«Խոնարհվում եմ մեր ազգի որդեկորույս մայրերի առաջ»,- այս խոսքերով այսօր իր՝ «Ճանապարհ դեպի լույս» խորագրով անհատական ցուցահանդեսը նվիրեց հայ մայրերին.PHOTO,VIDEO

«Խոնարհվում եմ մեր ազգի որդեկորույս մայրերին, մեր բոլոր մայրերին՝ մաղթում խաղաղություն»,-այս խոսքերով, այսօր իր՝ «Ճանապարհ դեպի լույս» խորագրով անհատական ցուցահանդեսը նվիրեց հայ մայրերին, Գարիկ Միքայելյանը:

Գարիկ Միքայելյանը ծնվել է 1986 թվականին, Աշտարակ քաղաքում: Ավարտել է Երևանի պետական համալսարանի ֆիզիկայի ֆակուլտետը: Ավարտել է նաև Հայաստանի պետական ճարտարագիտական համալսարանը՝ ստանալով ճարտարագիտության մագիստրոսի կոչում: Ծառայել է բանակում: Ներկայումս աշխատում է ՎիվաՍել-ՄՏՍ-ի Տեխնիկական վարչությունում:
Սկսել է նկարել 2010 թվականից: Իր վրձնած առաջին գործը կոչել է «Ճանապարհ դեպի լույս»՝ առաջին ցուցահանդեսն էլ որոշեց այդ խորագրով ներկայացնել:
Ժողովրդական ստեղծագործության կենտրոնի տնօրեն, բանաստեղծ Հովիկ Հովեյանը, նշեց, որ իրենց համար անակնկալ էր Գարիկի համաձարկությունը և ուժգին սերը ՝ գեղագիտության նկատմամբ:
«Գեղագիտության փնտրտուքի ճանապարհին ձևաչափն այնքան կարևոր չէ, որքան ցանկությունը, որի շնորհիվ Գարիկ Միքայելյանը ոչ մի խոչընդոտի առջև չի կանգնել և այսօր մեր զորաբանակում է, որպես լիարժեք անդամ»- նշեց Հովեյանը:

Երևանի գեղարվեստի պետական ակադեմիայի ռեկտոր , ՀՀ արվեստի վաստակավոր գործիչ Արամ Իսաբեկյանը վերջերս է ծանոթացել Գարիկին.
«Երբ տեսա նրա աշխատանքները հասկացա, որ գործ ունենք հետաքրքիր անձնավորության հետ: Ինձ ամենից շատ ոգևորում է այն անկոտրում ոգին, որն ունի Գարիկը: Եվ հենց այդ ոգեղենությամբ նա հաղթահարելով շատ դժվարություններ սկսել է նկարել, և ես ասում եմ, որ պետք է շարունակի նկարել»:
Նկարիչ Տիգրան Մատուլյանն էլ, շնորհավորելով հեղինակին՝ նշեց.«Հերոսությունը վերջանում է այնտեղ, որտեղ վերջանում է սերը: Գարիկի ստեղծագործություններում մենք տեսնում ենք, սեր և ուժ: Նա սիրով է նկարում: Մաղթում եմ, որ անսպառ լինի նրա սերը՝ կյանքի հանդեպ»:

Ցուցահանդեսի խորագիրն այս դժվարին օրերին հանրությանն ուղղված գաղտնագիր է, որը դիտողին լույսի արահետով տանում է դեպի խաղաղ ու ապահով աշխարհ:
Ցուցահանդեսը հանրությանը հասանելի կլինի մինչ ապրիլի17-ը:

Հիշեցնենք, որ 28-ամյա Գարիկ Միքայելյանը, որը 2007թ. բանակում էլետրահարման հետևանքով կորցրել է ձեռքերը, պրոթեզավորված ձեռքերով նկարում է բնանկարներ, նատյուրմորտներ, աբստրակտ նկարներ:

Գարիկ Միքայելյանը սկսել է նկարել դեռևս փոքր տարիքից, բայց իր հետ կատարված դեպքից հետո նկարելը նրա համար դարձել է կենսակերպ:

Նշենք, որ Գարիկ Միքայելյանն ավարտել է ԵՊՀ Կիրառական մաթեմատիկայի և ֆիզիկայի բաժինը, այնուհետև՝ ՀՊՃՀ Ռադիոտեխնիկայի և կապ բաժնի մագիստրատուրան, այժմ աշխատում է ՎիվաՍել-ՄՏՍ-ի Տեխնիկական վարչության ռադիո և ռադիոհամակարգերի բաժնում, ծնողների հետ բնակվում է Աշտարակում։

Գարիկի ձեռքի հրաշք աշխատանքները ներկայացնում ենք ստորեւ, կից ներկայացնում ենք նաեւ տեսանյութ թե ինչպես է ստեղծագործում մերօրյա տաղանդավոր նկարիչը...