ժողովուրդը:

-Ես, ճիշտն ասած, սոց.հարցում չեմ անցկացրել եւ չեմ էլ պատրաստվում նման բան անել, քանի որ արդեն ասացի՝ դաշտն ազատ է, թեկնածուները թող պայքարեն եւ ստանան իրենց արժանի քվեն: Բայց եւ ասեմ, որ ես թեկնածուների հետ հանդիպել եմ, զրուցել ու հորդորել, որ մրցակցությունն ընթանա առանց ինտրիգների ու ավելորդ լարվածության: Այսինքն՝ պետք է տեղի ունենան օրենքի տառին ու բառին համապատասխան ընտրություններ: Ես հարգում եմ իմ ժողովրդին, եւ ինձ համար կարեւորը ժողովրդի քվեն է: Իսկ թե ով կընտրվի Սպիտակի քաղաքապետ՝ կորոշի ժողովուրդը, եւ այդ մասին էլ, բնականաբար, դուք  էլ կիմանաք:

-Շատ լավ: Օգտվելով առիթից, ուզում էի նաեւ տեղեկանալ Ձեր հետագա անելիքների մասին: Տեղյակ ենք, որ այս տարածաշրջանում մեծ թվով աշխատատեղեր եք ստեղծել: Առաջիկայում ինչ նոր անելիքներ կլինեն: 

-Այո, 2015 թվականին կառուցել ենք թռչնաֆաբրիկան եւ համակցված կերերի գործարանը, որտեղ այս պահին աշխատում է շուրջ 200 մարդ: Իսկ ոլորտի ընդլայնման հետ կապված, արդեն իսկ աշխատանքներ են սկսվել (ի դեպ, 50 տոկոսով ընդլայնվելու են այդ աշխատանքները), ինչը հնարավորություն կտա ավելացնել եւս 30-40 աշխատատեղ: Նպատակ ունենք նաեւ այս ոլորտում ներդրումային ծրագիր իրականացնել՝10-15 մլն դոլարի չափով: Այս պահին տարվում են նախագծային աշխատանքներ: Կիրականացնենք նաեւ գյուղմթերքի մթերման հետ կապված աշխատանքներ, այսինքն՝ գյուղացին հնարավորություն կունենա իր բերքն իրացնել տեղում: Ընդհանրապես Սպիտակ քաղաքում նպատակ ունենք ստեղծել 500-700 աշխատատեղ: Ամեն դեպքում, եկեք փակագծերը չբացենք: Աշխատանքները տարվում են, դուք էլ, կարծում եմ, հետեւողական կլինեք:
-Եւ վերջում մեկ հարց եւս. ո ՞ րն է Սպիտակ քաղաքի վաղվա օրվա Ձեր տեսլականը:

-Ոչ միայն Սպիտակը, այլ նաեւ իմ տարածաշրջանը կուզենամ տեսնել ծաղկուն,մարդաշատ, ու ամենակարեւորը՝ աշխատանքով ապահովված: